​Урин сагай шэмэг - "Улаалзай" гоё сэсэрлиг

Һаяхан бидэ Ивалга аймагай Оронго нютагай буряад шэглэлтэй «Улаалзай» сэсэрлигтэ айлшалбабди. Энэ сэсэрлиг 2013 ондо нютагай дунда һургуулиин урда талада нээгдэһэн байна.

Газааһаа эхилжэ, гоё һайханаар шэмэглэгдэһэн сэсэрлигэй үүдэ татан ороходо, досоонь дулаахан, һаруул танхим соо һэеы гэрэй ойро сэргэдэ уяатай морин эрдэни, хажуугаарнь табан хушуу мал бэлшэжэ ябана. Энэ гэр соонь сэсэрлигэй «Минии үлгы Оронго» гэһэн музей зохёогдонхой. Тэндэ урданай буряад зоной абажа ябадаг амһартанууд, хүүгэдэй үлгы, мориной зэмсэгүүд, ээрсэг гэхэ мэтэ зүйлнүүд дэлгээтэй. Сэсэрлигэй бүхы оршон байдалынь: нааданай, хүгжэмэй, тамирай танхимуудынь булта буряад маягаар шэмэглэгдэһэн гэжэ онсо тэмдэглэхээр.

Автор: Елена Дамдинова
Описание: Сэсэрлигэй бүхы оршон байдалынь буряад маягтай

«Улаалзай» сэсэрлигэй һуралсалай, хүмүүжүүлгын программанууд буряад зоной ёһо заншал, соёл болбосорол дээрэ үндэһэлэн зохёогдонхой юм. Һүүлэй сагта ехэ эрилтэтэй болоһон, буряад хэлэндэ һургахада тааруу «Амар мэндээ-э!» гэһэн номоор хүмүүжүүлэгшэд хүдэлнэ. Тус сэсэрлиг ном дээрэ хүдэлдэг бүлэгэй туршалгын талмай болоно. 2014 ондо «Улаалзайда» Буряад Уласай һургуулиин урдахи һуралсалай эмхи зургаануудай буряад хэлэнэй багшанарай тон түрүүшын семинар болон 2015 ондо аймагай һуралсалай хүдэлмэрилэгшэдэй августын бага хурал үнгэрһэн юм. Энэ хэмжээ ябуулгануудые эмхидхэжэ, олон айлшадые угтан абаха гээшэ ехэ харюусалгатай ажал болоно. Теэд энээниие эбтэй хүмүүжүүлэгшэд, хүдэлмэрилэгшэд, сэсэрлигые даагша Наталья Доржиева түрүүтэй дээдэ хэмжээндэ үнгэргөө һэн.

Автор: Елена Дамдинова
Описание: Тус сэсэрлиг туршалгын талмай юм

Хамта дээрээ наһанай талаар гурбан бүлэг боложо хубаарһан 89 хүүгэд сэсэрлигтэ ябадаг юм. Багашуулай «Наран» бүлэг Эржена Чингисовна Тулбуреева, дундахи «Бэрхэшүүлые» Ирина Баторовна Раднаева, ахамад «Эрдэмтэд» бүлэгые Светлана Сергеевна Мункуева гэгшэд хүтэлбэрилнэ. Эдэ бэрхэ хүмүүжүүлэгшэдээр хамта бэлигтэй ахамад методист Жаргалма Санжижаповна Токтохоева ажаллана. Тэдэнэр үхибүүдээрээ хамта «Сагаалган»,«Сагаан hарын амар мэндэ!», «Зунай наадан», «Минии тоонто», «Шагай наадан» гэхэ мэтэ аман зохёолой олон тоото һайндэрнүүдые, мүрысөөнүүдые болон «Оронго – минии үлгы», «Эрын гурбан наадан» болон бусад уран зурагай үзэсхэлэн үнгэргэдэг, зүжэг наада эмхидхэдэг юм. Иимэ зохид байдалда хүдэлдэг хүмүүжүүлэгшэдэй үдэр бүриин ажалайнь хубсаһанай баһал буряад маягтай байһаниинь һайшаалтай.

- Манай нютагта үнинэй «Вишенка» сэсэрлиг хүдэлдэг юм. Теэд һүүлэй үедэ хүүгэдэй тоо олошоржо, шэнэ сэсэрлиг нээхэ асуудал гараһан байна. Энэ сэсэрлиг нээхэдэмнай ехэ туһа хүргэһэн, дэмжэһэн манай нютагай хүбүүд - Дуйнхар дасанай шэрээтэ Буда ламада, Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ Цыденжап Бимбаевич Батуевта, Оронгын сомоной дарга Жамсо Владимирович Цыренжаповта, һургуулиин захирал Валентина Владимировна Будаевада, аймагай захиргаанда, һуралсалай таһагта болон нютагайнгаа зондо һайниие хүргэхэ байнаб, - гэжэ сэсэрлигые даагша Наталья Доржиева хэлэнэ.

Автор: Елена Дамдинова
Описание: Сэсэрлигэй хүмүүжүүлэгшэд