​Доодо-Ивалгаархинай зунай найр

Зунай зулгы саг ерэжэ, обоо ууланууд тахигдажа, нара ногоо татана гэбэшье... Үнгэрһэн май һарамнай ганса һалхяараа даража, бөөгнэрһэн үүлэдые үрин тарин намнаад лэ, абаашажа байгаа. Арадай сэсэ мэргэнээр шэнжэһэн “Лагбиишанда” (“Благовещение” – апрелиин 7) һалхилбал, жаран үдэртэ ходо һалхилха гээшэнь сэхэ тудаал даа. Энэшье гарагай 7-ной (Бимба) июниин 4-эй үдэр һалхитай байба. Хэды һалхитай, тооһотой байгаашье һаань, Хойто-Бэеын (Зүблэлтэ засагай үедэ “Коминтерн”) болон Доодо-Ивалгада хабаатай нютагуудай хүн зон “Олимп” стадион дээрээ Хүүгэдые хамгаалгын уласхоорондын үдэртэ зорюулһан зунайнгаа найр ехэ зохидоор үнгэргөө.

Автор: Айсулу Мухамеджанова
Описание: Бишыханшье хүүгэд найрлаа

- Ивалгын аймагай Доодо-Ивалгын захиргаанда Доодо-Ивалга, Нуур-Сэлеэн, Һужаа, Хойто-Бэе, Улаан-Ивалга болон Северный квартал гээд, олон нютагууд ородог юм байна. Эдэ нютагуудта үргэн Буряадаймнай эндэ тэндэһээ буужа ерэһэн зон олон, илангаяа Захааминһаа нүүжэ ерэһэн зон олоороо ажаһууна. Тиимэһээ булта зондо амар амгаланиие, зол жаргал хүсөөд, мүнөөдэрэй найр наадан ТОС-уудай эдэбхи үүсхэлээр бүтэбэ.

Захааминай Санагаһаа угтай Алима Тугутова (угаараа Ардаева) Хойто-Бэеын хүүгэдэй сэсэрлиг даадаг. Алима Николаевна эдэбхи үүсхэл гаргажа, гудамжынгаа зониие эблэрүүлжэ, “Сагаан-Дали” ТОС байгуулаад, нютагайнгаа хүгжэлтэдэ горитой хубитаяа оруулна. Мүнөөшье энэ найр нютагайнгаа хүүгэдтэ зорюулжа үнгэргэе гэжэ үүсхэл гаргаа. Энэ үүсхэлыень “Западный” ТОС (Алия Мухамеджанова) халуунаар дэмжэжэ, нютагайнгаа зониие баярлуулба гээшэ.

- Энэ стадион 2014 ондо “арадай барилгын” аргаар барижа, “Сурхарбаангаа” үргэн дэлисэтэйгээр үнгэргөө һэмди. Теэд тэрэ гэһээр эндэмнай мүртэй юумэ үнгэргэгдөөгүй аад, мүнөөл эдэ ТОС-уудаймнай ашаар иимэ һайхан найр үнгэржэ байна, - гэжэ “Арюун бэлиг” түбэй Мэдэгма Раднаева хөөрэнэ. – Манай клубай захирал Елена Очирова, уран һайханай хүтэлбэрилэгшэ Анастасия Гомбоева хоёр гоё һайхан программа бэлдээ. Эгээл багашуулай гэмэлтэнгүй наадахаар агаараар үлеэгдэдэг “батут” захижа асаруулаа. Найртамнай уригдаһан хүхюу хүгтэй, наадаша шогууша клоун (Светлана Санжитова) багашуулымнай хүхюу наадануудта хабаадуулжа, унатарнь эльгэ хатуулжа, энээхэн тайзамнай нахилзажа байнал! – гэжэ Мэдэгма Бавасановна баяраа мэдүүлнэ.

Автор: Айсулу Мухамеджанова
Описание:наадааша шогууша клоун хүүгэдые хүхеэгээ

- Нютагтамнай иимэ ТОС-уудай эдэбхитэйгээр ажалаа ябуулжа байһандань ехэ баяртайб, - гэжэ “Нижнеиволгинское” СП-гэй гулбаа Гармажаб Дымбрынов баярлана. Тиигээд “арадай барилгын” аргаар бодхоогдожо байһан Соёлой, тамирай түбэй (КСЦ) байшан харуулжа, - энэ ажалнай ехэнхидээ эдэ ТОС-уудаймнайл аша габьяа гээшэ. “Западный” ТОС-най республика соогоо эрхимүүдэй тоодо орожо, 200 мянган түхэриг шүүжэ, энэ ажалаа урагшална, - гэжэ Гармажаб Баирович мэдээсэбэ.

