974
Зүрилдөөтэй, хатуу сагта ургажа ябаһан залуу халаан – һурагшадай ухаан бодолыень, сэдьхэл һанааень, эрмэлзэлыень зүб мүрөөр, дүрбэн тэгшээр хүмүүжүүлхэ гээшэ шухала асуудалнуудай нэгэн болоно гээшэ. Россиин Холбоото Уласай Юрэнхылэгшын 2015 оной октябриин 29-нэй зарлигаар «Россиин һурагшадай хүдэлөөн» гэһэн Бүхэроссиин үхибүүдэй ниитэ-гүрэнэй эмхи зургаан бии болоһон байна.
Энэ хүдэлөөн залуушуулаар хүдэлдэг ажалшадые, багшанарые, эмхи зургаануудые нэгэдүүлэн, шэглэлнүүдыень тодорхойлхо гэһэн зорилготой юм. Энэ жэлэй майн 18-19-нэй үдэрнүүдтэ Москва хотодо МГУ-гай дэргэдэ «Россиин һурагшадай хүдэлөөнэй» түрүүшын съезд үнгэрһэн байна. Тэндэ саашанхи ажалаа хайшан гэжэ ябуулхабибди гэжэ шиидхэхын тула иимэнүүд асуудалнууд шиидхэгдээ:
1. Эсэгэ ороншо, сэрэгшэ сэдьхэлтэйгээр хүмүүжүүлгэ.
2. Өөрсэ хүмүүжэл. Эндэ соёл һуралсалай программанууд, үхибүүдэй уран һайханай түсэлнүүд, элүүр энхээр бэе абажа ябалга, мэргэжэл тодоруулга гэхэ мэтэ асуудалнууд.
3. Эрхэтэнэй һанал бодол хүмүүжүүлгэ. Эндэ волонтёрнуудай хүдэлөөн, хизаар оронойнгоо түүхэтэй танилсалга, шэнжэлэлгэ болон үхибүүдэй дунда аюулгүй, һайхан һаналтайгаар харилсаа, холбоо бэхижүүлгэ болоно.
4. Мэдээсэлэй-медийнэ шэглэл. Залуушуулые һонирхолтой, хэрэгтэй зүйлнүүдээр танилсуулжа, һонирхуулха. Элдэб һонин онол аргануудаар харилсуулха ябадал эмхидхэлгэ.
Энэ һурагшадай эрэлхэг баатарлиг аха зоной жэшээгээр хүмүүжэхэ бүхэроссиин хэмжээ ябуулгые манай Буряад Уласай һурагшад дэмжэһэн байна. Тиигэжэ сентябриин 10-да Соведүүдэй талмай дээрэ Уласай нэгэдэхи слёт үнгэрбэ. Энэ хэмжээндэ Уласай эдир сэрэгшэдэй интернат-һургуули (200 һурагшад), Уласай Мариинскэ интернат-һургуули (100 һурагшад), Уласай Үндэһэтэнэй 1-дэхи лицей-интернат (100 һурагшад), Улаан-Үдын 33-дахи гимнази (100 һурагшад), хотын 26, 49-дэхи һургуулинууд (100-100 һурагшад), Байгал шадарай аймагай Селенгинскэ гимнази, Турунтаевай 1-дэхи дунда һургуули (100 һурагшад) болон аймагай гимнази (200 һурагшад) хабаадалсаа.
Автор: Елена Дамдинова
Описание: Аха сэрэгшэд ерээдүйнгөө халааниие амаршалхаяа ерээ
Автор: Елена Дамдинова
Описание: Эдэ хүбүүд хэзээдэшье Эхэ ороноо хамгаалхаар бэлэн
Буряад Уласай Засагай газарай түрүүлэгшын социальна хүгжэлтын талаар орлогшо Владимир Матханов, Уласай ахамад федеральна инспектор Сергей Ромахин, Арадай Хуралай депутат Сергей Мезенин, Һуралсалай болон эрдэм ухаанай сайдай орлогшо Виталий Бурдуковский, Россиин Зэбсэгтэ Хүсэнүүдэй зүгһөө генерал-майор Дмитрий Коваленко, Гвардиин десантна бригадын захирагша, подполковник Алексей Савельев болон «Россиин һурагшадай хүдэлөөнэй» Буряадай хизаар хоорондын таһагай түрүүлэгшэ Наян Сагаев гэгшэд эдир юнармейцүүдые һайндэрөөр амаршалжа, амжалта хүсөөд, Юнармиин тугуудые барюулаа.
