​Эрхимүүдынь элирбэ

Буряад хэлэнэй үдэрнүүдэй хэмжээндэ заншалта ёһоор хаа хаанагүй диктант бэшэлгэ боложо байна. Һаяхан октябриин 6-да хотын Исай Калашниковай нэрэмжэтэ номой санда буряад хэлэнэй талаар мэргэжэлтэд бэшэ зоной дунда диктант болобо.

Хэлэ бэшэгэй эрдэмэй кандидат, хотын 12-дохи номой сангай филиалай хүдэлмэрилэгшэ Цымжит Бадмажаповна Базарова үүсхэл гаргажа, 2012 ондо энэ хэмжээ ябуулгые анха түрүүн өөрынгөө номой санда эхилһэн юм. Тиимэһээ энэ жэлдэ тус үйлэ хэрэг тэбхэр табан жэлээ тэмдэглэбэ.

- Жэл бүри диктант бэшэжэ, өөрыгөө туршаха дуратайшуул олошоржол байна. Хэрбэеэ 2012 ондо оройдоол 12 хүн, 2013 ондо 47 хүн, 2014 ондо 79 хүн, 2015 ондо 53 хүн хабаадаһан һаа, мүнөө жэлдэ 65 хүн хабаадаа. Эндэмнай буряад хэлээр тусхай мэргэжэлтэй бэшэ, юрын зон хабаадаһан байна гэжэ онсо тэмдэглэхэ шухала. Элдэб наһанай зон, эгээл залуунь 17 наһатай оюутад Лхамо Харалдаева, Шахноза Буянтуева, тон наһатайнь 84-тэй Дулгарма Дашиевна Дашиева г.м., диктант бэшэһэн байна. Энэнь ехэ һайшаалтай, - гээд, эмхидхэгшэдэй нэгэн Соёлма Жигмитдоржиевна Цыдыпова хубаалдана.

Мүнөө жэл диктант буряадай прозаик Жамсо Тумуновай 100 жэлэй ойн баярта зорюулагдажа, мэдээжэ «Талын бүргэд» гэһэн туужаһаа хэһэг уншагдаба. Жюриин гэшүүд Ородой Холбооной арадай гэгээрэлэй отличник, Буряад Уласай габьяата багша Цыпилма Будаевна Цыренова, Улаан-Үдын 33-дахи гимназиин буряад хэлэнэй багша Баирма Жигмитдоржиевна Бадмаева, 63-дахи гимназиин буряад хэлэнэй багша Соёлма Жигмитдоржиевна Цыдыпова, хэлэ бэшэгэй эрдэмэй кандидат Оюна Александровна Забанова гэгшэдтэ хүнгэн бэшэ ажал тудаба. Тиигэжэ түрүүшын һуури наһанай амаралтада гараһан Ольга Санжиевна Хинхаева, хоёрдохи һуури педиатр мэргэжэлтэн Мария Дундаровна Очирова, гурбадахи һуури мүн лэ наһанайнгаа амаралтада гараһан Мыдыгма Лхасарановна Ринчинова гэгшэд эзэлжэ, шагналнуудта хүртэһэн байна.

Октябриин 20-до энэл номой санда изложении бэшэлгэ болохо юм гээд уншагшадтаа дуулганабди.

И.Гулгеновагай гэрэл зураг.