​Эхэнэрэй шарайтай "эрхим багша"

"Эрхим багша» гэһэн буряад хэлэнэй багшанарай урилдаан Буряад Уласта уласхоорондын хэмжээндэ түрүүшынхиеэ үнгэржэ байна. Үсэгэлдэр, ноябриин 22-то, Буряад уласай багшын колледждо нээлгын баяр ёһололдо урилдаанда хабаадагшадай нэрэнүүд эли болобо. Монголой, Эрхүү можын, Үбэр Байгалай хизаарай, Буряад Уласай аймагуудай болон Улаан-Үдэ хотын дунда һургуулинуудай 32 багша энэ урилдаанда оролсожо байна.

Буряад Уласай болбосоролой болон эрдэм ухаанай сайдай уялга дүүргэгшэ Баяр Жалсанов «Эрхим багша» гэжэ урилдаанай нээлгын ёһололдо хабаадажа, буряад хэлэнэй асуудалаар зарим сошордомо тоо, баримтануудые дуулгаба. Социологиин мэдээгээр, 2002 ондо буряад арадаймнай түлөөлэгшэдэй зуунай 78 хубинь түрэлхи хэлэеэ мэдэдэг байгаа һаань, 2015 ондо буряад хэлэтэйшүүлэй тоо улам доошолоо. 6-16 наһанай үхибүүдэй дундаһаа 16 процент хубинь, тиихэдэ 1-6 наһанай хүүгэд сооһоо 27 процентнь буряадаар харилсажа шадаха аргатай байна гээд элирээ. Эгээл тиимэһээ энэ урилдаан болбол түрэлхи хэлэнэй багшанарай мэргэжэл дээшэлүүлхэ, ажалаа хани барисаатайгаар ябуулха гэхэ мэтын олон зорилго урдаа табина гээд, Баяр Жалсанов тэмдэглэбэ.

Автор: Сарюуна Эрдынеева
Описание: Буряад Уласай болбосоролой болон эрдэм ухаанай сайдай уялга дүүргэгшэ Баяр Жалсанов

Автор: Сарюуна Эрдынеева
Описание: Уласхоорондын хэмжээндэ гараһан "Эрхим багша" урилдаанай жюриин гэшүүд

2013 ондо нютаг можо хоорондын хэмжээнэй «Эрхим багша» урилдаанда түрүүлһэн Буряадай үндэһэтэнэй 1-дэхи лицей-һургуулиин буряад хэлэнэй багша Цырен-Долгор Бадмацыренова һургуулияа энэ уласхоорондын урилдаанда түлөөлжэ байна. Цырен-Долгор багшын үхибүүд Улаан-Үдэдэ үндыжэ байбашье, буряад хэлэтэйнүүд юм.

- Эхын һүнтэй хамта шэнгээжэ, түрэһэн үридөө түрэлхи хэлэеэ дамжуулха гээшэ эжынэрэй нангин уялга юм. Юундэб гэхэдэ, хэдэн олон яһатан Буряад Уласта ажаһууна. Хайшан гээд өөһэдынгөө хэлэ хадагалжа ябана гэжэ һананабта? Гэрэйнгээ богоһо алхажа, газаашаа гарахадаа, ород хэлэн дээрэ хөөрэлдэ, харин гэртээ өөрынгөө түрэлхи хэлэн дээрээ хөөрэлдэ гэнэл даа. Манай буряадууд, илангаяа залуу эжы, абанар иимэ шанга эрилтэ үхибүүдэйнгээ урда табинагүй. Хэрбэеэ тиигэжэ табиһан байгаа һаань, үхибүүн бүхэн эхэ хэлэеэ мэдэхэ байгаа. Хотодо байнабди гэлдээд, хүүгэдэй сэсэрлигтэ ошоод гү, али телевизор, компьютер хараад, ород хэлэтэй болошоо гэжэ хэлэдэг ехэ алдуутайбди,- гэжэ Цырен-Долгор багша хэлэнэ.

Автор: Сарюуна Эрдынеева
Описание: Цырен-Долгор Бадмацыренова (зүүн гарһаа)

Автор: Сарюуна Эрдынеева
Описание: Мүнөө жэлдэ Монголой, Эрхүү можын, Үбэр Байгалай хизаарай, Буряад Уласай аймагуудай болон Улаан-Үдэ хотын дунда һургуулинуудай 32 багша энэ урилдаанда хабаадана

“Буряад үнэн” сониной удаадахи дугаарта “Эрхим багша” урилдаанһаа дэлгэрэнгы мэдээсэл бэшэжэ гаргахабди.