​Нигүүлэсхы сэдьхэлэй уряа доро

Мүнөөнэй шэмэрүүн сагта үхибүүдэй сэдьхэл хатуужуулангүй, энхэргэн зөөлэнөөр хүмүүжүүлхэ гээшэ багшанарай шухала зорилгонуудай нэгэн болоно. Энээниие Стеклозавод һууринда оршодог юрэнхы һуралсалай 43-дахи дунда һургуулиинхид өөрынхеэрээ бэелүүлхэ гэжэ оролдоно.

Энэ һургуулида хамта дээрээ юһэн зуугаад үхибүүд һурадаг юм. Һуралсалай жэлэй эхилһэнһээ хойшо багшанар хэшээлнүүдһээ гадуур элдэб хэмжээ ябуулгануудые үнгэргэжэ, һурагшадайнгаа сүлөө саг эзэлнэ.

Сентябрь һарада алтан намарай һайндэр «Байгаалияа хамгаалая!» гэһэн уряа доро үнгэргэгдэһэн байна. Хүүгэд байгаалида зорюулагдаһан зурагуудай үзэсхэлэн дэлгээжэ, олоной һонорто дурадхаа юм.

Автор: Елена Дамдинова
Описание: Үхибүүдэй зурагууд

Удаань октябриин 1-дэ тэмдэглэгдэдэг Наһажаал зоной һайндэртэ зорюулан, үхибүүд элдэб открыткануудые, зөөлэн нааданхайнуудые өөһэдынгөө гараар бүтээгээд, Улаан-Үдэ хотын Мокровой гудамжада оршодог «Доверие» гэһэн наһатайшуулай интернадай үбгэд, хүгшэдтэ бэлэглээ. Эдэ бэлэгүүдынь нэгэл жэгдээр үнгэржэ байдаг наһатай зоной үдэрнүүдые шэмэглэжэ, зүрхэ сэдьхэлыень баярлуулһаншье, уяруулһаншье байна. Үтэлжэ ябаһан үншэн хэнзэ наһатайшуулда хүүгэдэй амаршалгын үгэнүүдэй, багаханшье һаа, бэлэгүүдэйнь аргагүй сэнтэй байһаниинь дамжаггүй.

Гадна, тус һургуулиин һурагшад «Экобатл» гэжэ акци үнгэргэжэ, хэрэггүй болоһон саарһа (макулатура) болон батарейнуудые суглуулжа тушаагаа юм. Энэнь мүн лэ эхэ байгаалияа бог шоройһоо арилгаха хүсэлэнтэй үйлэ болоно. Һурагшадые урмашуулхын тула мүрысөөн соносхогдоо. Тэрэнэй дүнгөөр эхин ангинуудай дунда 3 «В» (багшань Эржэна Бабасановна Цырендоржиева), томошуулһаа 6 «Б» (багшань Ирина Николаевна Колмакова) шалгаран гаража, түрүүшын һууринуудые эзэлээ. Эрхимлэһэн 3 «В» ангиин шабинар багшатаяа уласай һурагшадай эколого-биологическа түб (РЭБЦУ) ошожо, тэндэхи ажабайдалтайнь, үйлэ хэрэгүүдтэйнь дүтөөр танилсаба. Багшанараарнь, һурагшадаарнь уулзажа, һонирхолтой хөөрэлдөөнүүдые эмхидхэжэ, хайшан гэжэ амитадые харууһалдаг, ургамал ногоо ургуулдаг бэ гэхэ мэтэ асуудалнуудые зүбшэн хэлсэжэ ерээ.

Үнгэрэгшэ һарын туршада Улаан-Үдэ хотодо «Энэрхы сэдьхэлэй үдэр» гэһэн гаршаг доро эзэгүй, зольбо амитадые аршалха зорилготойгоор хэдэн акцинууд үнгэрөө гэжэ бултанда мэдээжэ. Энэ хэрэгтэ 43-дахи һургуулиин шабинар мүн лэ өөрынгөө хубита оруулаа. Тиин тэдэнэр нохойн эдихэ хуурай эдеэ хоол (гэртэхи эдеэ хоолой үлөөдэһэн бэшэ, харин дэлгүүрэй наймаанай зүйл) һайн дураараа суглуулхадань, амитадые байрлуулдаг «Надежда» гэһэн эмхиин хүдэлмэрилэгшэд ерэжэ абаашаһан байна.

- Бидэ энэ намарһаа эхилжэ, социальна шэглэл баримталан, һурагшадые хүмүүжүүлхэ гэһэн тусхай зорилго табиһан байнабди. Юуб гэхэдэ, һүүлэй үедэ ехэнхидээ Эхэ орондоо дуратайгаар (патриотическа), соёл урлагаар һонирхуулан, уран һайханай талаар хүүгэдые хүмүүжүүлхэ хүдэлмэри ябуулагдана. Манай һургуулиин шабинарай далан хубинь хүндэ байдалтай, хүсэд бэшэ гэр бүлэтэй гү, али үншэн үхибүүд юм. Олонхи ушарта ганса хүүгэд бэшэ, зарим гэртэхиншье бүхы юумэндэ эдлэхэ, хэрэглэхэ гэһэн хандасатай байдаг. Тиимэһээ бидэ һурагшадай сэдьхэлдэнь, ухаан бодолдонь хайрлаха, гамнаха, сэгнэхэ мэдэрэлнүүдые һэргээхэ ажал ябуулһан байнабди. Хүүгэдые өөһэдыень иимэрхүү хэмжээ ябуулгануудта, үйлэ хэрэгүүдтэ хабаадуулхада, үрэ дүнтэй байха гэжэ найданабди, - гэжэ хүмүүжүүлгын талаар захиралай орлогшо Баярма Батуевна Цыбенова хэлэнэ.

Үнэхөөрөөшье, үхибүүд өөһэдөө хоёр нюдөөрөө хаража, хоёр гараараа буянтай үйлэ бүтээжэ байхадаа, аха, наһатай зондо, тойроод байһан эхэ байгаалидаа, зобоһон тулиһан амитадта хандасаяа ондоо болгохо, хайрлаха, гамнаха, сэгнэхэ мэдэрэлтэй болохо гэжэ һанагдана. Хүн бүхэн уярха сэдьхэлтэй, хайрлаха һэшхэлтэй ха юм. Тэрэнииень дэмжэн хүмүүжүүлхэ гээшэ шухала хэрэг болоно.