1602
Үнгэрһэн долоон хоногто буряадаар дуугардаг хүүхэлдэйнүүдтэй танилсалга болобо. “Манай багашуулда” гэһэн проектын дүнгүүдые согсолһон энэ хэмжээ ябуулга буряад хэлэнэй үдэрнүүдтэ дашарамдуулагдаа.
Үндэһэнэй номой сангай түб танхимда танилсалгые Түнхэнһөө уг гарбалтанай “Саяан” бүлгэм үнгэргөө. Ушарынь гэхэдэ, тэдэ Буряад Уласай Засагай газарай соносхоһон буряад хэлэ дэлгэрүүлхэ талаар түсэлнүүдэй мүрысөөндэ шалгаржа, грантда хүртэhэн байна.
Фото Бориса БАЛДАНОВА
Буряад Уласай Болбосоролой болон эрдэм ухаанай яаманай сайдай уялгануудые дүүргэгшэ Баир Жалсановай хэлэһээр, түрэлхи хэлэн дээрээ дуугардаг хүүхэлдэйнүүдэй бүтээгдэһэндэ баярламаар лэ байна.
- Һүүлэй мэдээгээр, буряад үхибүүдэй арбанай дүрбэниинь түрэл хэлэеэ мэдэнэ. Тиимэһээ үхибүүдые бага наһанһаань хэлэндэнь дуратайгаар хүмүүжүүлхэ гээ-шэ тон шухала. Энэ хэрэгтэ нааданхайнуудые хэрэглэлгэ горитой үүргэ дүүргэхэ байха, - гэжэ Баир Жалсанов хэлээ.
«Манай багашуулда» гэhэн проектын хүтэлбэрилэгшэ Оюна Забановае Буряад Уласай үндэhэтэн хоорондын харилсаануудай ба эрхэтэдэй үүсхэл хүгжөөлгын хорооной зүбшэлэгшэ Ринчима Романова, «Буряад үнэн» Хэблэлэй байшангай захирал Баир Балданов гэгшэд амаршалбад.
Фото Бориса БАЛДАНОВА
- Энэ проектын гол зорилго хадаа жаахан үхибүүдые буряад хэлээр hонирхуулалга болоно. Оюна Александровна сагай эрилтэдэ таарама ажал хэһэн байна. Юуб гэхэдэ, хүүгэдэй сэсэрлигүүдтэ һургалгын шэнэ онол арга-нууд бэелүүлэгдэжэ байна, - гэжэ педагогикын эрдэмэй кандидат Оксана Дареева хэлэбэ. - Жаахан үхибүүд түрэл арадайнгаа бүхы баялиг бэедээ дүүрэн шэнгээ-жэ абаг лэ гэжэ оролдожо байнабди. Тиимэһээ энэ хүүхэлдэйнүүдэй шарайнь буряад, хубсаһа хунарынь үндэһэн маягтай: дэгэл, малгай, гоёолтонууд. Мүн хэлэхэ материалынь яһала нари-наар шэлэгдэжэ абтаһан байна. Оюна Александровна олон тоото эрдэмтэдээр, багшанараар, түрэлхидөөр хөөрэлдэжэ, хүүхэлдэй юун гэ-жэ дуугархаб, ямар үгэнүүдые хэлэхэб, ямар шүлэгүүдые уншахаб, дуу гүйсэдхэхэб гэжэ шэлэжэ абаһан байна. Иимэ гоё хүүхэлдэйгөөр наадаһан үхибүүн буряадаар хэлэжэ һураха, олоһон шадабарияа һүүлдэнь ажабайдалдаа хэрэглэжэ шадаха гээд һанагдана.
Фото Бориса БАЛДАНОВА
Тус проектдэ эдэбхитэйгээр хабаадалсажа, буряад хэлэеэ урагшатай-гаар заажа байhан арба гаран аймагуудай болон Улаан-Үдэ хотын сэсэрлигүүдтэ Баярай бэшэгүүд болон хүүхэлдэйнүүд барюулагдаа.
“Хүүхэлдэйн дүрэ ямар байхаб гэжэ hанахадаа, үхибүүдэйнгээ нюур шарайтай адлинуудыень шэлээбди,” - гэжэ Оюна Забановагай хэлэхэдэ, буряад хубсаһа үмдэнхэй гурбан наһатай Түмэн Забанов болон хоёртойхон Дашима Бугалова сугларагшадай нэрьемэ альга ташалган доро гаража ерээ.
Фото Бориса БАЛДАНОВА
Петр Чайковскиин нэрэмжэтэ Соёл, уралигай колледжын оюутад, Улаан-Үдэ хотын 35-дахи hургуулиин 6-дахи ангиин hурагша Арюна Бугалова, Улаан-Үдын «Зорька» болон «Сибирячок» гэһэн сэсэрлигүүдэй хүбүүд, басагад энэ хэмжээ ябуулгые дуу, хатараараа шэмэглэбэ.
Фото Бориса БАЛДАНОВА
- Хүүхэлдэйнүүд «Түмэн» ба «Дашима» гэжэ булта ойлгообди. Досоонь багшын хэшээлдээ хэрэг-лэхэ аудиоматериалнууд оруулагданхай, - гэжэ Оюна Александровна хөөрэнэ. - Түнхэн аймагай Зүүн-Морин һууринһаа уг гарбалтай Светлана Гомбоевна Тускенова хүүхэлдэйнүүдые аргагүй
гоёор хубсалуулна. Буряад Уласай Үндэhэнэй 1-дэхи лицей-интернадай 2-дохи ангиин hурагша Адиса Михайловагай болон 8-дахи ангиин hурагша Эрдэни Матхановай хоолойгоор хүүхэлдэйнүүднай дуугарна. Абяануудые досоонь оруулдаг хүн Тамир Шобоев болоно.
Фото Бориса БАЛДАНОВА
Автор: Борис БАЛДАНОВ
