​Нүхэсэдэг найзануудайнгаа хэлэ мэдэхэ шухала

"Эхэ хэлэн-манай баялиг” гэһэн наадамда ганса буряад угтай хүбүүд, басагад хабаадаагүй. Хабаадагшадай дунда мүн лэ ондоо яһанай үхибүүд оролсоо.

Сэлэнгын аймагай Гусиноозёрск хотын 6-дахи һургуулиин 7-дохи ангиин һурагша Кристина Покацкая тус хэмжээ ябуулгада дүрбэдэхиеэ ерээ.

- Эгээл түрүүшын наадамда би буряад хэлэн дээрэ үлгын дуу хангюурдааб. Тиихэдэ хэдэн һайхан буряад дуунуудые мэдэдэгби. Энээндээ ехэ баяртайб. Юуб гэхэдэ, суг хамта ан-бун ажаһуудаг буряад угсаатанай ёһо заншалыень, хэлыень мэдээд ябахада таатай, - гэжэ Кристина хэлээ һэн.

Кристина «Уран бэлигтэй, ульгам хэлэтэй» гэһэн урилдаанда нүхэдөөрөө «Бурелаш» гэһэн уран һайханай хүүгэдэй сэтгүүл зохёожо, нэгэтэ бэшэ харуулһан байна. “Нэгэ дахин бидэ ород хэлэн дээрэ “Ералаш” хараад, буряадаар оршуулаабди. Харин мүнөө бидэ өөһэдөө зохёогообди. Манай багша Альбина Николаевна Бадмаеватай хамта сэтгүүлэйнгээ ябаса, зосоохи шэнжыень һанаһан байнабди. Эндэ манай классай бүхы хүбүүд, тиихэдэ хэдыхэн лэ басагад дуратайгаар хабаадалсаа”, - гэжэ Кристина Покацкая һонирхолтойгоор хөөрөө.