Автор: Елена Дамдинова
Описание: Эдир юнармеецүүдтэ Юнармиин тугууд дамжуулагдаа
Тэдэнэр барандаа хуу бүлэг бүлэгөөрөө нэгэ янзын һайхан формонуудтай жэрылдэнхэй, Россиин һурагшадай хүдэлөөнэй гэшүүнэй тангариг үгэһэн байна. Тэрэнэй удаа талмай дээгүүр гол трибунын урдуур жагсаалаар гараба.
- 50 жэлэй саана, 1966 ондо, манай Уласай пионернүүдэй зүблэлэй түрүүлэгшэ байһан хүнби. Тэрэнэй һүүлдэ энэ пионернүүдэймнай эмхи ехэ эдэбхитэйгээр хүдэлдэг байгаа. Харин һүүлэй хорёод гаран жэл энэ хүдэлөөмнай замхарһан, мэдэгдэхэеэ болиһон даа. Мүнөө иигэжэ һурагшадай Бүхэроссиин хүдэлөөн гэжэ нэгэдэлэй бии боложо байхада, үнэн зүрхэнһөө ехэ баяртай байнаб. Юундэб гэхэдэ, хүн нэгэ нэгээр, ганса гансаараа ябахадаа, юумэ бүтөөхэгүй. Бултадаа олоороо сугларжа, хамтадаа хэлсэжэ, эбтэй эетэйгээр нэгэ зорилготойгоор ябаа һаа, тэдэмнай юумэ хэхэ болоно ха юм даа. Эдэмнай юу хэхэ болоноб гэхэдэ, байгша оной декабриин 20-до Россиин Уласай Засагай газар 2016-2020 онуудта Россиин эрхэтэдые патриотическа шэглэлтэйгээр хүмүүжүүлхэ гэһэн тогтоол абаһан байна. Тэндэ табигдаһан программаяа бэелүүлхэ хэрэгтэ энэ хүдэлөөмнай баһал өөрынгөө хуби оруулха байна гээшэ, һурагшадшье һаа. Патриотическа хүмүүжүүлгэ гээшэмнай нэн түрүүн үхибүүдтэ, һурагшадта хабаатай ха юм даа. Нэн түрүүн Эхэ орондоо үнэн сэхээр ябаха, сэрэгэй албанда бэеэ бэлдэхэ гэхэ мэтэ асуудалнууд. Тиигээд саашаа һайнаар һураха, ажал хүдэлмэриеэ һайнаар хэхэ, үндэр наһатай хүнүүдые хүндэлхэ гэхэ мэтэ зорилготой байгаа хадаа, хүбүүд басагаднай зүбөөр хүмүүжэхэ байна гээшэ, - гэжэ Буряад Уласай Ветерануудай зүблэлэй түрүүлэгшэ Ревомир Баярович Гармаев һаналаараа хубаалдаба.
Гол үйлэнүүдэй үнгэрһэнэй һүүлдэ үхибүүд тодхогдоһон майханууд соо ошожо, ажал хэрэгүүдтэйнь танилсаха, мүн тиихэдэ сэрэгшэдэй полевой кухнида гэршүүхын каша, халуун ундатайгаар амсаха аргатай байгаа.
Баярай түгэсхэлдэхэдэн уран һайханай бүлгэмүүд хатар, наадануудаар айлшадые баясуулһан байна.
Автор: Елена Дамдинова
Описание: Үхибүүд элдэб зэбсэгүүдые нюдөөрөө хаража, гараараа барижа үзөө
Автор: Елена ДАМДИНОВА
