​Шэдитэ онтохондол гү, шэнэ сэсэрлиг?

Улаан-Үдын Октябрьска хороогой 148-дахи кварталда залуушуулай-ажаһуудалай комплекс гэжэ нэрлэгдэһэн гурбан дабхар байшан нёдондо ашаглалгада тушаагдаһан юм. Энэ гэр соо анханайнь түсэбэй ёһоор түхеэрэгдэһэн хүүгэдэй сэсэрлигые нээлгын баяр ёһолол уржадэр үнгэрбэ.

Автор: Виктор Атанов
Описание: Александр Голков сэсэрлигэй хүмүүжэмэлнүүдтэй нээлгын баяр ёһололой үедэ

Юрэнхыдөө хотын зүүн-урда зүгтэ (спиртзаводской шэглэлээр) социальна барилганууд үшөөл үсөөншэг һаа, мүнөө эршэ ябасань эдэбхижүүлэгдэнэ. Нарһан тужа соо түбхинэһэн энэ шэнэ сэсэрлиг Улаан-Үдын 110-дахи “Золушка”сэсэрлигэй (42-дохи квартал) харьяата гэхэ гү, али хоёрдохи корпусынь болоно. Ушар иимэһээ дүшэн жэлэй багшын стажтайдүршэл ехэтэй мэргэжэлтэн, Россиин Федерациин юрэнхы эрдэм һуралсалай хүндэтэ хүдэлмэрилэгшэ, Буряад Уласай эрдэм һуралсалай габьяата хүдэлмэрилэгшэ А.А. Чистяковада энэ шэнэ сэсэрлигые хамжан хүтэлбэрилхэ харюусалгата үүргэ даалгагдаһаниинь гайхалгүй.

Ирагуу һайхан хүгжэмэй аялга доро барилгашадай зүгһөө ООО “Энергия” гэһэн эмхиие толгойлогшо А.М. Воробьёвой Анна Алексеевнада түлхюур барюулһанай удаа сугларагшад шэнэ сэсэрлиг соогуур ябажа, мүнөө үеын үндэр эрилтэнүүдтэ хүрэмөөр түхеэрэгдэһэн байра байдалынь хараба.

Танилсалгын удаа актова танхим соо Улаан-Үдын мэр А.М. Голков амаршалгын үгэ хэлэхэдээ, хүүгэдые һургуулиин урдахи эмхинүүдтэ һууринуудаар хангалгые сүм һайжаруулха гэһэн гүрэнэй һүүлэй үеын эрилтэнүүдтэй зохилдуулан ябуулжа байһан ажалаймнай нэгэ хубинь гэжэ онсолон тэмдэглэбэ.

Улаан-Үдэ хотын захиргаанай толгойлогшын уялгануудые дүүргэгшэ О.Г. Екимовский, Октябрьска хороогой захиргаанай толгойлогшо А.Г. Сухоруков сугларагшадые амаршалхадаа, 48-дахи кварталай, Импульс һууринай хүүгэдэй түрэлхидэй баяр угаа ехэ, дам саашаа энэ талаар үшөөшье ехэ хүгжэлтэ туйлагдаха бэзэ гэжэ мэдүүлбэ.

Автор: Виктор Атанов
Описание: Сэсэрлигэй баярта олон айлшад ерээ

Айлшадай урда “Золушка” бүлгэм богонихон аад, ялас гэмэ концерт харуулба. “Золушка, онтохо намда бэлэглыш!” гэһэн дуу, хатараар баясуулһан багашуулые харахадаа, үнэхөөрөөшье, мүнөөдэр шэдитэ үльгэр онтохоной үдэр мүндэлөө гү гэжэ һанахаар бэлэй. Уужам салуу аад, шэб шэнэ, хүүгэдтэ эгээл тааруу мебелеэр хангагдаһан, яла сала энэ сэсэрлигтэ ябаха багашуул ямар аза талаантай гээшэб. Һайн һанаатай, һайхан заяатай хүмүүжүүлэгшэд шэлэн абтажа, Улаан-Үдэ соогоо суутай 110-дахи сэсэрлигэй алдар нэрэнь дамжан, бүри арьбажахань лабтай гэжэ найдамаар.

Автор: Виктор Атанов
Описание: “Золушка” бүлгэм богонихон аад, ялас гэмэ концерт харуулба