​Шагай наадантай танилсалга

"Журавлёнок” гэһэн хүүгэдэй сэсэрлигтэ үхибүүдые буряад хэлэндэ, ёһо заншалнуудта һургажа эхилээ. Һаяхан эндэхи шабинар Шагай нааданай нюусануудтай танилсаба.

Эндэ Дэжэд Владимировна Матвеева гэжэ буряад хэлэнэй багшын ударидалга доро багашуул үгэнүүдые сээжэлдэнэ, үндэһэн наадануудтай танилсана.

Хэшээлдээ табатайхан хүбүүд, басагад Шагай нааданда һураа. Хэдэн үдэрэй туршада тэдэ гэрэй табан амитадай тоодо юун ороноб гэжэ шудалаа. Тиихэдээ нэн түрүүн тэдэнэй дүрсэтэй нааданхайнуудые таһалга соогоо бэдэрэн оложо, һураһанаа дабтаа. Удаань тэдэ Шагай наадан тухай анхаралтайгаар шагнабад. Хэдэн хэшээлнүүдэй һүүлээр хүбүүд, басагад Шагай нааданда һураад байха бэзэ гэжэ һанагдана.

- Манай “Журавлёнок” сэсэрлигтэ туршалгын талмай байгуулагдаа һэн. Энэмнай хүүгэдые хүгжөөлгын тусхай программа дээрэ үндэһэлнэ, тиин манай хүүгэд буряад-ород-англи хэлэнүүдые шудална. Забһарлалай үедэ, үдэрэй хоол бариха сагта, наадажа байхадань, буряад хэлэн дээрэ хөөрэлдэжэ, ажалаа ябуулнабди. Гадна ёһо заншалнуудтай танилсуулха зорилготойбди, - гэжэ Дэжэд Владимировна хөөрэнэ.

“Журавлёнок” сэсэрлигтэ ябадаг үхибүүд бултадаа буряад хэлэ үзэнэ гэжэ тэмдэглэхэ хэрэгтэй. Зургаан бүлэгүүдтэ өөһэдөө хүмүүжүүлэгшэд хүдэлнэ, харин юһэн бүлэгүүдтэнь Дэжэд Владимировна заана гээшэ.

Автор: Борис Балданов
Описание: Үхибүүд шагай наадана