​Һэргылэе: ханяадан һүжэржэ магадгүй

Үбэлэй хүйтэндэ элдэб вируснэ үбшэнгүүд һүжэрдэг. Тиимэ һэн тула уридшалан ажаһуугшадта прививкэ-тарилга намартаа эхилдэг. ОРВИ, грипп үбшэнгүүдһээ һэргылэмжын эгээл туһатай арга хадаа вакцинаци гээшэ.

Прививкэ аша туһатай

Мүнөө жэлэй грипп үбшэнэй һүжэрэлгэ декабрь һара соо тудаха гэжэ багсаамжалагдана, тиимэһээ сентябриин 1-һээ ноябриин 1 болотор прививкэ-тарилга үнгэргэгдэхэ. Вакцинаци хадаа эпидеми үбшэнгэй һүжэрэлгэһөө абардаг, тарюулһан хүндэ грипп үбшэн халдаашье һаа, хүшэрөөр бэшэ, элдэб хойшолонгүйгөөр үнгэрдэг байна. Саг соогоо прививкэ абаһан зоной 80-90 процентнь грипп үбшэнһөө зайсадаг. Грипп үбшэн наһатайшуулда болон элдэб хроническа үбшэнтэндэ аюултай. Пневмони болон уушханай элдэб үбшэнгүүд һүжэржэ магад, тиимэһээ саг соогоо үбшэ һэргылжэ, прививкэ тарюулха шухала бшуу.

Һэргылэмжын тарилгануудай Үндэһэтэдэй календариин шугамаар “Гриппол”, “Совигрипп” – томошуулда, “Гриппол плюс”, “Ультрикс” (үхибүүдтэ болон нарайлха эхэнэрнүүдтэ) вакцинанууд хэрэглэгдэдэг.

Эдэ эмээр тарюулагдаһан зон вируснэ халдабарита үбшэндэ нэрбэгдэдэггүй, хүйтэ абан үбдэбэл, тон хүнгөөр үнгэрдэг. Манай Буряад Улас дотор эдэ эмүүдые хэрэглэһэнэй удаа хүшэр үбшэнтэ ушарнууд дайралдадаггүй. Жэл бүри вакцинын бүридэл ондоо болодог.

Нёдондо бүхыдөө үбшэнэй шалтагаанаар хандагшадай 116 хүндэ N1H1 гэһэн зон соо “гахайн грипп” гэжэ алдаршаһан түхэлэй үбшэн халдаһан байгаа. Тэдэ зон булта прививкэ хүүлээгүй байгаа бшуу. Нёдондо январиин тэн багаар эгээл грипп үбшэнэй һүжэрэлгэ тэмдэглэгдээд, 3-4 долоон хоног соо унтарһан байна. Харин мүнөө үдэр бүри ОРВИ үбшэнтэнэй тоо олошорно, гэбэшье тон грипп һүжэрөө гэжэ тэмдэглэгдээгүй. Гэхэ зуура, декабрь һара соо грипп үбшэн һүжэржэ магад.

Хэндэ түлбэригүй тарилга хэгдэхэб?

Мүнөө жэл бүхыдөө Буряад орон дотор 391 мянган хүниие тарилгаар хангаха, энэнь хадаа бүхы ажаһуугшадай 40 хубинь болоно. Харин 338 мянган хүн прививкэ түлбэригүйгөөр абаха. Эдэ хэд бэ гэхэдэ, зургаа һаратайһаа дээшэ багашуул, һургуулиин үхибүүд, оюутад, эрдэм һуралсалай эмнэлгын эмхинүүдэй ажалшад, 60 наһанһаа дээшэ наһатайшуул, харгын, коммунальна һалбариин хүдэлмэришэд, хүшэр үбшэнтэн, нарайлха эхэнэрнүүд болон сэрэгэй албанда татагдаһан залуушуул. Харин 55 мянган зон мүнгэн зөөриин элдэб ондоо жасаһаа: муниципальна һангай, ажалаар хангагшадай болон ажаһуугшадай мүнгэн зөөриһөө түлэгдэжэ, прививкэ хэгдэхэ юм.

