​Удхатай уулзалга

Намарай намжаахан үдэр, октябриин 7-до, Багшанарай колледждо һонин уулзалга болобо. Алдарта уран зохёолшо Даши-Рабдан Одбоевич Батожабайн наhанай хани нүхэр Лхамасуу Батуевна Батожабай колледжын оюутадтай уулзалгада айлшаар морилоо ха юм.

Энэ намартаа 92 наhанайнгаа дабаан дээрэ алхалжа ябаһан Лхамасуу Батуевна сарюун дорюун зандаа, ерээдүйн багшанартай уулзаhандаа баяртай, уриханаар энеэбхилэн, иигэжэ хөөрэбэ:

- Даши-Рабдан Одбоевич олон ном, зүжэгүүдые бэшэhэн, «Адуушанай дуун» гэжэ кино табиhан юм. Эсэгэ ороноо хамгаалгын дайнай үедэ самолёдоор ниидэжэ, байлдаанай тэмсэлдэ дайшалхы габьяатай байгаа. Дайнай hүүлээр ехэ ажал хээ hэн. «Төөригдэhэн хуби заяан» гэжэ гурбалжан боти ном бэшээ юм. Иигэжэ Даши-Рабдан Одбоевичой зохёохы ажал мартангүй, дурсажа байхадатнай, намайе уриһандатнай, тон ехэ баярланаб. Эрдэм номоо һайнаар үзэжэ, ажал хэрэгтээ амжалтатай, зол жаргалтай, элүүр энхэ ажаhуухатнай болтогой.

Даши-Рабдан Батожабайн дайшалхы ба зохёохы ажал тухай ехэ һонирхомоор, гүнзэгы удхатайгаар оюутад хөөрэбэ. Багшанарай колледжын багшанар Баярма Бастуевна Лхасаранова, Надежда Бадмаевна Дондокова, “Байгал” сэтгүүлэй редактор Галина Хандуевна Дашеева-Базаржапова, Үндэһэнэй номой сангай ажалшан Рэгзэма Гомбоевна Батомункуева гэгшэд Лхамасуу Батуевнада баярай үгэнүүдые хэлэбэ, бэлэгүүдые бариба.

Даши-Рабдан Батожабайн “Багшашни хэн бэ?” гэжэ зохёолһоо Чулуун-Батын хото ерээд ябаһан тухай оюутад зүжэглэмэл хэһэг харуулба. Эрдэм Дымбрылов Энхэбата хоёр хуур дээрэ хүгжэм зэдэлүүлбэ. “Буряад” гэжэ дуу Монгол оронһоо һурахаяа ерэһэн оюутан басаган тон гоёхоноор дуулаһан байна.

Лхамасуу Батуевна Батожабай багшанарта, hурагшадта баярые хүргэбэ.