​"Эхэ хэлэн - манай баялиг"

Оросой Буддын шажантанай заншалта Сангхын эмхидхэдэг Буряадай һургуулинууд хоорондын “Эхэ хэлэн – манай баялиг” заншалта наадам майн 27-до 13-дахияа үнгэржэ, үглөөдэрынь Буряадай телевидениин эмхидхэһэн наадамда һурагшад хабаадаа. Энэ удаа наадамай эмхидхэлгые “Буряад үнэн” Хэблэлэй байшан тэдхэжэ гараа.

Зуун жэл гаталһан

Омог ехэ буряадууд,

Дайдын зоной гайхама

Байдал зохёон жаргая!

Заншалта наадамые 24-дүгээр Бандида-Хамба лама Дамба Аюшеев өөрөө нээжэ, хабаадагшадта хандахадаа, энэ наадамай буряад арадай ургажа ябаһан эдир үетэндэ ямар ехэ нүлөөтэй байһыень хэлээд, амжалта хүсэжэ, Буряад Уласай Толгойлогшын болон Засагай захиргаанай мэдээсэлэй шэнжэлгын таһагай дарга Ирина Смолягта үгэ үгэбэ. Ирина Владимировна наадамда хабаадагшадые амаршалжа, амжалта хүсэхэдөө:

- Тус конкурс эмхидхэгшэдтэ ба туһалһан зондо баярые хүргэнэб. Илангаяа Буддын шажанай заншалта Сангха буряад хэлэ хүгжөөхэ ба ургажа ябаһан залуушуулые хүмүүжүүлхэ ажалда горитой хубитаяа оруулна, - гэжэ тэмдэглээ.

Автор: Борис Балданов
Описание: Бандида-Хамба лама Дамба Аюшеев, Ирина Смоляк нээлгын үедэ

Үргэн Буряадаймнай холо, ойрын аймагуудай 45 команда Буддын шажанай дээдэ һургуули соо эмхидхэгдэһэн энэ наадамда хабаадажа, эхэ хэлэеэ хэр мэдэдэгээ, яажа шудалжа байһанаа, гар урлалаа хэр зэргэ хүгжөөдэгөө харуулаа. Хэдэн һалбаринуудаар гэрэй даабари үгтэһэн байжа, бэшэмэл болон видеодо буулгагдаһан ажалнууд сүлжээ холбоогоор эльгээгдэһэн, харин гар урлалай бүтээлнүүд эндэ дэлгэгдээ. Тиигээд блиц-урилдаан, уран хөөрөөнүүд, уншалганууд, тестнүүд, уран гартанай арһаар, пластилинээр урлалга гээд лэ мүрысөөнүүд бусалшаба даа.

Автор: Борис Балданов
Описание: Тодо харюу үгэхэ шухала

Автор: Борис Балданов
Описание: Зүү, хурабшын мэргэшүүл

Автор: Борис Балданов
Описание: Уран уншалга

“БУРЯАД ХЭЛЭНЭЙ НЮТАГАЙ АЯЛГЫН ТОЛИ” бэлдэлгэдэ I һУУРИ Улаан-Сүхэ аймагай Шаргалжанай дунда һургуули эзэлжэ шадаа. II һУУРИ Баргажанай аймагай Уланай дунда һургуули абажа, III һУУРИДА Бэшүүрэй аймагай Харланай үхибүүдэй бүлэг гараа.

“ХОЁР ХЭЛЭ ТЭГШЭ МЭДЭЕ!” Ородһоо нютаг хэлэндээ оршуулгада I һУУРИ Хориин аймагай Хориин 2-дохи дунда һургуулиин «Балаасайтан» бүлгэм эзэлээ. II һУУРИ Яруунын аймагай Эгэтын-Адагай дунда һургуули абажа, III ҺУУРИДА Улаан-Үдэ хотын 29-дэхи Буряад гимнази гараа.

Бүгэдэ буряадуудай “Алтаргана – 2016” нааданда зорюулһан ЭССЕ зохёолгодо I ҺУУРИ Бэшүүрэй аймагай Харланай Клара Ульзутуева эзэлээ. II ҺУУРИ Хориин аймагай Хориин 2-дохи дунда һургуулиин «Балаасайтан» бүлгэмэй Банзаракша Балданов абажа, III ҺУУРИДА Ахын аймагай Өөрлигэй дунда һургуули гараа.

“БЛИЦ-УРИЛДААНДА” I һУУРИ Зэдын аймагай Петропавловкын 1-дэхи дунда һургуулиин Женя Найданова эзэлээ. II һУУРИ Зэдын аймагай Дэрэстэйн дунда һургуулиин Дулма Бадмаева абажа, III һУУРИДА Бэшүүрэй аймагай Харланай үхибүүдэй бүлэгэй Бимбасу Жигжитова гараа.

“УРАН БЭЛИГТЭЙ, УЛЬГАМ ХЭЛЭТЭЙ” гэһэн видео-буулгабаринуудаар (Бурелаш) I һУУРИ Зэдын аймагай Дээдэ-Үшөөтэйн дунда һургуули эзэлээ. II һУУРИ Бэшүүрэй аймагай Харланай үхибүүдэй бүлэг абажа, III һУУРИДА Буряад Уласай Үндэһэтэнэй 1-дэхи лицей-интернат гараа. 

“ХЭНЭЙ ХЭЛЭН БАЯН БЭ?” урилдаанда I һУУРИ Сэлэнгын аймагай Жаргалантын дунда һургуулиин Даша Аюшеева эзэлжэ, II һУУРИ Баргажанай аймагай Уланай дунда һургуулиин Тамир Бадмаев гаража, III һУУРИ Хяагтын аймагай Ехэ-Нугын дунда һургуулиин Арюна Токтохоева абаа.

