​Оршон байгаалияа хамгаалая

Н.А.Семашкын нэрэмжэтэ клиническэ больницын залуу мэргэжэлтэдэй Совет Гремячинск тосхон шадар ошожо, нобшо ноохойһоо Байгал далайн эрье арилгаба.

Энэ Соведэй бүридэлдэ больницын элдэб һалбаринуудай мэргэжэлтэд ородог. Эдэ хэд бэ гэхэдэ, залуу мэргэжэлтэдэй Соведэй түрүүлэгшэ, реанимациин болон интенсивнэ терапиин таһагые даагша Михаил Итыгилов, элшын диагностикын врач Аюна Ябжанова, иммунологиин лабораториин врач Ольга Залтанова, түргэн туһаламжын кардиологиин врач Александр Тумуров, нюдэнэй микрохирургиин таһагай врач Оксана Сверкунова, приёмно-диагностическа түбэй администратор Дарья Платонова, мэдээсэлэй хэрэгсэлнүүдэй таһагай инженер Евгений Чипизубов болон маркетингын таһагай ниитын холбоо харилсаанай мэргэжэлтэн Татьяна Алексеева гэгшэд.

- Өөһэдынгөө жэшээгээр бидэ оршон тойронхи байгаали бузарлагдажа байна гэжэ нютагайхидайнгаа, суг хамта ажаһуудаг зонойнгоо анхарал татахаяа һананабди. Байгал далай шадархи дэбисхэр дээрэ арюун сэбэр байдал зохёохо хэрэгтэ өөрынгөө хубитаяа оруулха арга боломжо хүн бүхэндэ олгогдоно, тиигэжэ ганса өөртөө бэшэ, мүн бүхы арад зондо аша туһатай үйлэ хэхэ аргатай байһандаа, бидэ баяртайбди, - гэжэ залуу мэргэжэлтэд хөөрэнэ.

Суглуулагдаһан нобшын ехэнхи хубинь шэл болон пластик амһарта, тамхинай, консервын хайрсагууд, шэлэй тэһэрхэй хэлтэрхэйнүүд олон. Энэнь хадаа хүн зоной зорюута хаяһан нобшо ха юм даа. Мүн суглуулагдаһан нобшо ноохой саг соогоо абаашагдадаггүй байна. Суглуулагдаһан нобшо удаан сагта хэбтээд, дахин тарашана ха юм даа.

Юрын нобшо суглуулжа ябагшадта орходоо, эмшэд оршон тойронхи байдалда тараһан нобшо ноохой хүнэй ажаһуудалда ямар муу нүлөө үгэнэб, оршон тойронхи бузарлагдаһан байгаали хүнэй бэе махабадта агаараар, уһаар, нобшо дээрэ ургаһан ургамалай эдеэгээр дамжуулагдажа, хорото үйлэ хэнэ гэжэ мэдэнэ ха юм даа.

- Газарай хүрьһэн руу ороһон химическэ бодосонууд сугларжа, амиды юумэнэй болон химическэ байдал һэлгүүлжэ, газарай үрэжэл муудхаана. Хүрьһэ руу бузарлагдаһан бодосонуудтай суг хамта үбшэн бактери, гельминтын үтэн болон хорото үйлэтэй бусад зүйл ороно. Байгаалиин хохидоходо, хүн хохидонгүй байдаггүй, заабол хүн байгаали хоёр холбоотой, - гэжэ иммунологиин лабораториин врач Ольга Залтанова тайлбарилба.

Ажаһуудалай нобшо ноохойнууд хүнэй бэе махабадта ямар муу нүлөө үгэнэб, үхибүүдтээ ямар ерээдүйе үлээхэеэ байһанаа хүн зон бодомжолхол ёһотойл даа. Байгалай ерээдүйн түлөө Буряад орондо ажаһуугшад харюусалгатай ха юм гэжэ залуу эмшэд мэдүүлнэ.

- Хүн бүхэн өөртөө нобшо хэхэ пакедтэй, нобшо бариха бээлэйтэй ябахыетнай хүн бүхэндэ хандаха гэжэ шиидээбди. Хаанашье ябахадаа, байгаалиин нобшо суглуулха заншалтай болоходо, һайн үрэ дүн үгэхэ бшуу,- гэжэ нюдэнэй микрохирургиин таһагай врач Оксана Сверкунова дурадхаба.

Экологиин рейдэдэ гараха саг соогоо клиническэ больницын залуу мэргэжэлтэд Байгал шадархи дэбисхэрэй 300 метр талмайда 15 мэшээг нобшо суглуулаа. Тиигэжэ эрьеын ехэхэн хубиие ариг сэбэр болгоо бшуу. Нобшо ноохой татахадаа, эндэхи газарта бэшэ, харин өөртөө, өөрынгөө үри хүүгэдтэ, Эхэ байгаалида хоро үйлэдэжэ байһанаа мэдэрхэ шухала.

Анхарагты, мэдээсэл!

Хэды сагай болзорто нобшо өөрөө элэжэ, үгы болодог хаб, мэдэнэ гүт?

Газетэ, саарһан – 1-3 һара соо.

Картонно хайрсагууд – 3 һара соо.

Консервын банканууд – 10 жэл соо.

Түмэрэй зүйлнүүд – 10- 20 жэл соо.

Электробатарейнүүд – 110 жэл соо.

Пластик амһарта – 180 – 200 жэл соо.

Алюмин банка – 500 жэл соо.

Шэл - 1000 жэл соо. Нэмэжэ хэлэхэдэ, шэл нэгэ хэды саг соо наранай элшэ доро байхадаа, дороо байһан ногоо, саарһанда гал носоожо, түймэрэй һүйд татадаг гэжэ мэдээжэ.