853
Улаан-Үдын туберкулёз үбшэнгые һэргылэмжын диспансертэ Үхибүүдые хамгаалгын бүхэдэлхэйн үдэртэ зорюулагдаһан хэмжээ ябуулга үнгэрөө. Энэ эмнэлгын газарай үхибүүдэй таһагта аргалагдажа байһан үхибүүд уран һайханай наада дэлгэбэ. Халуун нэрьемэ альга ташалгаар үхибүүдэй элдэб һонин хатарнууд, дуунууд гүйсэдхэгдөө. Үхибүүд эндэ үбшэнһөө аргалагдажа, гурба һараһаа хахад жэлшье, зарим ушарта жэлээрээшье ажаһуудаг. Тиимэһээ үхибүүдые ганса һуралсалаар хангадаг бэшэ, мүн элдэб соёлой талаар хүмүүжүүлхые оролдодог.
Үхибүүдые һэргылхэ шухала
Үхибүүдые эмнэлгын таһагта мүнөө 30 үхибүүн аргалуулагдана. Таһагые даагша эмнэлгын эрдэмэй кандидат Лариса Амараевагай хэлэһээр, тэдэ үхибүүдэй 22-ынь гэртэхинһээ энэ хүшэр үбшэндэ халданхай, 8-иинь хаанаһааб даа, ондоо тээһээ халдаа бшуу.
- Мүнөө сагта хэдышье туберкулёз үбшэнтэнэй тоо үсөөрөө һаа, энэ үбшэнэй асуудал үшөөл ехэ орёо хүшэр, амин шухала шиидхэгдэхээр асуудал гээшэ. Мүнөөдэрэй эгээл аюултай юумэн гэхэдэ, олон тоото эмүүдтэ диилдэхэгүй туберкулёз үбшэн бии болонхой, уламжалан, үхибүүд тиимэ үбшэндэ нэрбэгдэдэг болоо, - гэжэ Лариса Владимировна тэмдэглэбэ.
Эмшэнэй тайлбарилгаар, туберкулёз үбшэн заабол социальна муу байдалда ороһон хүндэ хүрэдэггүй, харин агаараар дамжуулагдадаг хадань хүн гээшэ хаанашье ябахадаа, энэ үбшэндэ халдажа магад. Ехэнхи ушарта түрэлхид туберкулёз үбшэнтэй болоод байхадаа, халдабаритай гэжэ ойлгожол байгаад, үхибүүдээ халдахаадаг байна. Тиигэжэ үхибүүд түрэлхидэйнгөө хайша хэрэг хандалгаһаа нэрбэгдэжэ болоно. Хэрбэеэ нээмэл түхэлэй үбшэнтэнэй хажууда һуугаад, хахад часай туршада хаалтатай таһаг гү, али харгын унаа соо ябаа һаа, халдажа магад.
Нэгэ үхибүүнэй аба хаанаб даа холо газараар ябаад, флюорографи удаан сагай болзорто гараагүй байжа, туберкулёз үбшэнэй хүшэр түхэлөөр нэрбэгдэһэн байшоо, тиигэжэ нялха нарай үхибүүгээ халдахаагаа. Үшөө нэгэ үхибүүнэй гэртэ түрэлэй хүн ерээд, хэдэн хоногой туршада эмнэлгын шалгалта гараһан байгаа. Тиихэ үедөө бага үхибүүень баһал халдахаажархёо. Иимэ ушарнууд олон. Гэбэшье, үхибүүд мүн юрэ үйлсэдэшье, олон зоной субаһан газарһаа халдагдашаха ушарнууд бии. Тиимэһээ үхибүүдые энэ үбшэнһөө һэргылгэ гээшэ ганса эмшэдэй бэшэ, мүн гэртэхинэй, үбшэн хүнэй баһал уялга гээшэ. Иимэ үбшөөр үбдэнэб гэжэ мэдэбэшье, һэргылэмжэлэнгүй, хайша хэрэг хандалга баһал харюусалгатай байха ёһотой.
- Би түрэлхидтэ, томо зондо үхибүүдээ гамнагты гэжэ хэлэхэ байнаб. Хүнэй үхибүүд гэжэ байдаггүй. Үхибүүд булта хайратай ха юм. Үхибүүд үбдэнгүй, энхэ элүүр боложо, амжалтатай ябахыень хүсэнэб, - гэжэ Лариса Амараева мэдүүлбэ.
Энэ эмхиин эмшэд үбшэнтэниие аргалхын хажуугаар һургуули, колледж, университедүүдтэ ошожо, туберкулёз үбшэнһөө бэеэ яажа хамгаалхаб гэһэн һэргылэмжын, ойлгууламжын ажал ябуулдаг байна.
Оюна басаганай нигүүлэсхы ябадал
Оюна эдирхэн наһандаа туберкулёз үбшэндэ халдажа, бэеэ аргалуулжа эхилһэн юм. Теэд үбшэниинь ямаршье эмдэ диилдэхэ аргагүй түхэлэй байшоо. Хэдэн олон жэлнүүдэй туршада энэ үбшэнтэй тэмсэжэл ябаа бшуу. Тиигэһээр мүнөө май һарада алтан дэлхэйһээ халин, ондоо түрэлдөө бусаа. Таһаг соо нэгэ багахан саарһан хайрсаг хадагалаад байдаг һэн. Наһа бараһанайнь удаа тэрэнииень абаад харахадань, “Үхибүүдые туберкулёз үбшэнһөө абарая” гэжэ бэшээтэй, тэрээнь соо Оюна мүнгэ суглуулжа байгаа бшуу. Тэрэ хайрсаг руунь врачууд мүнгэ суглуулан нэмэжэ, үхибүүдэй таһагта дамжуулагдаба.
