​Халдабарита үбшэн дэлгэрнэ

СПИД үбшэнтэй тэмсэлгын үдэр декабриин нэгэндэ жэл бүри тэмдэглэгдэнэ.

ООН-ой шиидхэбэреэр 1988 онһоо дэлхэй дээрэ энэ үбшэнһөө һэргылэлгын элдэб хэмжээ ябуулганууд үнгэргэгдэдэг гээшэ. Байгша оной июлиин нэгэнэй мэдээгээр, Ородой Холбоондо ажаһуудаг 146 миллион хүнэй нэгэ миллион гараниинь халдамал үбшэндэ нэрбэгдэнхэй гэжэ бүридхэлдэ абтаа. Халдабарита үбшэнтэй хүнүүд регион бүхэндэ тоологдоно. Хараад үзэхэдэ, Россида 2006 онһоо хойшо жэл бүри ВИЧ үбшэндэ дайрагдаһан зоной тоо 10 процентээр олошорно. Гэхэ зуура, Сибириин федеральна тойрогто ноябрь һарын эхинэй мэдээгээр ВИЧ үбшэндэ нэрбэгдэһэн 231 мянган хүн тоологдоо. Энэ жэлэй 11 һарын дүнгүүдээр эгээл олон үбшэнтэн Кемеровскэ можодо бүридхэгдөө. Гадна Эрхүү, Томска можонуудта, Краснаярска хизаарта халдабарита үбшэндэ нэрбэгшэд баһал олон. Эдэ болон бусад регионуудта СПИД үбшэнһөө һэргылэлгын хэмжээ ябуулганууд олоной хабаадалгатайгаар үнгэргэгдөө. Улаан-Үдэдэ «Һэргылэмжын трамвай», «Мэдээсэлэй палатка», хатарай флешмоб, семинар-тренинг гэхэ мэтын хэмжээ ябуулганууд мүн лэ эмхидхэгдэһэн байна.