​Олониитын танхимай гэшүүд түрүүлэгшэеэ һунгаба

"Алтарганын” үмэнэ Буряад Уласай шэнээр һунгагдаһан II зарлалай Олониитын танхимай түрүүшын хуралдаан үнгэрөө. Шэнэ зарлалай Олониитын танхимай бүридэлдэ элдэб мэргэжэлтэй, шажан мүргэлтэй, һанаа бодолтой гэшүүд ороно. Тиигэбэшье, бүхы арга шадалаа түрэл республикынгаа хүгжэлтэдэ, арад зонойнгоо зол жаргалтай ажайбайдалда зорюулха гэһэн эрмэлзэл эдэ зониие нэгэдүүлнэ.

- Багшанар, элүүрые хамгаалагшад, олзын хэрэг эрхилэгшэд, дүршэл ехэтэй бэрхэ хүтэлбэрилэгшэд Олониитын танхимай шэнэ зарлалда ороһониинь һайн, - гэжэ Буряадай Толгойлогшо Вячеслав Наговицын тэмдэглэбэ. – Тиимэһээ ямаршье асуудал хаража, бэелүүлхэ аргатай байха. Тиигэбэшье, түрүүшын зарлалай гэшүүд ажалаа эхилхэдээ, даншье һаа ехэ харюусалга өөр дээрэ абажа, ажабайдалда бэелүүлэгдэхэгүй шиидхэбэринүүдые абаа һэн. Энээниие хараадаа абажа, социальна хүшэр байдалые яажа дабахаб гэжэ гол түлэб ажалаа ябуулха хэрэгтэй. Тиихэдээ аймагуудаар ябажа, зонтоёо уулзажа, суглаа хуралнуудые үнгэргэжэ байхыень Вячеслав Наговицын уряалаа. Харин засагай зүгһөө Олониитын танхимай һанамжа дурадхалнуудые хүндэтэй дээрэ тооложо, али бүхы арга шадалаар бэелүүлхые оролдохо гэжэ Уласай Толгойлогшо найдуулаа. Буряад оронойнгоо арад зоной ажабайдалые һайжаруулхын түлөө засаг зургаан олониитэ хоёр эб хамта оролдохо гэжэ найдажа байһанаа мэдүүлээ.

Буряад Уласай Арадай Хуралай Түрүүлэгшын орлогшо Вячеслав Ирильдеев:

- Олониитын танхим засаг зургаанай ажалые хаража сэгнэхэ ехэ үүргэ даана, - гэжэ онсолон тэмдэглээ. Тиимэһээ хуули гаргалгын ажалда баһал хам оролсохыень уряалаа.

Буряад Уласай Олониитын танхимай түрүүлэгшын үндэр тушаалда гурбан хүн дэбжүүлэгдээ: Республикын Правительствын Түрүүлэгшын орлогшоор хүдэлһэн, мүнөө Буряадайнгаа фермернүүдые залан хүтэлбэрилдэг олониитын ехэ ажал ябуулагша Баир Бальжиров, Олониитын Арадай фронтын региональна штабай түрүүлэгшэнэрэй нэгэн Сажида Баталова болон “Россиин машина бүтээгшэдэй союзай” түлөөлэгшэ Владимир Яковлев. Тиигэбэшье эдэ гурбанай дунда “тулалдаан” болобогүй. Олоной хүлеэгдөөгүйгөөр Сажида Баталова Владимир Яковлев хоёр өөһэдынгөө һайн дураар һунгалтаһаа болёо. Тиигэжэ нюусаар дуугаа үгэлгын дүнгөөр (31 хүн “заа” гээ, 8 хүн арсаа) Баир Бальжиров түрүүлэгшээр һунгагдаа.

Түрүүлэгшын орлогшонорые һунгахада, олоной дуугаар нэгэдэхи орлогшоор Валерий Яковлев һунгагдаа. Хоёр орлогшонуудаар Сажида Баталова болон Буряадай арадуудай заншалта наадануудай Федерациие толгойлогшо Юрий Балханов һунгагдаа.

Энэ хуралдаандаа комиссинуудай түрүүлэгшэнэрые һунгаха хэлсээтэй аад, анхан ажалша бүлгэмүүдые байгуулаад, бүхы комиссинуудай хэхэ ажалые дэлгэрэнгыгээр хаража үзөөд, энэ асуудалдаа дахин бусажа, удаадахи долоон хоногто һунгаха гэжэ шиидээ.

Олониитын танхимай шэнэ түрүүлэгшэ Баир Бальжиров:

- Нэн түрүүн бидэ Олониитын танхимай ажал ябуулгые хараалжа, эндэ һунгагдажа хүдэлхэеэ ерэһэн хүн бүхэнэй арга шадалые зүбөөр хэрэглэхые оролдохобди. Тиихэдээ комисси бүхэндэ арга шадалаарнь, талаан бэлигээрнь, дүй дүршэлөөрнь хүн бүхэниие зүбөөр тааруулха гэнэбди. Тиигэжэл энэ хуралдаагаа хоёр ээлжээтэй болгобобди, - гэжэ манда ойлгуулаа.

- Мүнөө командадамнай засаг зургаануудта хүдэлжэ ябаһан дүй дүршэлтэй зон олон байна. Тиимэһээ энэ зарлалай Олониитын танхимай ажаябуулга үрэ дүнтэй байха гэжэ ехэ найдалтайб, - гэжэ Баир Бальжиров “Буряад үнэнэйнгөө” уншагшадтай һаналаараа хубаалдана.

Шударгы ажал хэрэгээрнь Баир Гвибаловичые мэдэхэ хадаа, эдэ хүсэлнүүдынь бэелүүлэгдэхэ гэжэ найданабди. Тэрэнэй эсэгэ Гвибал Зоригтуевич олон зониие һургаһан, түрэл буряад арадайнгаа заншалаар хүмүүжүүлһэн ехэ габьяатай ха юм. Баир хүбүүниинь урма баяртайгаар, урагшаа һанаатайгаар түрэл арадайнгаа түлөө ябаг лэ даа, урма баяртайгаар!