​Тэнгэриин жаргалан үзэхэ

Октябриин 25-да Буряадай гүрэнэй ехэ һургуулиин Зүүн зүгэй факультедэй оюутадтай энэл һургуули дүүргэгшэ, Ородой Уран зохёолшодой холбоондо эгээл залуугаар абтаһан гэшүүн, будаадын шажан шэнжэлэгшэ, оршуулагша Амгалан Будаев уулзалга үнгэргэбэ.

БГУ-гай үнинэй багша Сергей Ошоров бултаниие танилсуулжа, Амгалан Будаевай һанамжануудые хадуужа абахыень оюутадта хүсэбэ. Амгалан Александрович һүүлэй хэдэн жэл соо Бурханай номуудые буряадшалая, хүн зонойнгоо ойлгохоор уншая гэжэ уряалдаг, “Буряад үнэндөөшье” иигэжэл бэшэдэг.

-Ламанарай түбэд хэлээр юу уншажа байһыень ойлгонгүй, юу сонососожо байһанаа мэдэхэгүй гээшэмнай, сэхыень хэлэбэл, мухар һүзэг болоно, - гэжэ Амгалан батална. Түрэл буряад хэлээрээ бү уншая гэхэ хэн байха һэм даа, тиигэбэшье ямаршье хэлээр уншажа байхадань яахаб, “һанаһан хэрэгнай номуун ёһоор бүтээд лэ байбал” гэжэ ехэнхи һүзэгтэйшүүл һанамжална. Теэдшье наһаараа бурханай сударнуудые түбэдөөр соносожо байһан наһатайшуул иимэ дурадхалые балайшье дэмжэнэгүй.

Тиимэһээл Амгалан Будаевай залуушуулай анхарал хандуулха гэжэ оролдоһониинь зүбтэй хаш. Буряад оюутад шажан мүргэлэй дэлгэржэ байһан мүнөө үедэ анхарнал даа.

Энэ уулзалгын үедэ Амгалан Будаев оюутадта буряадаараа “Табан һахил”, “Найман һахил” гэһэн ойлгосонуудые табиба.

-Эдэ һахилнуудые зүб мүрөөр сахижа ябаһан хүн хэдышье түрэлдөө тамын орондо түрэхэгүй, харин тэнгэриин жаргалан үзэхэ юм, --гэжэ номногдоно.