​Майн 21-дэ ой модон таригдаха

Энэ бүхэроссиин хэмжээ ябуулга Буряад орон дотор эмхидхэгдэхэнь. Хаа-хаанагүй аюулта түймэрһөө жэл бүри, илангаяа һүүлэй жэлнүүдтэ модод хосорно ха юм. Тиимэһээ модохонуудые тарижа, ой модоёо шэнэлээгүй һаа, халзан һандархай тала майлаар орон дэлхэймнай бүрхөөгдэшэхэ бшуу.

Буряад Уласай Засагай газарта эмхидхэгдэдэг заншалта брифинг дээрэ ойн ажахын дарга Николай Кривошеев энэ хэмжээн тухай тайлбарилба.

- Улаан-Үдые тойруулаад, 2010 ондо түймэрэй аюулда хосорһон Тарбагатайн аймагай болон Заудинскын ойн ажахын дэбисхэр дээрэ, хамта дээрээ 61 гектар талмай дээрэ 200 мянгаад сагдуул нарһаханууд таригдаха. Энэ хэмжээ ябуулгада мянга гаран хүн ерэжэ хабаадахаар хараалагдана. Мүн бусад аймагуудаар баһал хүн зон олоороо хабаадаха түсэбтэй, - гэжэ Николай Петрович мэдээсэбэ.

Жэл бүри Росси гүрэн дотор энэ байгаали хамгаалгын ниитын хэмжээ ябуулгада хүн олоор хабаададаг болонхой. Хэрбэеэ 2011 ондо 150 мянгаад хүн хабаадаа һаа, 2015 ондо  3,5 миллион хүн хабаадаһан байна. Мүн лэ таригдаһан модохонуудай тоо үшөө олон боложол байна. 2015 ондо 44 миллион модохонууд таригдажа, 8,3 мянган гектар талмайда ойн жасын дэбисхэртэ болон бусад газарнуудта 5,4 мянган гектарта шэнэ ой модон бии болоо бшуу. Байгша 2016 ондо энэ хэмжээнэй шугамаар 50 миллион модохон таригдахаар хараалагдана. Гэхэ зуура, Буряад орон дотор жэл бүри ойн ажахын мэргэжэлтэд 4 миллион нарһахануудые таридаг байна.

Энэ хэмжээ ябуулга Буряад Уласай Засагай газар эмхидхэжэ, ой модо тариха хүсэлтэй “ногоон отрядуудые” бүридхэнэ. Ой ошожо, модо тариха хүсэлтэй зон 22-13-47 гэһэн утаһаар хонходожо, бэшүүлхэдэ болоно.