​Эхэ хэлэнэймнай ээлжээтэ һайндэр

Жэл бүри Буряад Уластамнай октябрь һарада түрэл буряад хэлэнэймнай һайндэрнүүд үнгэрдэг гээшэ. Энэ ушараар Болбосоролой болон эрдэм ухаанай ба Соёлой яамануудай мэдэлдэ байһан эмхи зургаанууд олон тоото наадануудые, мүрысөөнүүдые, үзэсхэлэнүүдые үнгэргэхөөр түсэблэнэ.

Багшанарай колледждо, уласай болон хотын номой сангуудта Дашарабдан Батожабайн 95 жэлэй, Дондок Улзытуевай 80 жэлэй ойнуудта зорюулагдаһан үдэшэнүүд гэхэ мэтэ хэмжээ ябуулганууд үнгэргэгдэхэ юм.

Буряадай гүрэнэй ехэ һургуулиин Зүүн зүгэй институдта октябриин 10-һаа 13 болотор оюутадайшье, багшанарайшье дунда элдэб урилдаанууд үнгэрхэ.

Хотын 47-дохи һургуулида эрдэм ухаанай «Мэргэн бодол» наадан (октябриин 13), 29-дэхи буряад гимназида «Оюун бэлиг» (октябриин 14), 18-дахи һургуулида «Түрэл хэлэн – түрэһэн дайда…» (октябриин 18), үндэһэ яһатанай 1-дэхи лицейдэ «Буряад хэлэн» (октябриин 20) мүрысөөнүүд болохонь.

Буряадай эрдэмэй түбтэ эрдэмтэдэй дунда диктант (октябриин 18), Буряадай хүүхэлдэйн театрта «Зархайн шэдитэ үльгэрнүүд» гэһэн хүүгэдэй театрай студинуудай мүрысөөн (октябриин 20, 21) болон бусад хэмжээ ябуулганууд үнгэрхэ юм.

Гадна, габшагай һара соо буряад аймаг нютагуудтамнай мүн лэ олон тоото һонирхолтой үйлэ хэрэгүүд хараалагдана. Хамта дээрээ зуугаад хэмжээ ябуулга түсэблэгдэнхэй.

Түрэлхи хэлэнэй үдэрнүүдэй түгэсхэлэй һайндэр энэ һарын 21-дэ Буряад театрта эмхидхэгдэхэ байна.

И.Гулгеновагай гэрэл зураг.