​Һуралсалай жэлдэ бэлэдхэл

Зунай ааяма саг юрэнхы һуралсалай гуламтануудта эгээл халуун хаһа гээшэ. Юуб гэхэдэ, эгээл энэ үедэ һургуулинууд заһабарилагдана, һэльбэн шэнэлэгдэнэ. Мүнөө сагта республикымнай бүхы һургуулинуудые һуралсалай шэнэ жэлдэ тушаан абалга аймаг бүхэнэй Эрдэм һуралсалай таһагууд хэжэ байнхай.

Кабанскын аймагай Сухая һууринда һургуулиин шэнэ байшан оройдоол хэдэн жэлэй саада тээ ашаглалда тушаагдаһан юм. Хэды тиигэбэшье, эндэ заһабарилгын хэгдэхэ ажал яһала ехэ байна.

- Манай һургуули хэды шэнэшье һаа, заһабарилха юумэниинь ехэ. Ушар гэхэдэ, муу шанартайгаар барилгын ажал ябуулагдаһан байна. Техническэ талаар ехэнхи ажал буруу хэгдээ. Энээниие усадхахын түлөө нэгэ жэл хүрэхэгүй, - гэжэ һургуулиин директор Василий Шарапов хөөрэнэ. – Сонхонууднай хэды евро түхэлэй байбашье, дулаа һайнаар баридаггүй. Юуб гэхэдэ, сонхын хажуудахи талануудта дутуу хирпиисэ табигдаа. Мүн тиихэдэ дулаасуулгын соргонууд техническэ хэрэгсэлнүүдэй эрилтэнүүдтэ хүрэнэгүй.

Василий Шараповай хэлэһээр, Кабанскын аймагай захиргаан анха түрүүшынхиеэ һургуулинуудта заһабарилга хэхын түлөө мүнгэ һомолбо гээшэ. Урда жэлнүүдтэ захиргаан энэ асуудал хараадаа абадаггүй байгаа. Һүүлэй байдалаар Сухая һууринай дунда һургуулида 43 мянган түхэриг үгтэхэ болоо.

- Энэ ехэ һайн гээшэ. Юуб гэхэдэ, энэ мүнгэндөө шэрэ, извёстко абаха аргатайбди. Шэрдэлгын болон сагаадалгын хэрэгтэ энэ мүнгэн хүрэхэ, - гээд Василий Шарапов хөөрөөгөө үргэлжэлүүлнэ.

Сухая һууринай дунда һургуулиин дэргэдэ өөрын котельнэ хүдэлдэг юм. Тэрээн соо оройдоол нэгэ дулаасуулгын котёл хүдэлнэ. Харин тэрэнь хоёр байха ёһотой.

- Энэ ушараар аймагай захиргаантай хөөрэлдэжэ байнабди. Юуб гэхэдэ, котельнэ соохи хоёрдохи котёл хадаа эбдэрээ, тэрэниие заһабарилха хэрэгтэй. Энэ ажал бүтээхэ

гэхэдээ, мүнгэн байхагүй. Үбэлэй янгинама хүйтэндэ тэрэ нэгэ котёлнай хүрэшөө һаа, һургуулимнай хүлдэшэхэ, бүхы дулаасуулгын соргонууд тэһэ хүрэшэхэ. Энэ эгээл аймшагтай ушар болоодхихо. Тиимэһээ аймагай захиргаан маанадта туһалха бэзэ гээд найданабди, - гэжэ Василий Шарапов орёо байдалтаяа танилсуулна.

Һургуулиин байшанай баригдаһанай һүүлээр һуралсалай гуламтын газаа нэгэшье ургамал ургадаггүй байгаа. Василий Шараповай ашаар һургуулиин газаа һайн үрэжэлтэй газар асарагдажа, элдэб модод һуулгагдаа. Мүнөө үедэ тэдэнь хүн зоной нюдэ баярлуулна.

Һүүлэй байдалаар Сухая һууринай һургуулида 110 үхибүүн һурана. Эндэ ганса тус һууринай үхибүүд бэшэ, мүн хажуудахи хэдэн бага тосхоной хүүгэд эрдэмэй орьёл

өөдэ шармайна.