​Үхибүүд аманда орохоһоо ямаршье хэлэн дээрэ яриха шадалтай

А.С.Пушкинай, 4 «а» гэдэг хаягаар оршодог «Орда» гэжэ комплекс дотор 5-дахи дабхартань «Кiddo club» гэжэ табанһаа арба хүрэтэр наһанай хүүгэдэй ябадаг англи хэлэнэй һургуули 2016 оной январиин янгинама хүйтэн соогуур хүдэлжэ эхилээ һэн. Хари хэлэ шудалагшад долоон хоногтоо хоёр дахин иишээ харгылна. «Кiddo club» гэжэ нэрэтэй клубайнгаа богоһо алхаһанһаань хойшо тэдэнэй шэхэндэ гансал англи үгэнүүд торосолдоно. Уданшьегүй тэдэ өөһэдөөшье«а» үзэг харахадаа, «эй» гэжэ үгүүлдэг болошонхой, ганса хэшээлэйнгээ үедэ бэшэ, юрэ бэе бэеэ золгоходоо, наадахадаашье, аманһаань унаһан үгэнүүдынь Вильям Шекспирэй эхэ хэлэн дээрэ гарадаг болоно.

Нюусань ямар байгаа хаб гэжэ, хүндэтэ уншагшад, танай эльгэ зүрхэндэ һэжэг түрөө ёһотой. Зай, тайлбарилаадхиябди.

«Кiddo club»-айнгаа үүдэ татажа ороод, аяар 4 сагай туршада таһалгаряагүй үхибүүд хэшээлээшье хэжэ үрдинэ, багшань багашуулай ой гутаажархихагүйн тула забһарыень зохидхоноор шэмэглэжэ, англи хэлэн дээрэ зүжэг табижа, өөһэдыень хабаадуулна, үнгын жамбын наада наадуулна. Ород хэлэн дээрэ үргэн долдой болоһон хүбүүд, басагад дүрбэн часай туршада ородоор нэгэшье үгэ дууланагүй. Тиимэһээ англи хэлэндээ аймшагтай түргөөр дадана ха.

Автор: «Кiddo club» һургуулиин дурадхаһан фото-зураг

Описание: Багшань багашуулай ой гутаажархихагүйн тула забһарыень зохидхоноор шэмэглэдэг

- «Табатай үхибүүдые абанабди» гэжэ соносхол уншаһан гэртэхин намда хандахадаа, «Иимэ зааханһаань эдэнэртэмнай англи хэлэ зааһанай урма бии юм гү? Дан эртэ бэшэ гү?» гэжэ ото асуужал байгша, - гээд, «Kiddo club» эмхидхэгшэ Дарима Аюшеева анхарал хандуулна: - Манай харюу. Хэлэ үзэхэдэ, хэзээшье эртэ бэшэ. Масару Ибука, Мари Монтессори, Юлия Гиппенрейтер гэгшэдэй номуудые уншаа һаатнай, улаан утаһаар иимэ бодол гаргана ха юм: үхибүүнэйнгээ заахан байха бүри тэрээндэ ямаршье хэлэ заахада, тэдэ һаадгүйгөөр тогтоожо абаха. Бага байха бүреэ үхибүүн ганса эжынгээ хэлэн дээрэ бэшэ, бүхы дэлхэйн хэлэ шэнгээжэ абаха шадалтай. Эгээл энээнииень бидэ хэрэглэжэ, мүнөө англи хэлэн дээрэ тэдэниие үрхирсэ дуугардаг болгожо байнабди. Үхибүүднайшье ехэл дуратайгаар англи хэлэ шэнгээжэ абана.

Үхибүүн бүхэн өөрын зан абаритай байдаг. Нэгэ зариман ном үзэхэдөө, ехэ оролдосотой, зариманиинь мохоо гү, али залхуу байжа магад. Энээн тухай олон жэлэй саана буряад шүлэгэй хаан Дондог Аюшеевич Улзытуев «Эсэгын хүбүүд» гэһэн шүлэг соогоо дурдахадаа, иигэжэ хэлэһэн байдаг: «Нэгэниинь үгөөр, нүгөөдэнь һүхөөр». «Kiddo club»-ай багша үхибүүдэй толгой дээгүүр дан һүхэ мадага далайгаагүй юм бэзэ, харин нэн түрүүн үхибүүн бүхэниие өөрөө өөртөө эрилтэ табижа һургана. Тиигэхын тула амяараа байһан басаган гү, али хүбүүн бүхэнэй оньһыень оложо, мууень дараад, һайнииень үргөөдхинэ ха юм.

Ахамад бүлэгэй амжалтыень шэнжэлээд, тус хэшээлнүүдэй хэр һайн шанартай байһыень, хүндэтэ уншагшад, тандаа баталан харуулая.

