​Загастайн дасанда хоёр субарга арамнайлагдаба

Анханай Загастайн дасаниие һэргээхэ тухай нютагай һүзэгшэд, жиндагуудай нэгэн дуугаар һайшааһан шиидхэбэри Сэлэнгын аймагай Тохой һуурин шадархи Ехэ Обоо тахилгын үедэ абтаһан юм. Үлзы дэмбэрэлтэй энэ үйлэ хэрэг 2012 оной августын 4-дэ тохёолдоһон байгаа.

Ехэ Обоо буурал холын үеһөө Загастайн дасанай приходой обоо гэжэ тодорһон аад, нютагай бүхы обоонуудай тахигдажа дүүрэһэнэй удаа, буряад литээр, зунай һүүл һарын 18-да тахигдадаг һэн шуу. Уданшьегүй тэрэл 2012 оной август һарада Хамба лама Дамба Аюшеев заларжа, тус дасанай баригдаха газарые заажа үгэһэн юм.

Тохой, Загастайгаархин нютагайнгаа дасаниие һэргээхэ тухай үнинэй бодогшо байгаа. Харин олоной энэ һанал бодолые Тохой нютагһаа уг гарбалтай Чойжинимаевтанай бүлэ бодотоор бэелүүлхэ гэһэн харюусалга ехэтэй үүргые өөр дээрээ даажа абаа һэн. Тэдэ хэд бэ гэбэл, Москвагай, ороной, хилын саанахишье хэдэн хотонуудтахи “Наран” гэжэ түбэд эмнэлгын клиникын ахамад эмшэн Светлана Галсановна Чойжинимаева, мүн тэрэнэй эжы - нютагайнгаа дасаниие һэргээхэ бодол үнинэй досоогоо бөөмэйлжэ ябадаг, тэрэ үедэ мэндэ байһан үндэр наһатай Надежда Чагдуровна болоод, Людмила Галсановна, Галина Галсановна гэдэг тэрэнэй басагадынь болоно. Энэ үүсхэлээ тэдэнэр мүн лэ Москва хотодо түбэд эмнэлгын өөрын клиникэтэй байһан аад, 2012 оной июнь һарада нютагтаа ерээд, гэнтэ наһа бараһан одхон хүбүүн Баир Галсановичай дурасхаалда зорюулаа һэн. Энэл бүлэ нэгэ миллион түхэригэй түрүүшын хандиб оруулжа, саашадаашье барилгын ябуулагдажа байха үедэ нэмэлтэ хандибуудые үргэһэн байна.

Барилга эрхилэгшээр хамтын хэрэгтэ эдэбхитэйгээр хабаадалсадаг, Тохой нютагай Владимир Чойдонович Чойжинимаев томилогдобо. Барилга эрхилэгшын эжы – Чойдоной Бутэд-Ханда дасан бариха талмайда зорюулан, өөрынгөө пай хубида хүртэдэг 6 гектар газарые үргэһэн байна. 2012-2013 онуудта Загастайн дасанай барилгын сан жасада үргэл хандиб оруулха хэмжээ ябуулганууд Москва, Улаан-Үдэ, Гусиноозерск хотонуудта бэелүүлэгдээ юм. Тиин 2014 оной зун Сахюусан дуганай барилга эршэтэйгээр ябулагдажа эхилбэ. Бэлэн боломсоорнь, Бандида Хамба лама Дамба Аюшеев түрүүтэй буряад дасанай шэрээтэнэр, ламанар одоол 2014 оной сентябриин 13-да дуганай арамнай үргэһэн байгаа.

Тэрэ гэһээр үнгэрһэн саг соо Загастайн дасан ойро шадархи нютагуудай ажабайдалда шухала һуури эзэлдэг болоо. Байгша оной июлиин 22-то Дасанай Ехэ Обоо тахигдажа, эрын гурбан наадан, концерт гэхэ мэтэ үнгэрөө. Барилдаанай спонсорнууд – Тохойһоо олзын хэрэг эрхилэгшэд Владимир Чойжинимаев, Солбон Дашинимаев, мори урилдаае Жаргалантын Эдуард Данзанов, Дашанима Шарапов тэдхээ, концерт Харганаагай “Алтан туяа” шуулган харуулаа.

Августын 19-һөө дасанда түрүүшынхиеэ Ганжуур хурал үнгэргэгдэжэ эхилбэ. Ганжуурай 100 гаран боти Москвада шүдэ эмнэлгын клиникэ эрхилдэг Андрей Онтобоев Монголһоо асаржа, Ехэ обоогой найрай үедэ шэрээтэ Баясхал ламбагайда барюулаа. Дасанай хорёо соо “Наран” клиникын эмшэд Чойжинимаевтанай бүлын үргэл хандибаар бодхоогдоһон ута наһанай Зугдар Намжалма, Яндум – иимэ хоер субарга Ганжуурай хуралай үедэ, августын 21-дэ, арамнайлагдаа. Арамнайн уншалга Ивалгын дасанай габжа лама Дымбрыл Дашабалданов хүтэлөө гэжэ Загастайн дасанай Зоригто лама мэдээсэбэ.

Автор: Загастайн дасанай “В контакте” сүлжээндэхи нюурһаа фото абтаба

Описание: шэрээтэ Баясхал ламбагай Ганжуур хуралай үедэ.