​Дүү нүхэдөө баясуулаа

Улаан-Үдын 29-дэхи буряад гимназиин 2-дохи ангиин һурагшад үнгэрэгшэ долоон хоногой гарагай зургаанда хүүгэдэй 86-дахи сэсэрлигэй хүгжөөлгын түбтэ айлшалжа, дүү нүхэдтөө ёһотой һайндэр үнгэргэбэ.

Энэ жэлэй февраль һарада дээрэ нэрлэгдэһэн гимназиин, хүүгэдэй сэсэрлигэй түлөөлэгшэд буряад арадайнгаа аман зохёол, соёл урлаг дээрэ үндэһэлэн, үхибүүдээ хүмүүжүүлхэ зорилготойгоор дүй дүршэлөө андалдан, сугтаа элдэб хэмжээ ябуулгануудые үнгэргэжэ байха гэһэн хэлсээ баталһан байна. Багшанарай һанамжаар, юрэнхы болбосоролой болон сэсэрлигэй эмхи зургаануудай өөһэд хоорондоо иигэжэ нягта холбоотойгоор ажаллахада, ехэ һайн, үрэ дүнтэй.

«Оюна» сэсэрлиг бүри 1974 ондо нээгдэһэн, түүхэнь аргагүй баян юм. Һүүлэй жэлнүүдтэ мүнөөнэй сагта шухала шэглэлнүүдээр ажалладаг, олон тоото түсэлнүүдые бэелүүлдэг, шэнэ программануудаар хүдэлдэг байна. Жэшээнь, 2002 он – «Үндэһэтэнэй-нютагай заншал дээрэ бэлигтэй хүүгэдые һургалга» гэһэн түсэлэй федеральна туршалгын талмай, 2007 он – «Байгалай үхибүүд» гэһэн байгаали хамгаалгын түсэлэй уласай туршалгын талмай, 2013 ондо «Буряад ороной хүүгэдэй шэнэ сэсэрлиг-2013» гэһэн түсэлэй туршалгын талмай.

- Манай сэсэрлигэй 12 бүлэгүүдэй долоониинь буряад хэлэ үзэдэг юм. Ехэнхидээ «Амар мэндээ-э!» номоор болон «Түрэһэн үдэрһөө һургуулида оротороо» гэһэн программаар ажалланабди. 29-дэхи гимназитай сугтаа бидэнэр «Шагай наадан», «Гэр бүлын аялга» гэһэн мүрысөөнүүдые үнгэргөө һэмди. Хүүгэднай ехэ урматайгаар хабаадаһан байна. Ходол сэсэрлигэйнгээ байшан соо бэшэ, харин ондоо тээ, һургуулида ошоходонь, хүүгэдтэ һонин байна, - гэжэ сэсэрлигэй буряад хэлэнэй багша Долгор Николаевна Апханова хөөрэнэ.

Харин энэ үдэр гимназии 2 «Б» (багшань Эржэна Балдановна Балсанова) болон 2 «В» ангинуудай (багшань Тогоотүмэр Мункоевна Пунцукова) шабинар сэсэрлигтэ ерэжэ, зүжэглэмэл онтохонуудые багашуулда харуулаа. 2 «Б» ангиин һурагшад Бабасан Абидуевай «Муура багша» онтохониие, харин 2 «В» ангиинхид «Гэрхэн» гэжэ мэдээжэ ород онтохониие табиһан байна. Хүгжэмэй танхим соо сугларһан сэсэрлигэй хүүгэд сэдьхэлэй хананги, хүхюутэйнүүд, шаг шууяа табилдаһаар тараа һэн.

Автор: Елена Дамдинова
Описание: 29-дэхи гимназиин һурагшад