- Һургуулида һурадаг хүүгэд маанарта январь һарада хүрэжэ ерэхэдээ, англи хэлэнэйнгээ хэшээлнүүдтэ «гурба» гэһэн сэгнэлтэнүүдтэй һэн. Тэдэнииень харахадаа, би балай гайхаагүй һэмби. Ушар юуб гэхэдэ, үзэжэ байһан сэдэбүүдынь наһандань зохихогүй байгаа бшуу. Тиихэдэнь бидэ яагаабибди? Шанга гэгшээр хүдэлжэ, «гурбануудтай» үхибүүднай март соогуур гэртээ «дүрбэнүүдые» асаржа, гэртэхинээ баясуулба. Харин май һарын эхилхэдэ, «табануудшье» бии болоо һааб даа. Эндэ гайхама гэлымэ нэгэшье юумэн үгы. Амаргүй нэтэрүүгээр өөрөө өөрыгөө намнажа, үхибүүднай англи хэлэ шудалхадаа, амжалтатай болоно гээшэ.

Хүндэтэ уншагшад, мүнөө тон һонин зүйлдэ тулажа ерэбэт.

«Kiddo club»-та ябадаг нэгэ үхибүүн бүхэли һарын туршада багшатаяа золгожо, уһан англи хэлэтэй болохын тула 4800 түхэриг түлэдэг байха юм.

- Үхибүүн багшатаяа долоон хоногто хоёр дахин уулзана. Жэшээнь, гарагай гурбанай (вторнигой), гарагай табанай (четвергын) үдэрнүүдые абаял даа. Англи хэлэн дээрэ дүрбэн часай туршада таһалгаряагүй харилсажа байхадаа, хэлэтэй болонгүй яахаб, - гэжэ «Kiddo club» байгуулагша Дарима Аюшеева хэлэнэ.

Тиимэһээ иимэ мүнгэ халааһанһаа гаргажа үгэхэ шадалтай гэртэхиниие бэдэрүүлээр олохо хэрэг гарана.

- Олзын хэрэг эрхилжэ эхилһэн хүн эхилхэдээ, мүнгэ алтаар хомор байдаг ха юм даа. Харин һара бүхэндэ түлэгдэхэ түлбэринүүд гээшэ олзо оршын бага, ехые һурадаггүй. Тиимэһээ дары түргэн эд манай хангалтада хэрэгтэй зоноо олохо зорилго урдаа баряабди. Тиин Фэйсбук, Инстаграмм, Вконтакте, Одноклассники мэтын олониитын сүлжээнүүдтэ «англи хэлэ шудалдаг нэмэлтэ хэшээлнүүдые хэнэбди» гэһэн удхатай мэдээсэл тараагаабди. Түрүүшын үхибүүд, тэдэнэй гэртэхин тэндэһээл ерээ. Манай хэшээлнүүдэй шанар хоёр нюдөөрөө хараһан, хоёр шэхээрээ дуулаһан хойноо үхибүүдэйнгээ һургуулида амжалтатайгаар һуража эхилхэдэнь, гэртэхин нүхэдтөө «Kiddo club» тухай үреэл, магтаал, соло дуудажа эхилнэ. Тиихэдэнь тэрэниие дуулаад, багашуулаа хүтэлэгшэд һүүлэй үедэ олон боложо байна, - гэжэ «Kiddo club»-ай эрхилэгшэ Дарима Аюшеева нюусаараа хубаалдаба.

Зун боложо, Буряадай бүхы багшанар амархаяа зэһэшоод байна гээшэ. Харин «Kiddo club» амарха эрхэгүй. Зунайшье сагта үхибүүдтэеэ тордиһогүйгөөр англи хэлэн дээрэ харилсажа байха, шэнээр үхибүүдыешье абаха түсэбтэй. Тиигээдшье һуралсалай жэлдэ амяа абаха сүлөөгүй гэхээр энэ-тэрэ юумэндэ һуража байһан хүбүүд, басагад зундаа сүлөөтэй болоно. Тэдэнэршье ерэжэ болохо ха юм даа.

- Зунаймнай хэшээлнүүдтэ табанһаа долоо хүрэтэр наһанай хүүгэд ябаха аргатай. Найманһаа арба хүрэтэр наһатай үхибүүд амяараа бүлэгтэ англи хэлэтэй болоно. Эжынэр бүүбэйнүүдтэ үльгэр, онтохо хөөрөөд үгэжэ байгша гүбэ. Бидэшье эгээл иимээр багашуулда эди шэдитэй танилсуулнабди, һонирхуулнабди, хатар хатарнабди, дуунуудые сээжэлдээд дууланабди, його шудалнабди.

Автор: «Кiddo club» һургуулиин дурадхаһан фото-зураг

Описание: Үхибүүд наадангаа хэлэ шудалдаг

Ерээдүйн хараанууд

- Англи хэлэ урагшатай заажа байхадаа, ерээдүйдэ Улаан-Үдын үхибүүдые тордиһогүйгөөр буряадаар дуугардаг болгохо һанаан бии, - гэжэ Дарима Аюшеевагай гүбэд гэхэдэ, «Буряад үнэнииемнай» уншагшадай зүрхэндэ тоһо лэбшээһэндэл болоно ёһотой. Багашуулнай буряадаараа зугаалнагүй гэжэ олохон үбгэд, хүгшэдэй гажархые үдэр бүхэндэ харажал байна ха юмбибди.

- Хотын үхибүүдтэ буряад хэлэ гарагай нэгэндэ заадаг болохобди. Энэ түсэлөө бэелүүлхын тула бэлэдхэл эхилэнги. Шадамар багшанар хэрэгтэй, хэшээлнүүдынь һонин байха ёһотой ха юм даа.