​Спортын байшан барилгада туһална

Түнхэн аймагай Таһархай һууринай ажаһуугшад нютагтаа спортын байшан барижа дүүргэхын түлөө хүн зонһоо мүнгэ зөөри татана. Үнгэрһэн долоон хоногто Буряад Уласай Арадай Хуралай һунгамалнууд эндэхи байдалтай танилсаба.

Интернедээр дамжуулан, хүн зонһоо туһаламжа эриһэн “Амар гол” ТОС-ой хүтэлбэрилэгшэ Нима Сагалуевай хэлэһээр, олон хүн мүнгэ эльгээһэн байна. Туһа хүргэгшэдтэ бултандань тэрэ баяраа мэдүүлнэ.

Үшөө дүүргэгдээдүй спортын байшан орожо хараһан Арадай Хуралай һунгамалнууд ехэ ажал хэгдээ гэжэ тэмдэглэбэд.

- Манай нютагай зоной хүсөөр иимэ томо байшан бодхоогдобо гээшэ.Таһархайн ажаһуугшад эндэ юу барихабибди гэжэ суглаан дээрээ хөөрэлдэхэдөө, спортын байшан бодхоое гэжэ шиидээ һэн, - гэжэ Нима Сагалуев хөөрэнэ.

Спортын байшанай ашаглалгада үшөө тушаагдаадүйшье һаань, нютагай залуушуул эндэ олоороо сугларна. Үдэшэ бүхэндэ волейбол наадахаяа 30 гаран хүн ерэдэг. Мүн эдиршүүл барилдаагаар бэеэ һорижо эхилээ.

Буряад Уласай Арадай Хуралай Түрүүлэгшын орлогшо Владимир Павлов Таһархай нютагайхидта хэдэн зүбшөөл үгэбэ. Нэн түрүүн спортын байшан ашаглалгын баримта дансануудые (документ) бэлдэхэ хэрэгтэй. Юуб гэхэдэ, мүнөө дээрээ гансал газарай документ бэлэн болонхой.

- Шэнэ байшанда бэшэг баримтагүйгөөр гүрэнэй талаһаа тэдхэмжэ мүнгэн үгтэхэ аргагүй. Бэшүүр аймагта би өөрөө иимэ байдалтай ушараа һэм. Юуб гэхэдэ, тэндэхи нютагай зон өөһэдынгөө хүсөөр соёлой байшан бодхоожо эхилээд, дүүргэжэ шадаагүй байгаа. Тэдэнэй намда хандахадань, хүрэнгэ олоод дамжуулха гэхэдэмни, олон бэрхэшээлнүүд гараа, нэн түрүүн байшанай бэшэг баримта болоно. Тиимэһээ таанад түргөөр энэ хэрэгээ бүтээгты, - гэжэ Владимир Павлов хэлэбэ.

Энэ уулзалгада хабаадаһан Арадай Хуралай хорооной түрүүлэгшэ Борис Ботоев өөрынгөө зүгһөө табан мянган түхэриг үгэжэ, таһархайнхидые дэмжэбэ. Иимэрхүү дэмжэлгэнүүдэй олон байбал, Таһархай нютагайхид Шэнэ жэлые спортын байшан соогоо угтаха бэзэ гээд найдагдана.