​Түрэлхи хэлэнэйнгээ найрые тааруу зохидоор угтая

Үнгэрэгшэ долооной эсэстэ Буряад Уласай Засагай газарта буряад хэлэнэй энэ жэлэй һайндэрые эмхидхэхэ асуудалаар тусхай бүлэгэй зүблөөн болобо. Буряад Уласай Толгойлогшын болон Засагай газарай захиргаанай хүтэлбэрилэгшын орлогшо, үндэһэ яһатанай харилсаанай ба эрхэтэнэй үүсхэл хүгжөөлгын талаар хорооной түрүүлэгшэ Михаил Харитонов энэ зүблөө хүтэлбэрилөө.

Буряад хэлэнэй һайндэр 10-дахи һарын 21-дэ Улаан-Үдэдэ Буряад театрта үнгэргэгдэхөөр түсэблэгдэнхэй. Тэрэниие эмхидхэхэ ажал уласаймнай хэдэн яаманууд болон эмхи зургаануудта, ниислэлэй захиргаанда даалгагдаһан байха юм. Боложо үнгэрһэн энэ суглаанда һайндэрэй олон тоото хэмжээ ябуулгануудые зохёон эмхидхэлгын бэлэдхэлэй ажалай хэр ябажа байһан тухай яамануудай болон бусад зургаануудай түлөөлэгшэд мэдэсээбэ.

Соёлой яаманай мэдэлдэ байһан эмхи зургаанууд элдэб наадануудые, викторина болон мүрысөөнүүдые, номой болон виртуальна үзэсхэлэнүүдые, хүүгэдэй хабаадалгатай олон хэмжээ ябуулгануудые эмхидхэхээр хараална. Уласай Үндэһэтэнэй болон Хяагта хотын музейнүүд, Үндэһэтэнэй болон хотын номой сангууд заншалта ёһоор уншагшадаа, һургуулиин шабинарые угтан абажа, һонирхолтой элдэб мүрысөөнүүдтээ хабаадуулха. Харин һайндэрэй түгэсхэлэй үдэшые Буряад театр өөр дээрээ даажа абаха юм. Энэ театрай бэлигтэй түлөөлэгшэ, уласай габьяата зүжэгшэн Надежда Мунконова хэмжээ ябуулгые зохёон найруулха гээд Соёлой яаманай мэргэжэлтэн мэдээсэбэ.

Болбосоролой болон эрдэм ухаанай яаман мүн лэ бэлэдхэл ябуулжа байнхай. Үндэһэтэнэй буряад лицейдэ, Улаан-Үдын 29-дэхи буряад гимназида хэдэн хэмжээ ябуулганууд түсэблэгдэнэ. һургуулида үзэгдэдэг болоһон электронно номоор һурагшадай хоорондо урилдаан, харалганууд, дуу шуу, таабари, оньһон үгэнүүдэй, зохёолнуудаар мүрысөөнүүд. Харин ниислэл хотын һургуулинуудай эхин ангинуудай шабинарай дунда “Дүрбэн тэгшэ” гэжэ олимпиада ерэхэ жэлэй хабар үнгэргэхэ тухай шиидхэбэри абтаа. Ушарынь гэхэдэ, һуралсалай жэлэй эхиндэ багашуулнай һургуулидаа, хэшээлнүүдтээ һаял дадажа, мүрысөөндэ хабаадахадаа, гайхама ехэ үрэ дүн харуулжа шадахагүй гээд багшанар тоолоно. Энэшье зүбтэй гэжэ суглаанда хабаадагшад дэмжэбэ.

Зүблөө үнгэргэгшэ Михаил Харитоновой һанамжаар, гансашье ниислэл хотодо олон тоото хэмжээ ябуулганууд хараалагдаха бэшэ, харин тиихэдэ хүдөө аймагууднай хойшоо гараха ёһогүй. Һургуули, соёлой байшангууд, хүүгэдэй сэсэрлигүүд болон номой сангуудһаа эхилээд, томошуулай бэшэдэг диктантнуудта хүрэтэр түсэблэгдэһэн олон хэмжээ ябуулгануудай таатай зохидоор үнгэрхынь тула, засагай дээдын зургаанууд, уласай яамануудай ноёд болон аймагуудай засаг дарганар бэлэдхэлэйнь ажалые зонхилон хүтэлхэ ёһотой гээд тэмдэглэгдэбэ.