​Хүүгэдээ аршалая

Һүүлэй үедэ үншэн үхибүүдые үргэжэ абаха ушарнууд олошороо. Тиигэбэшье хүндүүлхэй асуудалнууд үлэһөөрөө. Энээн тухай Буряад Уласай Засагай газарта болоһон «түхэреэн шэрээдэ» хөөрэлдөөн болобо.

Буряад Уласта мүнөө үедэ 5 мянга гаран үхибүүд үргэмэл ба харууһалалгын бүлэнүүдтэ хүмүүжэжэ байна. Тиигэбэшье тэдэниие гэдэргэнь социальна хамгаалгын эмхи зургаан руу бусааха ябадалнууд ушарна. Тиин ганса 2015 ондо үншэн хүүгэдэй гэр руу зуу гаран хүүгэд бусаһан байна. Энээниие яажа усадхахаб гэжэ «түхэреэн шэрээдэ» хабаадагшадай гол асуудал байба.

- Һүүлэй жэлнүүдтэ үншэн үхибүүдэй тоо 43% үсөөн болоо, энэмнай 400 үхибүүд болоно. Энээниие бидэ саашань үргэлжэлүүлхэ ёһотойбди. Тэрэнэй түлөө ямар хэмжээ ябуулганууд хэрэгтэйб, – гэжэ Социальна политикын хорооной түрүүлэгшэ Александр Стопичев хэлэбэ.

«Түхэреэн шэрээдэ» хабаадагшадай һанамжаар тон түрүүн үхибүүдые үргэжэ абахын тула гэртэхин өөһэдөө сэдьхэлээрээ бэлэн болонхой байха ёһотой. Тусхай һургуулинуудта һураха, психологуудтай хайшан гэжэ үхибүүдээр зугаалхаб, үгэеэ ойлголсохоб гэхэ мэтээр хөөрэлдэхэ, хэлсэхэ болоно. Мүнөө Буряад орондо 22 һургуулинууд, 23 психологическа хүмүүжүүлгын түбүүд хүдэлнэ. Мүн тэрэнэй хажуугаар социальна хамгаалгын харгалзалгын таһагуудта мэргэжэлтэд ехээр дутана.

- Манай аймагта 97 үргэмэл бүлэдэ 207 үхибүүн хүмүүжэнэ. Теэд энэ олон хүүгэдээр аймагтамнай хоёрхон лэ мэргэжэлтэд хүдэлнэ, – гэжэ Мухар-Шэбэрэй аймагай толгойлогшо Владимир Молчанов мэдүүлнэ. Мүн үргэмэл гэр бүлэнүүдтэ мүнгэнэй талаар туһаламжа хүргэхэ. Мүнөө нэгэ үхибүүндэ 4200 түхэриг һомологдоно. Тиихэдэ «Светлый» гэһэн реабилитационно түбэй дэргэдэ кризиснэ түб нээхэ тухай хэлсэбэ. Эндэ иимэ гэр бүлэнүүд дүй дүршэлнүүдээрээ, хүндүүлхэй асуудалнуудаараа бэе бэетэеэ хубаалдаха аргатай байха ёһотой. «Түхэреэн шэрээн» дүн гэхэдэ, Буряад Уласай Засагай газарта, Буряад Уласай Арадай Хуралда, нютагай засагай эмхи зургаануудта зууршалгануудаа ябуулха гэһэн шиидхэбэри абаһан байна.