​"Найдал" санда амжалта хүсэе

"Найдал” гэжэ сангай соносхоһон урилдаанай дүн согсологдобо. Та, уншагшад, “Найдал” сан тухай дуулаа байхат. Энэ сан хадаа буряад хэлэ дэмжэхэ зорилгоор байгуулагдаһан ниитын сан жаса юм. “Диамед” гэжэ эмнэлгын клиникын ахамад эмшэн Юрий Содномович Балханов тус сан байгуулжа, гурбадахи жэлээ хүтэлжэ байна. Юрий Балхановтай хамта “баруун гарынь” болохо Улаан-Үдэ хотын захиргаанай албан тушаалтан, урагшаа һанаатай залуу Эрдэни Чимитович Дымчиков энэ ажалда ехэ туһалдаг.

«Найдал» сан болбол буряад хэлэн дээрэ ном судар хэблэхэ, аудио-видео бэшэлгэ хэхэ, компьютерай программа зохёохо, хүүгэдэй наада тоглоом һанаха түсэлнүүдтэ (проектнүүдтэ) мүнгэ һомолдог юм. Али нэгэ түсэл дэмжэхын урда олон ажалнуудые суглуулжа, тэдэнээ һайса шэнжэлдэг. Тиигэжэ эгээл һайн ажалыень шэлэжэ абаад, мүнгэ һомолжо, бэелүүлхые бодолсоно.

Энэ жэл 400 мянган түхэригэй бюджедтэй байба. «Найдал» сангай соносхоһон урилдаанда 35 ажал дурадхагдаһан байгаа. Тиигэжэ тэдэнэй 9 түсэлынь шэлэгдэжэ, грантда хүртэхэ болоо.

“Аудио, видео түсэл” гэһэн номинацида шалгарһан түсэлнүүдтэй танилсая:

- “Би буряад хүн” гэһэн удхатай видео-ролигууд буулгагдажа, зурагтаар харуулагдаха. Зохёогшо – Булат Будацыренов;

- “Мүнөөдэрэй үгэ” гэжэ түсэлөөр Баргажанай дунда һургуулида үдэр бүри буряад үгэдэ һуража байха хүтэлбэри бэелүүлэгдэхэ;

- “Хүхюу буряад” гэжэ түсэлөөр хошон шог хөөрөөнүүдые бэлдэжэ, Буряад ФМ радиодо гаргажа байха;

- “Хатхуур Зүү” гэжэ нэрэтэй түсэлөөр залуу дуушад тухай видео фильм буулгагдаха. “Хатхуур Зүү” гэжэ дуушадай хамталиг рок, поп маягай дуу гүйсэдхэдэг, залуушуул ехэ шагнаха дуратай байдаг.

“Уран түсэл” гэһэн номинаци:

- “Наадхуур” гэжэ нэрэтэй гар утаһан (телефон) соо хүүгэдэй наадаха тоглоом зохёолго;

- Томошуулые буряад хэлэндэ хурдан һургаха ном “Мэндээ!”. Иимэ ном Буряадай гүрэнэй университедэй багшанар зохёожо байна;

- Дээдэ Онгостой дасанай дэргэдэхи “Зандан Жуу” түбтэ буряад хэлэ, хуушан монгол бэшэг, буряад-монгол соёл, заншал зааха хэшээлнүүд эмхидхэгдэхэ. Энэ хэшээлдэ дуратай хүн амаралтын үдэрнүүдтэ ерэжэ байхада болохо юм.

“IT-түсэл” номинацида:

- Буряад хэлэн дээрэ мультфильмнүүд буулгагдаха. Зохёогшо – Степанов Сергей;

- Интернедтэ буряад хэлэн ба буряадууд тухай гоё зурагууд зурагдажа, тараагдажа байха ажал болоно.

«Найдал» санда ба түсэлөө бэелүүлжэ эхилһэн хүнүүдтэ амжалта хүсэе! Буряад хэлэн дээрэ элдэб шэнэ түсэлнүүд түрэжэл, хэгдэжэл байг лэ даа.