1034
Һуралсалай шэнэ жэлэй эхиндэ заншалта ёһоороо Августын хуралдаанай гол хэмжээн – пленарна зүблөөн Буряадай Гүрэнэй оперо болон баледэй театр соо үнгэрбэ.
Эндэ Буряад Уласай Толгойлогшо, Арадай Хуралай Түрүүлэгшэ болон Оросой гүрэнэй эрдэм һуралсалай яаманай түлөөлэгшэд хабаадаа.
Буряад Уласай Һуралсалай болон эрдэм ухаанай яаманай орлогшо сайд Баир Жалсанов зүблөөнэй ёһолол нээгээ. Улаан-Үдын кадедүүдэй һургуулиин эдир артистнар барабан дээрэ хүгжэм зэдэлүүлэн, гоё һайхан дуу гүйсэдхэбэд.
Буряад Уласай Толгойлогшо Вячеслав Наговицын зүблөөндэ хабаадагшадые һуралсалай шэнэ жэлээр амаршалаад, мүнөө үе саг болотор Буряад Улас дотор эрдэм һуралсалай һалбарида туйлаһан амжалта, шиидхэгдэхэ асуудалнууд тухай мэдээсэбэ.
Һүүлэй хэдэн жэлэй туршада эрдэм һуралсалай шэглэлдэ шэнэ томо хубилалта, һэлгэлтэнүүд үнгэргэгдэжэ, эрдэм һуралсалай байдал ехэ һайжаруулагдаа. Орос Гүрэнэй Юрэнхылэгшэ Владимир Путинай тогтоол бэелүүлгын шугамаар, 3 жэлэй туршада Буряад орон дотор 24 мянган шэнэ нэмэлтэ һууринууд хүүгэдэй сэсэрлигүүдтэ байгуулагдаа. Гэбэшье, һүүлэй үедэ үхибүүдэй тоо олошоржо, энэ асуудал үшөөл хүсэд шиидхэгдэнэгүй, зүгөөр анхарал һуладанагүй.
- Һурагшадай тоо олошорно. 2016-2017 оной һуралсалай жэлдэ бүхыдөө 136 мянга 847 үхибүүд һургуулида һураха. Энэ тоо баримта нёдондонойхиһоо 5 процентээр дээшэлэнхэй. Нэгэдэхи классуудта 16500 үхибүүд орохо юм. Мүн Владимир Путинай баталһан зарлигаар, һургуулинууд нэгэ халаанда һураха ёһотой. Харин мүнөө сагта манай бүхы һургуулинууд энэ даабари бэелүүлжэ шадахагүй байна. Зүгөөр 2016-2025 онуудта хараалагдаһан Федеральна Зорилгото Программаар манай Буряад орондо 165 һургаали шэнээр баригдажа, һэльбэн шэнэлэгдэжэ, 25 мянган нэмэлтэ һууринууд дунда һургуулинуудта байгуулагдаха ёһотой.
Вячеслав Наговицын эрдэм һуралсалай шэглэлээр олон шиидхэгдэхэ асуудалнуудые, туйлаһан амжалтанууд тухай тэмдэглээ. Үшөө нэгэ мүнөө сагта амин шухала асуудал, буряад хэлэ шудалалга тухай онсологдоо.
Толгойлогшын хэлэһээр, Буряад Улас доторхи хоёрдохи гүрэнэй хэлэ шудалалгын асуудал шиидхэгдэжэл байна. Мүнөө сагта бүхы һургуулинуудай 90 хубинь булта буряад хэлэ шудалдаг болоо, харин 10 процент ушарта багшын дуталдаһан болон буряад хэлэ шудалха байдал зохёогдоогүй шалтагһаа бэелүүлэгдэнэгүй.
- Эрдэм һуралсалай яаман эдэ һургуулинуудай захиралтай суг хамта энэ асуудал һуралсалай жэлдэ шиидхэхэ болоно. Тиигэжэ бүхы һургуулинуудта буряад хэлэ бултадаа шудалха ёһотой.
Буряад Уласай Арадай Хуралай Түрүүлэгшэ Цырен-Даши Доржиев бүгэдэниие һуралсалай шэнэ жэлээр амаршалаад, саашанхи ажал хэрэгтэнь амжалтануудые хүсэбэ.
Цырен-Даши Эрдынеевич мүнөө үеын эрдэм һуралсалай шиидхэгдэжэ байһан, шиидхэгдэхээр асуудалнууд дээрэ тодорхойгоор тогтобо.
- Мүнөө сагта ниигэм, гүрэн һайн эрдэм мэдэсэтэй багшанарые бэлдэхэ, тэдээндэ һайн салин хүлһэ үгэхэ тухай асуудалнуудые шиидхэхэл ёһотой. Зүгөөр багшанар өөһэдынгөө талаһаа үхибүүдые һайн шанартай һуралсалаар хангаха шухала. Эрдэм һуралсалай шанар һурагшадые үшөө ехэ даабаряар дараха бэшэ, харин хэшээлээ шэнэ оньһон аргаар, һуралсалай методикоор, удха шанартай эрдэм мэдэсээр дээшэлүүлхэ шухала, - гэжэ Арадай Хуралай Түрүүлэгшэ онсолбо.
Мүн үхибүүдые халуун эдеэгээр хангалга эрдэм һуралсалай шанарта нүлөөлдэг үйлэнүүдэй нэгэн гэжэ тэмдэглээ. Арадай Хуралай депутадууд һурагшадай эдеэ хоолдо һомололгые 2015 ондо 68 миллион, 2016 ондо 76 миллион түхэриг дээшэлүүлээ бэлэй.
Буряад Уласай Багшанарай Августын суглаанай гол айлшан СССР-эй арадай артист, Россиин Герой Иосиф Давыдович Кобзон байгаа. Иосиф Давыдович ехэ һонин һанамжануудые дурадхаа бшуу. Элдэб үзэл сурталтай, элдэб яһатан үхибүүдые зүб мүрөөр хүмүүжүүлхэб гэжэ тэрэ һанамжалаа. Хүгжэмэй талаар хүдөөгэй үхибүүдые хайшан гэжэ хүмүүжүүлхэб, Эхэ орондоо энэрхы сэдьхэлтэйгээр хүмүүжүүлхэб гэхэ болон үшөө һонин һанамжануудые хэлэһэн байна. Иосиф Кобзонтой хэһэн хөөрэлдөө манай удаадахи дугаарта уншаха аргатайт.
Автор: Аркадий Батомункуев
Описание: Буряад Уласай Багшанарай Августын суглаанай гол айлшан СССР-эй арадай артист, Россиин Герой Иосиф Давыдович Кобзон ехэ һонин һанамжануудые дурадхаа.
Автор: Аркадий Батомункуев
Описание: Иосиф Давыдович Кобзон Буряад Уласай соёлой сайд Тимур Цыбиковтэй болон Дарима Линховоинтой
Автор: Аркадий Батомункуев
Описание: Иосиф Кобзон Улаан-Үдын кадедүүдэй һургуулиин эдир артистнартай.
Автор: Аркадий Батомункуев
Описание: Иосиф Кобзон кадедүүдтэ дурасхаалай үгэнүүдые бэшэжэ байна.
Автор: Цырегма САМПИЛОВА
