925
“Буряад үнэнэй” ветеран, һая 80 наһанайнгаа налгай ойе угтаһан Хандасуу (Екатерина) Доржиевна Раднаева гарагай 5-най үглөөгүүр түрэл редакцидаа ехэ баяртайгаар орожо, һүүлшынгөө һониниие дуулгаба.
Үнгэрһэн долоон хоногто Хяагтын домог суута Алтай нютагта ехэ дэмбэрэлтэ үйлэ хэрэг олоной хабаадалгатайгаар үнгэргэгдөө.
Уряа урдаһаа сууда гараһан Алтай-Дунгы тоонто нютагайнгаа хүгжэлтэдэ горитой хубитаяа оруулһан Доржо Доржиевич Банзаров мэндэ ябаа һаа, мүнөө 90 наһанайнгаа ехэ ойе нүхэдэйгөө эбтэй дүхэриг сөө хүүежэ угтаха бэлэй... Теэд “төөлэжэ табиһан бэе, тооложо табиһан наһа” яажа дабахабши даа...
Алтайн дунда һургуулида энэ үдэр олон айлшад, Буряад Уласай, Хяагта аймагай тушаалта ажалшад буугаа. Хяагта аймагай “Алтайский” совхозой хүгжэлтэдэ горитой хубитаяа оруулһан эрхим бэрхэ хүтэлбэрилэгшэ Доржо Доржиевич Банзаровай 90 жэлэй ойдо зорюулагдаһан хэмжээ ябуулгануудай зулай болоһон энэ үдэр бэрхэ хүтэлбэрилэгшэ, нютагай урдаа хараха хүбүүдэй нэгэндэ Хүндэлэлэй самбар мүнхэлэгдэбэ ха юм.
Алтайн сомон дарга Жаргал Николаевич Буянтуев амаршалгын үгэнүүдээр энэ баярые нээбэ. Тиигээд Доржо Доржиевичай дүү Пурбо Будаповичта микрофон барюулаа. Пурбо Буджапович ууган аха тухайгаа, уг гарбалаа, ахынга ажаябуулга һайн һайн һайханаар дурдажа, нютагаархиндаа гүнзэгы баяр баясхалангаа мэдүүлээ.
Арадай Хуралай һунгамал Валерий Цыремпилов, Хүдөө ажахын мэргэжэлтэд Сергей Чурсов, Николай Филшин болон Доржо Доржиевичтай эб хамта хүдэлһэн бэшэшье нүхэдынь дулаахан үгэнүүдээр ажал хэрэгүүдээ, нүхэрэйнгөө ударидахы аша габьяагынь дурсаа.
Иигэжэ Дурасхаалай самбарай нээгдэхэдэ, һургуулиин бэлигтэй хүүгэд ирагуу дуунуудаа хангюурдажа, уян нугархай хатар наадануудаа дэлгэжэ, харагшадые баярлуулаа.
Удаань түүхын багша Валентина Очировна Очирова бултаниие һургуулидаа урижа, хизаар ороноо шэнжэлэлгын музейдэ оруулжа, нютагайнгаа суута ажалша хүбүүн Доржо Доржиевич Банзаровта зорюулагдаһан шэнэ булантай үргэнөөр танилсуулаа. Энээнһээ хойшо һургуулиин бэрхэ шабинар нютагайнгаа түрүү хүн тухай айлшадтаа хөөрэжэ байха.
“Жолоо үргэхэдэ - морин, зоной үргэхэдэ - ноён” гэжэ арадай сэсэн үгын ёһоор нютагай зоной үргэмжөөр Доржо Доржиевич Банзаровай нэрэ нэрлүүлэгдэжэ, солонь дуудагдабал даа. Энэ дэмбэрэлтэ ушараар нютагайнгаа хүбүүе үргэжэ байһан Алтай-Донгойн арад зониие 95 жэлэйнгээ ехэ ойе угтажа байһан “Буряад үнэнэйнгөө” зүгһөө халуунаар амаршалая!
Фото Краеведсеского портала Бурятии
