​Иосиф Кобзон “Буряад үнэнэй” ойн баярта уригдаа

“Буряад үнэн” сонимнай Буряад һайхан дайдаяа, мүн нютагһаа холо ажабайбашье, тоонтоёо дэлхэй дүүрэн суурхуулдаг ажалша бүхэриг арад зониие, дууша, хүгжэмшэ, уран дархаша, ниитын ажал ябуулагша болон шадамар бэрхэшүүлые тодоруулжа, “Буряадай түрүү хүнүүд” гэһэн харалганда табидаг һайхан заншалтай. 20 жэлэй туршада иимэ ажал ябуулагдадаг юм. Энэ жэлдэ үндэһэн сониноймнай байгуулагдаһаар 95 жэлэй ойн баяр декабриин 2-то заншалта ёһоор Буряадай Гүрэнэй буряад драмын академическэ театрай ордон соо болохоор хараалагдана.

Иосиф Кобзон олон жэлнүүдэй туршада Агын Буряадай тойрогые Гүрэнэй Дүүмэдэ түлөөлжэ байхадаа, буряад арадай хүгжэлтэдэ ехэхэн хубитаяа оруулһаниинь түүхэдэ эли.

“Буряад үнэн” сониной захирал-ахамад редактор Баир Балданов СССР-эй арадай артист Иосиф Кобзоной Улаан-Үдэ айлшалан ерээд байхада, зорюута уулзажа, хүндэтэ айлшанда энэ ойн баярта урилга барюулһан байна. Иосиф Давыдович Баир Дашеевичые угтан абажа, манай Хэблэлэй байшангай ажал хэрэгүүдээр, 95 жэлэйнгээ ойн баяр тэмдэглэхэеэ байһан “Буряад үнэн” сониноор һонирхожо, урилгыемнай хүндэдэ тооложо, тогтоон абаһан байна.