​Танилсагты: шэнэ редактор

Энэ долооной эхинһээ “Буряад үнэнэй” редактораар Бадмажаб Валерьевич Гындынцыренов томилогдобо.

Манай сониной уншагшадта энэ хүнэй нэрэ мэдээжэ, тэрэнэй бэшэһэн материалнуудые олониинь һанана ёһотой. Ушарынь гэхэдэ, Бадмажаб Валерьевич “Буряад үнэндөө” табан жэлэй туршада хүдэлһэн юм.

1991-1996 онуудта Буряадай гүрэнэй ехэ һургуулиин буряад хэлэ бэшэгэй факультедтэ һурахадаа, хоёр шэглэлээр эрдэм шудалжа, буряад журналистикын онол аргануудтай табан жэлэй туршада танилсаа. Тиихэ үедөө түрэл арадайнгаа уласай хэмжээнэй ори ганса сониндо дүй дүршэлөө мүлижэ, дээдэ эрдэмтэй болоһон мэргэжэлтэн юм.

Удаань 1996-2001 онуудта “Үнэнэйнгөө” редакцида сурбалжалагшаар, харюусалгата секретаряар ажаллаа. Һүүлэй арба гаран жэлэй туршада Буряад Уласайнгаа Засагай газарта оршуулагшын албанда хүдэлжэ байгаа. Тиигэжэ дээдэ гарай сэтгүүлшэ, оршуулагша болоһон намтартай.

Шэнэ редакторые хүндэтэйгөөр угтан абыт гэжэ та бүгэдэндөө хандахадаа, хүндэтэ уншагшад, буряад сониноймнай гол шэглэлнүүд хуушаараа үлэбэшье, тэрэнээ бүри һонирхолтой болгохоёо оролдохобди гэжэ найдуулнаб. Газаамнай шууяжа байгаа орёохон сагтаа тааруу зохид материалнууд олон болгохо, шэнэ нэрэнүүдые сонинойнгоо нюурнуудһаа таанартаяа танилсуулха һанал бии. Сонин уншагша хоёрой хоорондохи холбоо барисаанай һайхан заншалнуудые нягтаар сахижа, улам бүри бэхижүүлхэеэ оролдохо хэрэгтэй. Үндэһэн хэблэл болохо “Үнэндөө” үргэн дэлисэтэйгээр захил хүүлэхэ ажал – урдамнай. Хото хүдөөгэй һонинуудые түргэн шуумгайгаар танайнгаа һонорто дурадхажа байхабди. Энэ бүхы ажалда сониной шэнэ редакторай үүргэ сэгнэшэгүй ехэ.

Танай зүгһөө, хүндэтэ манай уншагшад, Бадмажаб Валерьевич Гындынцыреновтэ зохёохы амжалта, зорилгонуудаа бэелүүлхыень хүсэнэб.

ЭГЭШЭ НҮХЭРТӨӨ БАЯР ХҮРГЭНЭБДИ

Һүүлэй 13 гаран жэлэй туршада манай Хэблэлэй байшанай юрэнхы захиралай нэгэдэхи орлогшоор, секретариадай хүтэлбэрилэгшөөр, мүн тиихэдэ “Үнэнэйнгөө” редактораар амжалтатайгаар ажаллажа байһан Туяна Владимировна Самбялова энэ һарын эхиндэ өөрынгөө һайн дураар мэдүүлгэ барижа, тушаалаа орхёод, наһанайнгаа амаралтада гараба.

Автор: Радна-Нима Базаров
Описание: Туяна Владимировна Самбялова

Туяна Самбялова – Буряад орон соогоо, тиихэдэ түрэлхи хэлэн дээрэмнай 95 жэлэй туршада хэблэгдэн гаража байһан түүхэтэ ганса сониноймнай дэлхэйн ямаршье буланда ажаһуудаг бүхы уншагшадта мэдээжэ сэтгүүлшэн юм. 32 жэлэй туршада бүгэдэ арадайнгаа сониндо зохёохы ажал ябуулхадаа, миин лэ үдэр бүриин уялга дүүргэжэ ябаа бэшэ, харин харюусалга ехэтэй албаа хаагаа гэхэдэ, алдуугүй.

Буряад Уласай, Ородой Холбооной соёлой габьяата ажал ябуулагша, хэлэ бэшэгэй эрдэмэй дид-доктор Туяна Самбялова Эрхүүгэй гүрэнэй Александр Ждановай нэрэмжэтэ ехэ һургуулиин хэлэ бэшэгэй факультет амжалтатайгаар түгэсэһэнэйнгөө удаа дүрбэн жэлэй туршада һургуулиин багшаар ажаллаад, 1985 ондо “Буряад үнэнтэеэ” хуби заяагаа холбоо. Түрүүн юрын сурбалжалагшаар ажалаа захалаад, уданшьегүй таһагые даагшаар томилогдоһон байха юм.

Шэнэ үеын шэрүүхэн һэбшээн соо түрэл сонинойнгоо дарганарай нэгэн боложо, ажалаа бүри эршэдүүлээ. Эндэ ганса зохёохы бэлиг талааниинь бэшэ, мүн тиихэдэ хүтэлбэрилхы ажалда дүйтэй байһаниинь элирээ бшуу. Гадна, бэшэжэ эхилһэн залуушуулые Туяна Владимировна дали дороо абахадаад, тэсэбэри ехэтэйгээр тэдэнээ тэнжээжэ, түрэлхи хэлэн дээрээ бэшэдэг сэтгүүлшэнэй хүнгэн бэшэ ажалай нюусануудтай танилсуулхадаа, хэды ехэ буян үйлэдөөб даа!

Али олон сэдэбээр ямаршье жанрай материалнуудые түрэл сонинойнгоо нюурнуудта һонирхолтойгоор, уншагшадай зүрхэ сэдьхэл хүдэлгэхөөр, оршолондомнай боложо байгаа элдэб үйлэ ушарнууд тухай дары түргөөршье бэшэхэһээ гадна, шүлэгшье найруулжархиха, хүн зоноо хүтэлбэрилөөдшье шададаг юм манай Туяна Владимировна.