​Владимир Сагановай дурасхаалда

Буряад Уласай Түнхэнэй аймагай Харбяангууд нютагта июлиин 16-да Буряадай ССР-эй Правительствын Түрүүлэгшэ ябаһан Владимир Бизьяевич Сагановай түрэһөөр 80 жэлэй ой үргэн дэлисэтэйгээр тэмдэглэгдэбэ.

Баярай хэмжээ ябуулганууд үглөөнэй 10 сагта энэ нютагта оршодог В.Б.Сагановай нэрэмжэтэ музейдэ эхилһэн байна. Буряад арадай уран зохёолшо Ардан Лопсонович Ангархаевай бэшэжэ гаргаһан «Улас түрын, эдэй засагай хубилалтанууд: үндэһэтэнэй ба хубиин зүйлнүүд. В.Саганов: хэһэн хэрэгүүдынь, бэелүүлэгдээгүй түсэбүүдынь» гэһэн гаршагтай номтой танилсалга болоһон байна. Буряад Республикын Арадай Хуралай Түрүүлэгшэ Цырен-Даши Эрдынеевич Доржиев, Арадай Хуралай депутат Баир Дашиевич Цыренов бэлигтэй буряад хүтэлбэрилэгшын дурасхаалда зорюулагдаһан һайндэртэ хабаадаа.

Харбяангууд нютагай олониитэ, Улаан-Үдэ хотоһоо зорюута Владимир Бизьяевич Сагановай дурасхаал мүнхэлхэеэ ошоһон зон бэеын тамирай наадануудта хабаадаа, хараха зониинь хараа.

Түнхэнэй аймагай аман зохёолой бүлгэмүүд дуу, хатараа дэлгэжэ, хүн зоноо урмашуулангаа, бэе бэетэеэ мүрысэбэ.

Гиирь үргэлгөөр В.Б.Сагановай нэрэмжэтэ түрүүшын мүрысөөн үндэр хэмжээн дээрэ боложо үнгэрөө. Саашадаа иимэ мүрысөөн жэл бүри эмхидхэгдэдэг болохо юм ха. Энэ мүрысөөнэй абарга болоһон Туран нютагай захиргаанай дарга Владимир Хармакшанов хун сагаан хони шүүбэ.

Гэхэ зуура эгээл энэ үедэ номо һаадагтан сур харбажа, эрхимүүдээ элирүүлбэ. Бүхэ барилдаашад ана-мана тулалдажа, нюргаяа шоройдуулаагүй абаргануудай нэрэнүүд тодороо. Үдэшэ болоходонь, буряад дуушад дуунуудаа хангюурдажа, Харбяангуудай харагшадые хужарлуулба. Залуушуул дискотекэдэ ошожо, сэнгэһэн байха юм.