​Эрхүүдэ диктант бэшэнэ

"Эрдэм-2016” гэһэн бүгэдэ буряадуудай диктант Эрхүү хотодо үнгэрбэ. И.И. Молчанов-Сибирскиин нэрэмжэтэ эрдэмэй номой санда диктант бэшэлгэ болоо. Буряад хэлэн дээрэ диктант бэшэлгэ гурбадахияа үнгэрбэ. Энэ жэлдэ 25 хүн хабаадаба. 170 үгэһөө бүридэһэн диктантын текст Бадма Самбаава багшада зорюулагдаһан байгаа.

Гурбадахияа хабаадаһаншье зон олон байба, мүн баһа шэнэ хүнүүд нэмэжэ ерээ. Намжилма Цыденова дахин эндэ хабаадаба. Нёдондо энэ эгэшэмнай 96 балл абажа, хоёрдохи һуури эзэлээ һэн. Бальжин Раднаева баһа гурбадахияа хабаадаба, тэрэ 2014 ондо үндэр сэгнэлтэдэ хүртөө һэн. Шэнэ хүнүүдэй дунда Вера Егунова аша басагаяа дахуулжа, Боохон аймагай Дундай һууринһаа ерээ юм.

Бүхы ажалнууд шалгалтада Шэтэ эльгээгдэбэ. Ноябрь соо дүнгүүдынь соносхогдохо юм. Диктант бэшэлгые Үбэр Байгалай хизаарай Засагай газар, Агын Буряадай тойрогой захиргаан эмхидхэдэг болонхой. Хаа-хаанагүй хүнүүд диктант бэшээд, ажалнуудаа Шэтэ эльгээдэг юм.

Эрхүү хотодо диктант бэшэлгые Байгал шадархи үндэһэн арадуудай соёлой түб гэһэн гүрэнэй эмхи зургаан (хүтэлбэрилэгшэнь – А.А. Амагзаев) эмхидхэдэг.