​Холын нютагууд Интернет орохо аргатай болохо

Үнгэрһэн долоон хоногто Буряад Уласай Транспортын, энергетикын болон харгын ажахын хүгжэлтын яаман Tele2 компанитай суг хамта нягта харилсаа холбоотойгоор хүдэлхэ тухай хэлсээ баталба. Тус данса доро сайд Сергей Козлов болон Москва хотоһоо ерэһэн захирал Дмитрий Лопатухин гараа табиба.

Сайд Сергей Козловой хэлэһээр, аймагуудар ябахада, гар утаһаар харилсаанай холбоо, Интернедэй ябаса олон хүн зоной һанаа зобооно. Энэ орёо асуудалые шиидхэхын тула хэлсээн баталагдаа.

Буряад Уласай Засагай газарай энэ асуудалые шиидхэхэдэ, Tele2 туһалха юм. Тус хэрэгтэ тэдэ 500 сая гаран түхэриг дамжуулхаар бэлэн байһанаа мэдүүлээ. Хэлсээн 2020 он болотор бэелүүлэгдэхэ юм.

- 2016 ондо бидэ телекоммуникационно ажал ябуулгада 200 гаран сая түхэриг дамжуулаад байнабди. Энээнэй ехэнхи мүнгэн гар утаһаар хөөрэлдэжэ шадахагүй газарнуудта томо станцинуудые табилгада үгтөө, - гээд Дмитрий Лопатухин мэдүүлбэ.

2015 ондо Tele2 манай Буряад Уласта ерээ бэлэй гээд һануулая. Октябрь соо тэдэ түргэн Интернет ябуулха 3G бии болгоо.