​Сэсэ буляалдаан

Түрэлхи хэлэнэй һайндэрэй үедэ Болбосоролой болон эрдэм ухаанай яаманай дэмжэлгээр юрэнхы һургуулинуудай дунда олон тоото хэмжээ ябуулганууд боложо байна. Уласай мүрысөөнүүдэй урда тээ аймаг, нютагуудаар урилдаанууд болодог гээшэ. Октябрь һарын 13-да Улаан-Үдын 47 дугаар һургуулида хотын дунда һургуулинуудай хоорондо оюун ухаанай «Мэргэн бодол» гэһэн наадан үнгэрбэ.

Эндэ дүн хамта таба-табан хүнһөө бүридэһэн 28 һургуулинууд хабаадалсаһан байна. Наадан харалгын, аялга дуунай ба оюун ухаанай гэһэн гурбан шатаһаа бүридөө. Даабаринуудынь тон һонин байгаа. Жэшээлхэдэ, харалгын шатада самбар дээрэ элдэб бэшэгүүд, гэрэл зурагууд дурадхагдажа, иимэрхүү асуудалнууд табигдана: энэ ямар бэшэг бэ? – хуушан монгол, тэнгэриин бэшэг; буряад малгайн энэ зүйл нэрлэгты – залаа г.м.

Аялга дуунай шатада ямар нэгэ дуунай хүгжэм гүйсэдхэгдэжэ, дуунай нэрэ, авторые таагты гэһэн гү, али ямар зэмсэг дээрэ аялга зэдэлнэб гэһэн даабари үгтэнэ.

Автор: Елена Дамдинова
Описание: 1-дэхи ангиин һурагшад

Харин оюун ухаанай шатада хүнгэншье, хүшэршье асуудалнууд байгаа: шара хадаг ямар удхатайб? Витим мүрэниие ондоогоор ямар мүрэн гэдэг бэ?«Ташаагаа бү тула» гэһэн үгэнүүдэй удха тайлбарилагты; Улаан-Үдэ хотын олонхи барималнуудай автор хэн бэ? Улаан-Үдэ хотодо А.С. Пушкин, М. Горький гэгшэдэй хүшөөнүүд бии, ородой үшөө ямар уран зохёолшын хүшөө бииб гэхэ мэтэ.

Һурагшад яһала һайн дүнгүүдые харуулжа, тэдэнэй дундаһаа эгээл эрхимүүдынь – 9, 14, 20, 29, 47-дохи һургуулиин шабинар хахад финалда тулалдаба. Тиин нэгэдэхи һуури хотын 14-дэхи һургуулиин бүлэг (багшанарынь Дарима Дамбаевна Гомбоева, Маргарита Владимировна Лубсанова) эзэлбэ. Харин хоёрдохи, гурбадахи һууринуудта 47-дохи һургуулиин (багшань Дарима Токтохоевна Очирова), 29-дэхи буряад гимназиин (багшань Бутид Цырендоржиевна Цыремпилова) һурагшад гараба. Нааданда хабаадагшадта тусхай үнэмшэлгэнүүд барюулагдаба.

Автор: Елена Дамдинова
Описание: Мүрысөөнэй үедэ