- Үнэхөөрөөшье, һүүлэй үедэ ТОС-ууднай ехэ ажал ябуулна. Илангаяа үхибүүдэй сүлөө сагаа эдэбхитэйгээр үнгэргэлгэдэ, залуушуулай элүүр энхэ ажаһуудалай түлөө тамирай, физическэ соёлой хүгжэлтэдэ горитой ябуулга хэнэ.“Сагаан-Далиин” эдэбхитэй гэшүүн Солбон Будаев эндэмнай ехэ ажал ябуулна. Энэ найрташье Солбон Дмитриевич бүхы мүрысөөнүүдые үнгэргэжэ байна. Уг нютагһаа холо ерээдшье байгаа һаа, угайнгаа ёһо заншал сахижа ябадаг гэжэ захааминаархиниие тэмдэглэмээр байна. Мүнөө энэ командануудыешье харахада. Сэлеэн сэлеэнгээрээ командануудаа табяад, мүрысэжэ байна. Харин энэ КСЦ-гээ иимэ бэрхэ, урагшаа һанаатай зонтой хадаа 2017 ондо ашаглалгада тушаагдаха гэжэ найданабди, - гэжэ Ивалгын аймагай Депутадуудай соведэй түрүүлэгшэ Андрей Данчинов баяртайгаар мэдүүлээ.

Мүрысөөнүүд

Даамаар, ядро түлхилгөөр, гараараа тэмсээн, утые һүрэлгэ, аргамжа таталга, эстафетэ, барилдаан, волейбол гэһэн найман янзаар үнгэрөө. Үшөө хүүгэдэй дунда Лариса Ардаева шагай наада һонирхолтойгоор үнгэргөө.

Бүхы мүрысөөнүүдтэ долоон команданууд хабаадажа, Доодо-Ивалгын команда, капитаниинь - Чингис Хадаев, түрүү һуури эзэлээ. II һуурида Рустам Жаповай хүтэлбэрилһэн “Хойто тала: Мэлэ, Борто, Баянгол” (“Северный куст”) гаража шадаа. III һуури Солбон Ламажаповай “Сагаан-Дали” ТОС-ой команда абаа.Тиигээд лэ удаа дараалан IV һуурида - Бэлигто Дулмаевай “Шара-Азарга”, V һуурида - Саяна Бальжановагай “Далахай”, VI Максим Дымчиковэй – “Утаата”, Дэлгэр Батуевай "Ёнгорбой” һүүл дараа. Тиихэдэ баһа спонсорнууд тусхай шангуудые тогтооһон байна: “Эгээл хүхюу команда” гэжэ шан “Далахай” абаа. “Эгээл бүхэриг бэхи команда” шагналда “Утаата” хүртөө. “Түргэн бушуу” номинацида “Хойто тала” хүртэжэ баярлаа.

Командануудай капитанууд энэ найр үнгэргэлгэдэ туһаяа хүргэһэн бүхы зондо халуун баяраа мэдүүлээ. Эдэ хэд бэ гэбэл: Николай Ринчинов - Буряадай техникумэй захирал, Хойто-Бэеын хүбүүн (15000 түх.); Мэдэгма Раднаева - МБУК «Арюун Бэлиг» КИДЦ-гэй директор (5000 түх.); Алдар Норбоев – ахамад судья (3000 түх.); Солбон Будаев - эмхидхэгшэ (3000 түх.); Бато Мархаев –хубиин хэрэг эрхилэгшэ (2500 түх.); Гармажаб Дымбрынов - «Нижнеиволгинское» СП-гэй гулбаа (1000 түх.); Виктор Очиров -«Иволгинское» СП-гэй гулбаа (1000 түх.); Андрей Данчинов – Ивалгын аймагай Депутадуудай соведэй түрүүлэгшэ (1000 түх.); Елена Очирова - аймагай Соведэй депутат, “Хойто-Бэе” СК-гай захирал (1000 түх.); Алдар Гунзенов – эмшэ лама (1000 түх.).

Автор: Айсулу Мухамеджанова
Описание: Ямар найр барилдаангүйгөөр үнгэрэгшэб

Автор: Айсулу Мухамеджанова
Описание: Утые һүрэлгын мүрысөөнэй үедэ

Һанамжанууд

Найрай үедэ эндэ сугларһан эгээл аха захатанай нэгэн, 76-тай Владимр Доржиевтай хөөрэлдэбэбди.

- Би таниие үнинэй мэдэхэб. Наһан үндэр гээд, гэртээ һуунгүй, тамнай, хүндэтэ Владимир Дамдинович, элдэбын мүрысөөнүүдтэ ходо ябажа байдагта. Теэд эндэ тантай уулзашахаб гэжэ огто һанаагүйлби.

- Үхибүүднай эндэ, ниислэл хотодоо хүдэлдэг. Бинь хүгшэрөөшье һаа, тэдэнэйнгээ хүүгэдые харалсажа байналби даа. Мүнөө зунай амаралта эхилжэ, аша зээнэрээ абаад, нютагаа ошожо, сэбэр агаараар амилуулжа, хадын горхо оймуулжа, хүхэ ногоондо хүльбэрүүлжэ, бэе махабадын заһахал даа. Ерэхэ һуралсалай жэлдэ, сэсэрлигтээшье хан гэхэ ханяадагүйгөөр ябахыень оролдохолби даа.