​Буряад Уласта нарай хүүгэдэй тоо олошорно

Хүдөө һууринуудта түрэһэн багашуулай тоо хотодо түрэгшэдэй тооһоо дээгүүр байна. Жэшээлхэдэ, хоритойһоо хорин дүрбэ хүрэтэр наһатай хүдөөгэй залуу эхэнэрнүүд хотын эхэнэрнүүдтэ орходоо, 2015 ондо 2,2 дахин олон хүүгэдые түрөө.

Статистикын албанай мэргэжэлтэдэй мэдээсэһээр, мүнөө Буряадай бүхы хүн зоной 41 процент хүдөө нютагуудта ажаһууна. Ондоогоор хэлэбэл, 402900 эрхэтэд хүдөөгэй ажаһуугшад болоно. Гэхэтэй хамта, Улаан-Үдэ хото шадар зөөжэ ерэгшэдэй тоо жэлһээ жэлдэ олошорно. Тэрэ тоодо Ивалга аймагта хүн зоной тоо 28,6 процентээр, Тарбагатай аймагта 18,6 процентээр дээшэлээ. Хүдөө һууринуудта ажалгүйшүүлэй тоо 12,2 процентдэ хүрэнэ, хотодо 7,5 процент гэжэ хэлэлтэй. Тиихэдэ хүдөөгэй ажалгүйшүүлэй 39,5 процентэнь гуша наһа гүйсөөдүй залуушуул болоно. Хүдөө нютагуудта ажалай салин түлбэриин дунда зэргын хэмжээн хотодо ажаллагшадай салинһаа нилээд доогуур байна. 2015 ондо уласай эмхи зургаануудай болон предприятинуудай хүдэлмэрилэгшэдэй дунда зэргын салин 28 мянга 386 түхэриг байгаа һаа, хүдөө нютагта ажаллагшадай дунда зэргын салин түлбэри оройдоол 16 мянга 117 түхэригтэ хүрөө. Статистикын албанай мэргэжэлтэдэй шэнжэлэлгэнүүдэй ёһоор, 2015 ондо хүдөөгэй нэгэ айл бүлэ һарын туршада эдеэ хоолой зүйл худалдан абахадаа, дунда зэргэ 3165 түхэриг хэмжээнэй мүнгэ гаргашалаа гэжэ тодоруулагдаба. Тиихэдэ хотодо ажаһуугшад дунда зэргэ 5685 түхэриг гаргашалһан байна. Хүдөөдэ ажаһуудаг нэгэ хүн элдэб хангалгануудта дунда зэргэ 1258 түхэриг түлөө, тэрэ тоодо 43 тухай процентнь коммунальна түлбэринүүд. Тэрэшэлэн, 2015 оной түгэсхэлэй тоо, баримтануудые хаража үзэбэл, хүдөөдэ ажаһуугшадай 71 процентнь үмсынгөө гэртэ ажаһууна, 29 процентнь болбосон түхэлтэй байрада гэжэ тэмдэглэлтэй. Тиимэһээ коммунальна хангалгын талаар тоо, баримтанууд хотодо ажаһуугшадай тоо, баримтануудһаа нилээд доогуур байна.