​Шэнэ оньһото арга бүтээдэг

Буряад Уласай клиническэ Н.А. Семашкын нэрэмжэтэ больница бүхы аймагуудай үбшэнтэниие эмнэлгээр хангадаг юм. Аймагуудай эмнэлгын газарнуудта аргалжа болохогүй гү, али ямар нэгэ хүшэр үбшэнтэниие энэ больницада асаржа аргалдаг.

Жэл ошохо тума Буряад Уласай урдаа хараха эмнэлгын газар шэнэ түхэлэй, мүнөө үеын оньһото арга хэрэглэжэ, дээдын шатын эмшэдээр олон болоһониинь һайшаалтай.

Энэ больницын нейрохирургиин таһагта шэнэ оньһото операци бүтээгдээ. “Аномалия Арнольда Киари” гэһэн үбшэнэй диагноз табигдаһан 64 наһатай нэгэ эхэнэр жэлэй туршада үбдэжэ ябаа. Семашкын нэрэмжэтэ клиникэ ерэхэдэнь, нейрохирург Владислав Борисов: “Та һанаагаа ехээр бү зобогты, энэ үбшэнгыетнай операциин аргаар эмнэжэ, һайн болгохобди», - гэжэ найдуулба. Иимэ үбшэ аргалха операцитус клиникын врачнууд Оросой Холбоото уласай түб эмнэлгын газарнуудта бүтээхэ тусхай һуралсал гараһан байгаа.

Мүнөө тэрэ эхэнэрэй бэе махабад бараг, эмшэдые болон түрэл болоһон больницаяа тэрэ магтана.

- Энэ эмнэлгын газар ороходоо, хургаараа хамараашье онохогүй, зогсожошье шадахагүй, юумэнһээ барилсаад, арай амиды байгаа һэм. Мүнөө шадалтай, өөрөө зогсодог болоһондоо ехэ баяртайб. Ямар бэрхэ эмшэд гээшэб! Одоо намда туһалжа абарһандань, ехэ баярые хүргэжэ, тэдэнэй түлөө бурхандаа зальбаржа байнаб,- гэжэ Любовь Александровна хөөрэбэ.

Иимэ үбшэнтэй зон мүнгэ зөөри бэдэржэ, холын түб хотонуудта ошожо хүүлэдэг һэн. Мүнөө Буряад Уласай клиническэ энэ больницада иимэ операци хэдэг болоһониинь ямар ехэ туһа гээшэб!

Үшөө нэгэ ушар һаяшаг тохёолдоо. Нэгэ залуу хүн олон зоной наншалдаанда оролсожо, шаасалдаһан байгаа. Тиигээд нэгэ хэды болоод, угаа ехээр хото дотороо үбдөөд, энэ больница руу хандаһанюм. Эндоскопиин шэнэ түхеэрэлгын ашаар гэдэһыень отолжо хахалангүй, хоолой руунь оруулжа, бүхы үбшэнэй шалтаг болохо өөрынь шүдэ гаргажархиба. Ушар юуб гэхэдэ, наншалдаад, шаалгуулхадаа, шүдэниинь хухаржа унахадань, тэрэ хүн ойлгомторгүй шүдэеэ залгижархиһан байгаа. Тэрэ шүдэниинь үзүүртэй хадаа досоохииень адажа, үбдэхөөжэ байгаабшуу.

Иимэ ушарнуудые бэшээ һаа, тоолошогүй олон юм ааб даа. Семашкын нэрэмжэтэ энэ больницада хандаагүй гэр бүлэ манай Буряад орон дотор үгы шахуу бшуу.

Мүнөө тус больница үргэлжэ шэнэлэгдэжэ, һаруул, томо, дулаан, мүнөө үеын эрилтэдэ таарама байшангуудаар үргэдхэгдэжэл байна. Элдэб шэглэлэй эмнэлгын газарнуудта 805 үбшэнтэнэй нэгэ доро хэбтэхээр һууритай, больницын дэргэдэхи поликлиникэдэ жэл соо 100 мянгаһаа дээшэ зон хандажа аргалуулагдадаг юм. Эндэ аяар 1788 хүн ажалладаг, 299 врачнууд, тэдээн сооһоо эмнэлгын эрдэмэй 4 докторнууд, 34 дид-докторнууд, 712 дунда мэргэжэлэй эмшэд гээд ажаллана.Тус больница аяар 50 һалбаритай. Жэлэй туршада эндэ 25 мянган хүн аргада ородог, тэдэнэй 53 процентнь хүдөө һуурингуудай ажаһуугшад болоно. Жэлэй туршада 1000 гаран шэнэ оньһото аргаар зүрхэнэй, һу-даһанай хирургиин, травматологиин, ортопедиин гээд шэглэлээр операцинууд хэгдэжэ байдаг.

Элүүрые хамгаалдаг яаман эмнэлгын больницануудай хоорондо харалга соносхоо. Тэрэнэй ёһоор, аргада ороод гараһан зон “Арадай врач”, “Арадай медсестра”, “Минии дуратай больница” гэһэн гурбан шэглэлээр өөрынгөө һай һанаһан хүндөө дуугаа үгэхэ аргатай. Минии һанахада, “Минии дуратай больница” гэһэн шэглэлэй харалганда Буряад Уласай Семашкын нэрэмжэтэ больница түрүүлхээр ёһотой. Тиимэһээ Буряад оронойнгоо бүхы аймагуудай тосхон һуурингуудта ажаһуугшадта хандажа, 44-08-22, 21-50-09 гэһэн утаһаар хонходожо, дуугаа үгэхыетнай уряалнаб.