“ОНЬһОН ҮГЭ ОНОСТОЙ, ОЛОНОЙ ҮГЭ ТУДАСТАЙ” сээжэ хөөрөөндэ I ҺУУРИ Зэдын аймагай Петропавловкын 1-дэхи дунда һургуулиин Дарима Цыбенова эзэлжэ, II ҺУУРИ Улаан-Үдэ хотын 29-дэхи Буряад гимназиин Лера Романова абажа, III ҺУУРИДА Улаан-Үдэ хотын 9-дэхи дунда һургуулиин Сыжэнь-даолима гараа.

“ЭТИГЭЛ ХАМБАДАА ЗАЛЬБАРАЛДА” “ДОНШУУР МААНИ“ уран гоёор сээжээр уншажа, I ҺУУРИ - Сэлэнгын аймагай Сэлэн-Дүүмын, II ҺУУРИ - Сэлэнгын аймагай Жаргалантын, III ҺУУРИ - Яруунын аймагай Эгэтын-Адагай дунда һургуулинууд эзэлээ.

“УЯНГЫН ШҮРЭ ҮЛХЭЕ” урилдаанда уран гоёор шүлэгүүдые уншажа, I ҺУУРИ Бэшүүрэй аймагай Харланай үхибүүдэй бүлэгэй Янжима Лыгжитова эзэлжэ, II һУУРИ Сэлэнгын аймагай Жаргалантын дунда һургуули абажа, III ҺУУРИ Зэдын аймагай Петропавловкын 1-дэхи дунда һургуулиин Мэдэгма Данзанова абаа.

“УРАН ГАРТАН” бүлгэмдэ Зэдын аймагай Петропавловкын 1-дэхи дунда һургуулиин Дарима Будаева зүү хурабшын эзэн байһанаа гэршэлжэ, I ҺУУРИ эзэлээ. II һУУРИ Бэшүүрэй аймагай Харланай үхибүүдэй бүлэгэй Елена Дармаева абажа, III һУУРИ Сэлэнгын аймагай Харганаагай дундa hургуулиин Виктория Балданова абаа.

“УРАН БАРИМАЛ” бүлгэмдэ талаан бэлигээ гэршэлжэ, I ҺУУРИ Улаан-Үдэ хотын 54-дэхи дунда һургуулиин «Дүхэриг» бүлэгэй Олзо Эрдынеев эзэлжэ, II ҺУУРИ Бэшүүрэй аймагай Харланай үхибүүдэй бүлэгэй Заято Бадмаев абажа, III ҺУУРИ Хяагтын аймагай Мөөрөөшын дунда һургуулиин Алина Залуцкая абаа.

ХАМБА ЛАМЫН ШАН АБАЛГЫН ТЭМСЭЭНДЭ I ҺУУРИ Сэлэнгын аймагай Жаргалантын дунда һургуулиин Даша Аюшеева эзэлжэ, II ҺУУРИ Хориин аймагай Хориин 2-дохи дунда һургуулиин Оюна Нимаева абажа, III ҺУУРИ Ивалгын аймагай Гэльбэрын дунда һургуулиин Саша Дабаина абаа.

“Буряад үнэн” Хэблэлэй байшан тусхай бэлэгүүдые аяар холын Ахаһаа ерэжэ хабаадаһан Өөрлигэй болон Саяанай һургуулинуудай командануудта барюулаа.

Энэ наадамые тэдхэлгэдэ хубитануудаа оруулаа гэбэл: Буряад Уласай Хүдөө ажахын яаман, Зүүн Сибириин гахай үсхэбэрилдэг комплекс, Яруунын аймагай захиргаан, “Центр-пакет” дэлгүүрнүүдэй түб, Хэжэнгын аймагай редакци, Оронгын нютагай захиргаан, “Capital mall” теледамжуулгануудай түб, Буряадай гүрэнэй филармони, “Орда” гэһэн этногалерей, “Бэлиг” хэблэл, “Либерти” дэлгүүр, “Вета-пресс” бүлгэм, “Түгнэ” нэгэдэл, “Эй энд Ди Рус”, “Метрополь” нэгэдэлнүүд.

Наадамай түгэсхэлдэ Бандида-Хамба лама ээлжээтэ наадамда үшөө нэгэ уран гартанай мүрысөө оруулхабди гэжэ найдуулаа: “Буряад араднай үни холоһоо модондо бэрхэ байһан. Энэ бэлигээ үргэн һалбаруулая”. Тиигэжэ модоор һиилэлгэ мүрысөөн наадамуудта оруулагдаха болобо гээшэ.

СЭНХИР ЭКРАНДА

Үглөөдэрынь наадамда хабаадагшадай эрхимүүд нютаг хэлэнүүдэйнгээ хэлбэреэр зургаан команда байгуулжа, Буряадай телевидениин эмхидхэһэн дамжуулга-мүрысөөндэ хабаадаба. Энэ наадамнай Улаан-Үдын болон Буряадаймнай аймагуудта харуулагдаха, тиимэһээ ганса жюриин гэшүүд шалгаха бэшэ, бүхы зомнай, нютагаархимнай эхэ хэлэеэ хэр мэдэдэгымнай сэгнэхэ, түрэлхиднай, үетэн нүхэднай хараха гэжэ ойлгоһон үхибүүд ехэл оролдолго гаргаа.

ДҮНГҮҮД:

1 һуури - Улаан-Үдэ хотын һургуулинуудай бүлгэм

2 һуури - Сэлэнгын буряадуудай бүлгэм

3 һуури - Хори буряадуудай бүлгэм

4 һуури - Хонгоодор буряадуудай бүлгэм

5 һуури - Жаргалантын һургуулиин бүлгэм

6 һуури - Баргажан буряадуудай бүлгэм.