​Урагшаа һанаатай, эрмэлзэл ехэтэй

Буряад ороной дэбисхэртэ арад зонойнгоо аша туhада ажалаа бүтээжэ ябаhан зон олон юм ааб даа. Тэдэнэй нэгэн Хэжэнгын аймагай РЭС-эй мэргэжэлтэн Цыпилма Дугарова болоно.

Цыпилма Сергеевна Хэжэнгэ аймагай Хөөрхэ нютагта 1980 ондо Дугаров Сергейн гэр бүлэдэ түрэһэн түрүүшын басаган юм. Цыпилма бага балшар наhанhаа абааштайхан зантай, hонор ухаатай, hүбэлгэн байhан. Нагаса аба, эжытэеэ үндыhэн тула баян хэлэтэй, ажалhаа айхагүй, шударгы бэрхэ хүн. 1986 ондо Хөөрхынгөө hургуулида орожо, эрхимээр hураhан намтартай. Һурагша ябаха үедөө аймагай олон тоото олимпиадануудта амжалтатайгаар хабаададаг hэн. 1997 ондо түрэл hургуулияа дүүргээд, Улаан-Үдын худалдаа наймаанай-экономическа техникумдэ hуража дүүргээд, 1999 ондо нютагаа бусаhан байна. 2000-2005 онуудта БГУ-гай буряад хэлэ бэшэгэй таhагта заочноор hураhан. Тиихэ үедөө нютагтаа болоhон хэмжээ ябуулганууд, ушарнууд тухай hонирхолтойгоор «Хэжэнгэ» сониндо бэшэжэ толилуулдаг hэн. 2003 ондо нютагайнгаа хүүгэдэй сэсэрлигтэ хүмүүжүүлэгшээр ороо, hургуулидашье багшалhан байна. Теэд 2005 ондо нютагайнь дунда hургуули хаагдажа, ганса эхин шатын классуудай үлэхэдэнь, ехэнхи багшанар, тэдэнэй тоодо Цыпилма Сергеевнашье аймагайнгаа түб зөөжэ ошоhон юм.

Ямаршье ажалда ороод хүдэлхэдөө, хаанашье hурахадаа, хэжэ байhан ажалдаа Цыпилма тон харюусалгатайгаар хандадаг, тиимэһээ суг хамта hураhан, ажаллаhан нүхэдынь тэрээн тухай хододоо дулаахан үгөөр дурсадаг.

Хэжэнгэ ерээд, баhал өөрынгөө hуража гараhан мэргэжэлһээ тад ондоо ажалда орожо, «МРСК Сибири» - «Бурятэнерго» гэгшын Хэжэнгын аймагай РЭС-тэ кладовщигаар ороhон байна. Эндэ хүдэлхэ үедөө аймагайнгаа ажаhуугшадые зайн галаар таhалдуулхагүйн тула заhабарилгын хэрэгсэлнүүдые саг соонь асаруулжа байха үүргэ дүүргэдэг болоо һэн. Жэлэй туршада бэеэ харуулаад, 2007 ондо техническэ хангалгын талаар инженерээр томилогдоhон байна. Хэжэ байhан ажалдаа оролдодог hэн тула мэргэжэлээ дээшэлүүлхэеэ БГСХА-да инженер-электригэй мэргэжэлээр 5 жэлдэ заочноор hуража гараа. Харюусалга ехэтэй ажалтай болоhониинь ойлгосотой. Аймаг соо зайн галай таhалдангүй байхын тула аргагүй ехэ ажал ябуулагдадаг. Хамаг подстанцинууд, зайн галай дамжуулагдадаг лининүүд, бахананууд саг соогоо заhабарилагдажа, шэнэлэгдэжэ байха ёhотой. Энэ мэтые Цыпилма Сергеевна хараадаа абажа, суг хамта хүдэлжэ байhан нүхэдэйнгөө хэхэ ажалайнь жэлэй түсэб табижа, SAP-программада оруулдаг байна.

Эдэбхи үүсхэл ехэтэй Цыпилма Сергеевна гол ажалайнгаа хажуугаар профсоюзай түрүүлэгшэ. Тиимэhээ ажалшадайнгаа дунда тамирай, уран hайханай мүрысөөнүүдые үнгэргэдэг байна. Буряад Улас дотор хүдэлдэг 7 РЭС-тэ ажалладаг зон зунай дулаахан сагта аймаг аймагтаа айлшалалсажа, спартакиада үнгэргэдэг hайхан заншалтай. 2-3 үдэрэй туршада ажалшад өөhэд хоорондоо мүрысэжэ, хаба шадалаа туршалсадаг. Цыпилма Сергеевнашье урилдаанда хабаададаг юм. Ондо ондоо аймагуудта ажаhуубашье, нэгэл ажал хэжэ ябаhан нүхэдтэеэ уулзажа, танилсажа амархада, саашанхи ажалдань туhатай. Иимэ уулзалганууд үрэ дүнтэйгөөр үнгэрдэг байна.

Амжалтатай хүдэлhэнэйнгөө түлөө Цыпилма Сергеевна олон тоото Хүндэлэлэй грамотануудаар шагнагданхай.

Эхэнэр хүнэй жаргал үри хүүгэдтээ гэhэн үгын ёһоор, Цыпилма Сергеевна эрхэ бэрхэ басагатай. Хэжэнгэ нютагта түбхинэжэ, гэр байра түхеэржэ, нагаса эжытэеэ ажана тэнюун ажаhууна. Гэртэнь ороходош, хүн зон олон, ходо халуун эдеэтэй, айлшадаа хүндэлэн угтажа абадаг. Олон нагасанарайнь үхибүүд хээтэйтэеэ байлсадаг. Нютагайнгаа эхин шатын hургуули дүүргээд, hуралсалаа үргэлжэлүүлхэеэ аймагай түб һурахаяа ерэдэг ха юм. Тиимэhээ Цыпилма ганса басагаяа хараад байдаггүй, баhал тэдэнэйнгээ түлөө харюусалгатай ябадаг.

Иимэл юрын буряад хүн - нютагайнгаа, аба эжынгээ нэрые дээрэ үргэжэ ябаhан эрхим мэргэжэлтэн.