Мүнөөдэрэй байдалаар, 39 877 хүн прививкэ абаад байна. Түрүүшын хаһада хэрэгтэй вакцинануудай тэн хахадынь асарагданхай. Сентябрь һарын нүгөө хахадта бусад хубинь ерэхэ юм.

Жэл бүри Буряад орон дотор 360-400 мянган зон прививкэ тарюулдаг. Тиигэжэ ехэнхи хуби ажаһуугшад бэеэ элүүржүүлжэ һэргылдэг. Энээнэй ашаар һүүлэй юһэн һарын туршада грипп болон ОРВИ үбшэнэй һүжэрэлгөөр Ород гүрэн дотор эгээл һүүлшын һуурида ябадаг юм.

Элүүрые сахилга анхаржа байна

Буряад Уласай Элүүрые хамгаалгын яаманай сайдай нэгэдэхи орлогшо Александр Занданов Буряад Уласай бүхы эмнэлгын газарнууд үбшэнтэндэ саг соонь туһа хүргэхөөр бэлэн болонхой гэжэ заншалта брифинг дээрэ тэмдэглээ.

- Тарилга хэхэ 329 бригада байгуулагдаа. Мүн лэ ажалшадтаа прививкэ хэхэ һаналтай эмхинүүдтэй хэлсээ баталхаар бэлэн байнабди. Халдабарита үбшэнтэнэй һуури эмнэлгын газарнуудта бэлэн. Грипп үбшэнэй һүжэрбэл, үшөө һууринуудые байгуулхаар бэлэн байна. Үбшэ шэнжэлгын лабораторинууд бэлэн, хэрэгтэй түхеэрэлгэ, эм дом булта абтагданхай ,- гэжэ Александр Октябрьевич мэдүүлбэ.

Грипп үбшэн һүжэрхэдөө, зон элдэб хүшэр үбшэндэ нэрбэгдэдэг ха юм даа. Тиимэһээ уушха сэбэрлэлгын 236 түхеэрэлгэ худалдан абтагданхай, бүхы эмнэлгын газарнуудаар тараагданхай.

Буряад Уласай Засагай газар 6 миллион 260 мянган түхэриг һомолжо, тусхай түхеэрэлгэ Буряад Уласай Семашкын нэрэмжэтэ клиникэдэ абтагдаа. Тэрэ хэрэгсэл октябрь һарын эхеэр ажаллажа эхилхэ. Гэхэ зуура бүхы эмшэд тусхай һуралсал гараа, бүхыдөө 4 хахад мянган эмшэд грипп үбшэнһөө һэргылэмжын ажал хэрэгүүдэй семинарта хабаадуулагдаа.

- Ажаһуугшадые саг соогоо һэргылэмжын тарилга гарахыень уряалнабди. Эмнэлгын газарнуудта ажаһуугшадые угтан абахаар бэлэн. Түргэн туһаламжын, дары туһаламжын албангууд бэлэн. Хэрэгтэй болоболнь, тэдэнэй тоо олошоруулагдаха. Поликлиникэнүүд долоон хоногто ажаллахаар бэлэн. Хэрэгтэй ушарта интернэ, ординатурын эмшэд болон Буряадай гүрэнэй университедэй 6-дахи шатын оюутадай хүсэн хэрэглэгдэхэ, - гэжэ элүүрые хамгаалгын сайдай орлогшо мэдүүлбэ.

Элүүр энхэ бэе тамиртай үбэлөө дабаха гэбэл, саг соонь һэргылэмжын тарилга гараха. Олон зоной хабаадалгатай хэмжээнүүдһээ шадаа һаа, холуур ябаха гэхэ мэтэ һэргылэмжын ябуулга анхархые эмшэд уряална.