​Таһархай туһа эринэ

Түнхэнэй уг гарбалтай Советскэ Союзай Баатар, мэргэн буудагша, суута Жамбал Ешеевич Тулаевай Таһархай тоонтодо шэнэ спортын байшан гурбадахи жэлээ ашаглалда тушаагданагүй. Энэ орёо мэдээсэл Таһархайн эдэбхитэд интернет сүлжээндэ оруулжа, мүнгэ алтаар туһалхые хүн зониие гуйжа байһанаа мэдүүлнэ.

Хоридохи зуун жэлэй 1990-ээд онуудһаа хойшо Таһархайда соёлой болон спортын байшан үгы юм. Мүнөөшье болотор эндэхи залуушуул спортын элдэб зүйлнүүдээр бэеэ һорихоёо, тоглолто наада харахаяа дүтэ бэшэ хүршэ нютагуудта ошоно.

Нютагтаа спортын байшаниие арад зон өөһэдын хүсөөр бодхоожо эхилэнхэй. Нютагай хаягдаад байһан хуушан байшан заһабарилагдана. Бетон һуури шудхагдаһанай удаа эгээл гартаа шандааһатай бэе элүүр нютагай бүхы эрэшүүл барилгын модо бэлдээ. Удаань 20 гаран хүн сугларжа, спортын байшан бодхоожо, бүхы хушалта хэжэрхёо.

Тус байшаниие бодхоожо байһан “Амар гол” ТОС-ой хүтэлбэрилэгшэ Нима Сагалуевай хэлэһээр, спортзал соо пластикова сонхо хэгдээ, дулаасуулгын соргонууд дамжуулагдаа, сахилгаан татагдаа.

Досоохи болон газаахи заһабарилгын ажалнууд, шэрдэлгэ сагаадалга үлөө. Бүхы дээрээ 350 мянга гаран түхэриг мүнгэн дуталдана. Манай нютагай ажаһуугшад 2017 онойнгоо Шэнэ жэл энэ спортын байшанда угтаха бэзэ гээд найдана гэжэ Нима Сагалуев хэлэнэ.

Тус байшанда ганса спортын мүрысөөнүүд болохо бэшэ, мүн бүхы нютагай найр наадан үнгэргэгдэхөөр хараалагдана. Юуб гэхэдэ, тэндэ тусхай тайзан табигдаха юм.

Социальна сүлжээ холбоон соохи 1500 хүнүүдэй энэ хэрэгтэ 200 түхэриг дамжуулбал, шэнэ спортын байшан декабрь һарада үүдэеэ сэлихэ һэн ха.

Туһа хүргэхэ гэбэл, Сбербанкын иимэ дансада мүнгэ дамжуулха аргатайт - 4276 1800 1339 9562 (Нима Сагалуев), мобильна банк – 89244548929.