​Элүүр энхын марафон

Ивалгын аймагай үзэмжэ һайхан байгаалитай Тапхар һууринда оршодог “Тамир Хаус” гэһэн газарта элүүрые сахилгын марафоной эгээл түрүүшын хэмжээн үнгэрөө. Эндэ Буряад Уласаймнай менеджерэй ажал эрхилэгшэд ерэжэ, элүүрые сахилгын һуралсал гараба.

Буряад Уласай урдаа хараха клиникын мэргэжэлтэд: травматологи-ортопедиин таһагые даагша Евгений Шигаев, клинико-диагностикын түбые даагша Дарья Мункоева, Эндокринологическа түбэй эмшэд Надежда Шоболова, Алима Давын-оол, нюдэнэй микрохирургиин таһагай врач Оксана Сверкунова гэгшэд марафондо хабаадагшадта лекцинүүдые уншажа, элүүрые сахилга гээшэ ажаһуудалаймнай эгээл ехэ баялиг гээшэ гэжэ тэмдэглэбэ.

Буряадай Менеджернүүдэй холбооной гэшүүд бусад зондо жэшээ болгон, энэ хэмжээндэ хабаадаһандаа, ехэ урматайнууд.

- Манай эмхидэ 170 менеджернүүд бүридхэгдэнхэй. Тэдэнэй олонхинь олзын хэрэг эрхилэгшэд, томо эмхинүүдые хүтэлбэрилнэ. Сэхыень хэлэхэдэ, бидэ өөһэдынгөө энхэ элүүртэ дутуу анхарал хандуулдагбди. Энэ марафон ехэ һонин аргаар эмхидхэгдээ, бидэ эмшэдтэй сүлөө харилсажа, өөртөө аша туһатай мэдээсэлнүүдые абаабди. Харин поликлиникэ ерээд, эмшэдтэ һанаһан асуудалаа табижа, олон мэдээсэл абахын аргагүй байдаг ха юм даа, - гэжэ Буряадай Менеджернүүдэй холбооной юрэнхылэгшэ Гэсэр Доржиев һанамжаараа хубаалдаба.

Травматологи-ортопедиин таһагые даагша Евгений Шигаев остеопороз үбшэн тухай дэлгэрэнгыгээр хөөрэжэ, туһатай зүбшэлнүүдые үгөө. Эндотүбэй эмшэн Надежда Шоболова бүһэтэйшүүлэй энхэ элүүртэ гол анхарал хандуулжа, бүһэтэйшүүлэй наһа утадхаха талаар гол үйлэ арганууд тухай мэдээсэбэ. Гэхэ зуура мүнөө үеын гол шухала асуудалнуудай нэгэн - хүбүүдэй хүмүүжүүлгын талаар баһал һонин жэшээнүүдые баримталан хөөрэжэ үгөө. Врач Дарья Мункоева мүнөө үеын шэнэ оньһото шэнжэлэлгын түхеэрэлгэ, хэрэгсэлнүүд тухай мэдээсээ.

- Үбшэнэй хүсэд һүжэрөөгүйдэ бэе махабадые түргэн мүрөөр шанартайгаар шэнжэлгэдэ гол анхарал хандуулха болон хүн зоной элүүрые сахилгада онсо анхарал хандуулха шухала. Үбшэниие эхин шатадань элирүүлгэ хадаа энхэ элүүр байдалай гол шата болоно, саашань һүжэрөөнгүй, түргэн мүрөөр аргалжа, элүүрые хамгаалгада, хүн зоной амгалан байдалда нүлөөлнэ бшуу, - гэжэ эмшэн ойлгуулна.

Эндокринологиин түбэй эмшэн Алимаа Давын-оол зүбшэлнүүдые марафондо хабаадагшадта үгэбэ Шуһанай сохисын давлени, хүнэй үндэр, набтар болон бэеын хэмжүүр, матаргай хэмжэжэ, ямар бэеын хэмжүүр таараха болон эдеэ хоолой тэнсүүри тухай зүбшэлнүүдые үгөө.

Тус марафон хадаа арад зониие элүүр энхэ байдалда анхарал хандуулха, элүүрые хамгаалгын эрдэм мэдэсэ хүгжөөхэ гол зорилготой юм. Үдэрэй туршада эндэ ерэгшэд хэдэн лекци, уншалга, тренинг, диагностико, зүбшэлнүүдые, бэеэ элүүржүүлгын туһаламжануудта хүртэнэ. Элүүрые хамгаалгын энэ хэмжээн болзоргүй, бэеэ элүүржүүлгэдэ туһатай эрдэм мэдэсэтэй болохоёо һанаһан хүн эндэ хабаадалсаха аргатай. Олон жэлэй туршада үбшэнтэниие аргалһан эмшэдэй тэмдэглэһээр, үбшэн гээшэ олон жэлэй стресс, муугаар байдалаа зохёоһоной үрэ дүн, бэеэ элүүрээр абажа шадахагүй, саг соогоо үбшэ һэргылжэ, бэеын тамирай элүүржүүлгэ ябуулаагүйһөө шалтагладаг. Тиимэһээ элүүр энхэ байдал манай өөһэдэймнай гарта гэжэ үшөө дахин Семашкын нэрэмжэтэ Буряад Уласай клиническэ больницын эмшэд гэршэлбэ.