​Буряадаараа хэлсэхэ буянтай багашуул

Улаан-Үдэ хотын “Алые паруса” гэһэн хүүгэдэй сэсэрлигэй хүмүүжэмэлнүүд мүнөөдэр дэлгүүр ошобо. Һонирхолтойнь гэхэдэ, тэдэ булта буряад хэлэн дээрэ хөөрэлдэнэ.

Сэсэрлигэй хүмүүжүүлэгшэ Людмила Елизаровна Бальжуроватай тэдэ томо тусхай автобусоор дэлгүүр ошоһон байна. Дэлгүүр дээрэ үхибүүд аха захатантай уулзахадаа, наймаашадтай хөөрэлдэхэдөө, “сайн байна!” гэхэеэ мартанагүй. Эдеэ хоолой зүйлнүүдые, нааданхайнуудые хүбүүд, басагад дуратайгаар худалдажа абана.

Автор: Борис Балданов
Описание: Хүүгэд дэлгүүртэ

Худалдан абаһан зүйлнүүдэйнгээ нэрэ буряадаар булта һайнаар мэдэнэ. Энэнь гайхалгүй гэжэ Буряад Уласай Болбосоролой болон эрдэм ухаанай яаманай мэргэжэлтэ Людмила Бадмажаповна Боросгоева мэдүүлнэ.

- 2015 онһоо Улаан-Үдын найман, Ивалгын ба Загарайн аймагуудай нэгэ-нэгэ сэсэрлигүүдтэ багашуулые буряад хэлэндэ һургалгын тусхай программа хүдэлжэ эхилэнхэй. Иигэжэ Буряад Уласай Толгойлогшо Вячеслав Владимирович Наговицынай даабари бэелүүлэгдэнэ, - гэжэ Людмила Боросгоева хөөрэнэ.

Түрэлхидэй нэгэн Оксана Александровна Дареева үхибүүдээр ошолсоһон байгаа. Тэрэнэй хэлэһээр, иимэ аяншалга ехэ туһатай юм.

- Бидэ гэртээ хэды буряадаар хөөрэлдэбэшье, манай үхибүүд нааданай талмай дээрэ, үйлсэдэ, сэсэрлигтээ ород хэлэн дээрэ харилсана. Иимэ тусхай хэшээлнүүдэй удаа манай үхибүүн түрүүшээр бэеынгээ хубинуудые заажа, буряадаар нэрлэжэ эхилээ. Удаань бидэ тоо тооложо һураабди. Тус һуралсалай үедэ хүүгэд дуулажа, хатаржа һурана. Буряад хэлэ һайнаар үзэгты гэжэ сэсэрлигтэ ябадаг үхибүүдтэ хүсэхэ байнаб, - гэжэ Оксана Александровна хэлэнэ.

“Алые паруса” гэһэн сэсэрлигэй ахамад хүмүүжүүлэгшэ Лариса Сергеевна Зиннатуллинагай үхибүүн баһа буряад хэлэн дээрэ дуугаржа һурана. Эжынь тон баяртай.

- Манай сэсэрлигтэ үхибүүд хоёр наһатайһаа буряад хэлэ шудалжа эхилнэ. Бүхэли үдэр тэдэнтэй хүмүүжүүлэгшэд болон багшанар хүдэлнэ. Нааданай талмай дээрэ, эдеэлхэ үедэнь, гар хүлөө угааха зуурань буряад хэлэн соностоно. Манай һанамжаар, буряад хэлээр мэдэсэеэ хүбүүд, басагадай хаанашье ябахадаа хэрэглээ һаань, туһатай байха, - гэжэ Лариса Сергеевна найдана.

Энэ һуралсалай үрэ дүнтэйгөөр ябуулагдажа байһые багахан Лиза Григорьева гэршэлнэ. Тэрэ гэртээ буряад хэлэн дээрэ дуугаржа, түрэлхидөө ехэтэ гайхуулаа ха.

- Гэртээ ошоод, буряадаар дуугархадамни, эжымни ойлгоногүй. Тиигэжэ эжыгээ һурганаб. Харин хоёр ахайнарни өөһэдөө буряад хэлэ мэдэдэг, - гэжэ Лиза хөөрэнэ.

Дэлгүүр ошоһондоо баярлаһан хүүгэд буряад хэлэн дээрэ дуу гүйсэдхэбэ. Мүн Лиза Григорьева уран һайханаар шүлэг уншаба.

Автор: Борис Балданов
Описание: Лиза буряадаар шүлэг уншажа байна