​Сопа Римбүүшын һургаалнуудһаа

Уур сухал гээшэ хүнэй ухаан бодолдо үлэһэн муу зүйлнүүдһээ бии болодог. Хэрбэеэ таниие хэнэйб даа муу үгөөр, үйлөөр сухалдуулбалнь, өөрынгөө ухаан бодолой гүндэ хандаагүй һаа, дайсанайнгаа урда ямаршье аршалалта, хамгаалалтагүй болошохот.

Хэрбэеэ хэнэйб даа танда дээрэлхэжэ, һайн хэрэгүүдыетнай тоонгүй, муугаар хандадаг болоо һаань, ямар ухаан бодолдо абтаад байнабта - тэрээнһээ танай уур сухал дулдыдаха. Энэ үедэ тэрэ хүнэй ухаанай, хэлэнэй, бэеынь ондоо боложо байһые адаглахат. Харин тэдэ хубилалтанууд танай уур сухал хүргэхэ еһогүй, энэ танай ухаанай байдалһаа дулдыдаха. Үнэн дээрээ тэрэ хүнэй хубилалгаһаа танай уур сухал хүдэлнэ бэшэ, тон тиимээр лэ үзэгдэһэншье һаа, шалтагынь ондоо. Үнэн шалтагынь - танай ухаан бодол. Уур сухалай орондо энэрил хайраар ухаан бодолоо дүүргээд, таниие гомдохооһон хүн зоболон уйдхарһаа сүлөөрэг гэжэ хүсэбэлтнай, танай сэдьхэлэй байдал тэнсүүритэй, ухаандатнай һайн бодол түрэхэ.

Жэшээнь, хэншьеб таниие модоор сохибо гэлэй. Тэрэ хүнэй зэбсэг болоһон модондо сухалдахын аргагүй ха юм даа. Сохиһон хүн тэрэ модон шэнги. Уур сухалдаа тэнсэлгүй диилдэшэһэн хүн тэрэнэйнгээ һабарта орошонхой, ямар нэгэ ондоо ябадал үйлэдэхэ аргагүй байна. Тиимэһээ таниие сохиһон хүниие хайрлахаар лэ байна бшуу.

Иимэ бодолнуудые сэдьхэл ухаандаа түрүүлжэ байбалтнай, досоотнай энэрил хайра бии болохо. Тэрэ хүниие хайрлахадаа, тэрэнэй уур сухалай түлөө харюусалга өөр дээрээ даажа абана гээшэт. Тиигэжэ тэрэ хүниие хайшан гэжэ уур сухалай хүреэлэлгэһээ абархаб, хайшан гэжэ туһалхаб гэжэ бодомжолхо шухала.

Хэрбэеэ тэрэ хүндэ дары туһалха арга боломжын үгы һаань, тэрэ хүнэй түлөө маани мэгзэм уншахадатнай, хэзээ нэгэтэ тэрэ хүнэйтнай ухаан бодол сэлмэжэ, уур сухалай байдалһаа бэеэ сүлөөлжэ шадаха. Харин тэрэ хүнэй уур сухал, муу һанаа сэдьхэл таниие дайрахагүй. Тиимэһээ уур сухал гээшэ ондоо хүнэй ябадалһаа дулдыданагүй гэжэ эли болоно. Таниие гомдохооһон хүнэй зоболон тухай бодомжолжо, үзэн ядахын, үһэрисэлдэхын орондо танай зүрхэ сэдьхэл соо ажаһуудалда энхэ элүүр хандаса – энэрил хайра мүндэлхэ бшуу. Энэ хүн танда һайхан сэдьхэл бодолой түрэлгэдэ туһална гэжэ ойлгон мэдэрхэт.

Энэ хүн намда тэсэмгэй абари зан хүмүүжүүлнэ гэжэ бодоболтнай, үнэхөөрөө уур сухалтнай һэегүй танһаа холодохо, бэетнай уур сухал, муухай үйлэ хэрэгһээ сүлөөрхэ.