932
Үнгэрһэн долооной эсэстэ буряадаар дуугардаг хүүхэлдэйнүүдтэй танилсалга болобо. “Манай багашуулда” гэһэн түсэлэй дүнгүүдые согсолһон энэ хэмжээ ябуулга буряад хэлэнэй үдэрнүүдтэ дашарамдуулагдаһан байха юм.
Үндэһэтэнэй номой сангай түб танхимда танилсалгые Түнхэнһөө уг гарбалтанай “Саяан” бүлгэм үнгэргөө. Ушарынь гэхэдэ, Буряад Уласай Засагай газарай соносхоһон буряад хэлэ дэлгэрүүлхэ талаар проектнүүдэй мүрысөөндэ тэдэ шалгаржа, грантда хүртэhэн байна.
Буряад Уласай Болбосоролой болон эрдэм ухаанай яаманай сайдай уялгануудые дүүргэгшэ Баяр Жалсановай хэлэһээр, түрэлхи хэлэн дээрээ дуугардаг хүүхэлдэйнүүдэй бүтээгдэһэндэ баярламаар лэ байна.
- Һүүлэй мэдээгээр, буряад үхибүүдэй арбанай дүрбэниинь түрэл хэлэеэ мэдэнэ. Тиимэһээ үхибүүдые бага наһанһаань хэлэндэнь дуратайгаар хүмүүжүүлхэ гээшэ тон шухала. Энэ хэрэгтэ нааданхайнуудые хэрэглэлгэ горитой үүргэ дүүргэхэ байха, - гэжэ Баяр Жалсанов хэлээ.
«Манай багашуулда» гэhэн проектын хүтэлбэрилэгшэ Оюна Забановае Буряад Уласай үндэhэтэн хоорондын харилсаануудай ба эрхэтэдэй үүсхэл хүгжөөлгын хорооной зүбшэлэгшэ Ринчима Романова, «Буряад үнэн» Хэблэлэй байшанай захирал Баяр Балданов гэгшэд амаршалбад.
- Энэ түсэлэй гол зорилго хадаа жаахан үхибүүдые буряад хэлээр hонирхуулалга болоно. Оюна Александровна сагай эрилтэдэ таарама ажал хэһэн байна. Юуб гэхэдэ, хүүгэдэй сэсэрлигүүдтэ һургалгын шэнэ онол арганууд бэелүүлэгдэжэ байна, - гэжэ багшын эрдэмэй дид-доктор Оксана Дареева хэлэбэ. – Жаахан үхибүүд түрэл арадайнгаа бүхы баялиг бэедээ дүүрэн шэнгээжэ абаг лэ гэжэ оролдожо байнабди. Тиимэһээ энэ хүүхэлдэйнүүдэй шарайнь буряад, хубсаһа хунарынь үндэһэн маягтай: дэгэл, малгай, гоёолтонууд. Мүн хэлэхэ материалынь яһала наринаар шэлэгдэжэ абтаһан байна. Оюна Александровна олон тоото эрдэмтэдээр, багшанараар, түрэлхидөөр хөөрэлдэжэ, хүүхэлдэй юун гэжэ дуугархаб, ямар үгэнүүдые хэлэхэб, ямар шүлэгүүдые уншахаб, дуу гүйсэдхэхэб гэжэ шэлэжэ абаһан байна. Иимэ гоё хүүхэлдэйгөөр наадаһан үхибүүн буряадаар хэлэжэ һураха, олоһон шадабарияа һүүлдэнь ажабайдалдаа хэрэглэхэ гээд һанагдана.
Энэ түсэлдэ эдэбхитэйгээр хабаадалсажа, буряад хэлэеэ урагшатай заажа байhан арба гаран аймагуудай болон Улаан-Үдэ хотын сэсэрлигүүдтэ Баярай бэшэгүүд болон хүүхэлдэйнүүд барюулагдаа.
Автор: Борис Балданов
Описание: Буряад хэлэ заадаг хүүгэдэй сэсэрлигүүдтэ иимэ гоёхон хүүхэлдэйнүүд бэлэглэгдээ
“Хүүхэлдэйн дүрэ ямар байхаб гэжэ hанахадаа, үхибүүдэйнгээ нюур шарайтай адлинуудыень шэлээбди,” - гэжэ Оюна Забановагай хэлэхэдэ, буряад хубсаһа үмдэнхэй гурбан наһатай Түмэн Забанов болон хоёртойхон Дашима Бугалова сугларагшадай альга ташалган доро гаража ерээ.
Петр Чайковскиин нэрэмжэтэ Соёл, урлагай колледжын оюутад, Улаан-Үдэ хотын 35-дахи hургуулиин 6-дахи ангиин hурагша Арюна Бугалова, Улаан-Үдын «Зорька» болон «Сибирячок» гэһэн сэсэрлигүүдэй хүбүүд, басагад энэ хэмжээ ябуулгые дуу, хатараараа шэмэглэбэ.
- Хүүхэлдэйнүүднай «Түмэн» ба «Дашима» гэжэ булта ойлгообди. Досоонь багшын хэшээлдээ хэрэглэхэ аудио-материалнууд оруулагданхай, - гэжэ Оюна Александровна хөөрэнэ. – Түнхэн аймагай Зүүн-Морин һууринһаа уг гарбалтай Светлана Гомбоевна Тускенова хүүхэлдэйнүүдые аргагүй гоёор хубсалуулаа. Буряад Уласай Үндэhэтэнэй 1-дэхи лицей-интернадай 2-дохи ангиин hурагша Адиса Михайловагай болон 8-дахи ангиин hурагша Эрдэни Матхановай хоолойгоор хүүхэлдэйнүүднай дуугарна. Тамир Шобоев абяануудые досоонь оруулаа.
Автор: Борис Балданов
Описание: Хүүхэлдэйнүүдэй дүрсэ Түмэн Дашима хоёрһоо һажаагдаа
Автор: Борис БАЛДАНОВ