Оюна өөрөө колледждо һуража, финансист болохо хүсэлтэй һэн.
- Энэ хүшэр, ямаршье эмдэ диилдэхэгүй түхэлэй үбшэндэ нэрбэгдэһэнээ ойлгожо, эмшэдһээ энэ үбшэн тухай олон асуудалнуудые һуража, асуужа байдаг һэн. Гэбэшье һонорхон хадаа хуу ойлгожо байгаад, үхибүүдые яажа энэ үбшэнһөө аргалха гээшэб гэжэ һанаата болодог байгаа. Энэ хайрсаг июниин 1-эй үдэр туберкулёз үбшэнтэй үхибүүдые аргалха хэрэгтэ үгэхэ гэжэ һанаатай байбашье, хахад һараар үрдингүй ябашоо бшуу, - гэжэ томошуулай үбшэнгэй таһагые даагша Антонина Баясхаланова мэдээсэбэ.
Оюнын гэртэхин ерэжэ, тэрэ хайрсаг руу нэмэри оруулжа, мүн багахан үхибүүдтэ элдэб нааданхайнуудые асаржа бэлэглээ.
Автор: Цырегма Сампилова
Описание: Энэ хайрсаг соо Оюна мүнгэ суглуулдаг байгаа
Агын хүбүүд нигүүлэсхы ябуулга гаргаа
Ага нютагһаа зургаан хүбүүд өөһэдынгөө бүлөөрөө Улаан-Үдэ нүүжэ ерэһэн байна. Олзын хэрэг эрхилжэ, ажал ябуулжа эхилхэдээ, Улаан-Үдэдэ буянтай хэрэгээр харгыгаа эхилхэ гэжэ шиидэбэ. Энэ туберкулёз үбшэнһөө һэргылэмжын диспансертэ хандажа, ямар туһа хэрэгтэйб гэжэ мэдээд, аяар 6 томо гэгшын 81 см хэмжээнэй, шэнэ түхэлэй JK- телевизор бэлэг бариба.
- Туберкулёз үбшэнөөр тэдэнэй хэнииншье үбдөөгүй, харин талаһаа ерээд, туһалхамнай гэжэ байхадань, ехэл һайшаалтай. Тэдэ хүбүүд хүүгэдэй наададаг таһагай хана үнгэтэ зурагаар шэмэглэхэ гэжэ дурадхаа, - гэжэ Антонина Цымжиевна хөөрэнэ.
Агын эдэ хүбүүд үе болоод лэ, энэ диспансерэй үхибүүдэй таһагта туһаламжа олгуулжа байхаяа мэдүүлбэ. Тиигэжэ хүбүүд телевизорнүүдые урда үдэрынь асаржа бэлэглээд, найр нааданда ёһолуулхаяа аягүйрхэжэ, нэрэ обогоошье ехээр мэдүүлхэеэ һанаагүй. Сэхыень хэлэхэдэ, нигүүлэсхы хэрэг үйлэдэһэн зон хараада табингүй, аргаахан туһа олгуулхада, ёһотойл буян болонол хаш.
Эмүүдтэ диилдэдэггүй туберкулёз тухай
Туберкулёз үбшэн мүнөө сагта хэдэн түхэлэй боложол байдаг. Һүүлэй үедэ бүхы эмүүдтэ диилдэхэгүй түхэлэй үбшэн ехэ дэлгэржэ байна. Туберкулёзой микобактеринүүд туберкулёз аргалдаг бүхы эмүүдтэ дадажа, өөрын генотип һэлгэгдэнэ.
- Үбшэнтэн удаан сагай болзорто аргада орожо байхадань, тэдэ эмүүд бэе махабадта нэмэлтэ хорото үйлэ хэнэ ха юм даа. Тиигэжэ үбшэнтэн аргаяа таһалжа, эмнэлгын газарһаа гаража ябашана. Тэрэ үедэнь үбшэниинь аргалагдажа байһан эмдээ дадашана. Нэгэ үбшэн хүниие нэгэ курс арга хэлгэдэ 1 миллион түхэриг гаргашалагдана, харин олон эмүүдтэ диилдэхэгүй үбшэндэ үшөө ехэ мүнгэн, шухала анхарал хэрэгтэй бшуу ,- гэжэ Антонина Цымжиевна мэдээсэбэ.
Эдэ үбшэнтэниие аргалгада мүнгэн зөөри дуталдана. Тиимэһээ үбшэнтэниие дэмжэлгын мүнгэн зөөри суглуулгын акци туберкулёз үбшэнһөө һэргылэмжын Буряадай диспансер эмхидхэнэ. Туберкулёз үбшэнтэндэ олониитын анхарал хэрэгтэй. Нигүүлэсхы ябадал гээшэ хүнэй үбшэ ойлгожо, хүнэй зоболон хубаалдажа шадалга гээшэ.
Энэ тоосоогоор мүнгэн туһаламжа олгуулжа болоно:
РОО "Против туберкулеза: БЕЛАЯ РОМАШКА"
ИНН 0326041690 КПП 032601001
р/сч. 40703810500000000523
к/сч. 30101810200000000736
БИК 048142736
ОАО АК "БАЙКАЛБАНК"
Автор: Цырегма САМПИЛОВА
