​Залуушуулай һонин

“Саг сагтаа, сахилза хүхэдөө” гэжэ, мүнөөдэрнай ямар һайн саг болоо юм даа - һургуулиин хүүгэд өөрынгөө талаан бэлиг гэршэлжэ, олоной урда өөрынгөө хубиин үзэмжэ табижа байха гэжэ хаана, хэзээ үзэгдөө бэлэй?

Октябриин 24-дэ Буряадай Үндэhэтэнэй нэгэдэхи лицей-интернадай 10-дахи «а» ангиин hурагшад суг hурадаг Тыпшеева Аяанынгаа уран зурагуудынь эб хамта багшанартаяа, хүмүүжүүлэгшэ Дари Цырендоржиевна Дабаеватаяа дэлгэжэ, сэдьхэл ханаама, нюдэ хужарлуулма үзэсхэлэн hайхан «Уран биирын аялга» гэhэн түрүүшынь үзэсхэлэн эмхидхэжэ, олоной үзэмжэдэ табяа. Энэ үйлэ хамтын хэрэг бүтээхэдөө, нүхэдэй дэмжэлгэ, багшанарай анхарал гээшэ туһа нүлөө үзүүлжэ, саадахи харгы зам нээхэл юм байна гэжэ нэн түрүүн өөһэдөө ойлгобо.

Хамта дээрээ Аяанын табяад гаран зурагууд дэлгэгдээ. Тон түрүүшынхиеэ эмхидхэгдээшье hаа, олон шэглэлнүүдтэй эдэ уран бүтээлнүүд хараһан, үзэһэн хүн бүхэнэнэй сэдьхэлэй оёорые хүдэлгэжэ, уран һайханай хүсые мэдэрүүлбэ. Энэ үзэсхэлэндэ табигдаһан уран бүтээлнүүд өөрын онсо маягтай түхэлөөрөө илгарна гэжэ харагшад тэмдэглээ. Илангаяа хүнэй шарайда сэдьхэл бодолынь тодоруулха гэжэ оролдоһон байна.

Хожом Дари Цырендоржиевнатай болон Аяанатай энэ үзэмжэ тухай, аяанын уран бэлиг болон һонирхол, һуралсал, багшанар тухайнь хөөрэлдэһэнөө толилхобди.