​Ажалай һайн мэргэжэлтэй болохо

Эдэ үдэрнүүдтэ юрэнхы дунда һургуули дүүргэжэ, тусхай дунда һургуулинуудта һурахаяа хүсэһэн, энэ-тэрэ тусхай дунда һургуулинуудта саарһа дансаяа тушааһан һурагшад хүлгөөтэй. Мүнөөл тэдэнэй саашанхи хуби заяан шиидхэгдэжэ байна ха юм.

Гүрэнэй тогтомол ЕГЭ шалгалтануудые һайнаар тушааха гээшэмнай хэлсээнэй болонхой. Энэ шалгалтануудһаа һүрдэн айха багшанаршье, шабинаршье бии. Тиимэһээ юрэнхы эрдэм абаад лэ, саашадаа ажалай һайн мэргэжэл абахаяа эдиршүүлшье, тэдэнэй түрэлхидшье оролдоно.

Нээрээшье, мүнөө хараад үзэхэдэ, хэды ехэ мүнгэ санга гаргашалжа, гасалантай масалантайгаар дээдэ һургуули дүүргээд, ажал олохо гээшэ хэсүү гэжэ мэдээжэ. Дээдэ һургуулиин улаан, ногооншье дипломтой хэды бэрхэ хүбүүд, басагад ресторан, бар, кафенүүд соогуур фартук зүүгээд, баяшуулай урда дохилзожо ябанаб! Хэды бэрхэ басагаднай уйтан муу бутигууд соо эд бараа худалдаа боложо, мүнгэ сангатай зоной урда хойноһоон шарайшалнаб?

Иигээд байхада, юһэн классынь дүүргүүлээд лэ, һайнаар һургажа, ажалтай, арьбантай болгохо гэжэ олонхи түрэлхидэй эрид шиидэнхэй байһаниинь мүнөө харагдана. Мүн эдиршүүл өөһэдөөшье энэ ушарые һайн ойлгоно гэжэ августын 16-да Буряадай Уласай индустриальна техникумдэ (БРИТ) үнгэргэгдэһэн суглаанда байлсаһан манай сурбалжалагша мэдээсэнэ.

Эндэ сугларһан ерээдүйнгөө шабинарай, тэдэнэй түрэлхидэй урда БРИТ-эй багша, захиралай орлогшо Ирина Валерьевна Халтурина бүхы ушар байдалые хөөрэжэ, һанаа зобоһон түрэлхидэй олон тоото асуудалнуудта харюусаба.

БРИТ гэһэн тусхай дунда һургуули олон һалбаритай юм байна. Буряад орон соогоо мэдээжэ энэ тусхай һургуули олон талаар мэргэжэлтэдые: хүдөө ажахыдашье хэрэгтэй, түмэр замай мэргэжэлтэдые бэлдэдэг юм байна. Түрэлхидые болон ерээдүйнгөө шабинарые суглуулһан таһаг соонь галта түмэр моридой ябуулгые ударидаха, жолоодохо мэргэжэлтэд юу мэдэхэ ёһотойб гэһэн угаашье ехэ, бүришье орёо оньһотой схемэ картанууд байжа, нилээн зониие сошоогоо.

- Мэдэхэгүй таанадта дэн орёогоор харагдаа бэзэ, хоёр-гурбахан жэл соо эдиршүүл манда һурахадаа, һамар сэмэһэндэл сээжэ болодог, - гэжэ түрэлхидэй һанаа амаруулаа. Теэдшье энэмнай эгээл орёо, хүндэ һуралсалай класста ороод һууналта даа гэжэ ойлгуулаа.

- Ай Богдо, юуншье ехэ, шанга һургуулида үхибүүгээ оруулжархибибди даа, - гэжэ һанаа зобоһон түрэлхид нэгэ заа һанаагаа амарбашье, шангахан лэ һургуулида оруулаа юм байнабди гэжэ ойлгоходоо, баярлаадшье абаа. Мүнөө сагта һайн мэргэжэлтэй хүн һайн ажалтайшье, үндэр салинтайшье омогорхожо ябаха ха юм! Үшөө һайниинь гэхэдэ, энэ һуралсалай түб өөрын хамтын байратай. Шабинараа миинтээр хооллуулдаг. Һургуулидань асаржа буулгадаг – үшөө юун хэрэгтэйб даа.

Тиихэдээ хүн бүхэн өөрынгөө дураар тамирай хэшээлнүүдһээ гадна тамирай, физическэ соёлой талаар бүхы зүйлнүүдээр бэеэ һорихо аргатай. Багша-һоригшонорыншье гэжэ хуу дээдэ гарай мэргэжэлтэд. Ганса Эрдэни Кимович Доржиевай хэды олон шабинар Буряадтаа мэдээжэ гээшэб! Тус һуралсалай гуламтын хурдан хүбүүд, басагадай команда жэл бүри үнгэрдэг манай “Буряад үнэн” сониной хүнгэн атлетикээр эстафетэдэ габшагай хабаадажа, заал һаа түрүү һуури эзэлдэг заншалтай.

Хүдөөһөө ерэһэн эдиршүүл эндэ һайн эрдэм мэдэсэ абахаһаа гадна, бэе махабадаа хатуужуулха гээд найдая. Амжалта хүсэе!