​95 жэл: ехэ түүхэтэй сонимнай ерээдүй тээшэ дабшанги

Хүндэтэ нютагаархид!

Мүнөөдэрэймнай дугаар – юрын бэшэ, ойн баярай туяа сасаһан, ехэ удха шанартай, энэ жэл соогоо 50-дахи дугаар. Ушар юуб гэхэдэ, эгсэ 95 жэлэй саада тээ, 1921 ондо, энэл үдэр, декабриин 21-дэ, түрэл сониноймнай түрүүшын дугаар барлагдан гаража, арадаймнай түүхэдэ үшөө нэгэ хуудаһан ирагдаһан байна. Тэрэ сагһаа хойшо дүн хамта 22101 дахин “Буряад үнэмнай” уншагшадтаяа уулзаба.

Тэрэ холо үеын сонимнай “Шэнэ байдал” гэжэ нэрэтэй байһаниинь баһал ехэ удха шанартай. Араднай өөрын гүрэнтэй боложо, саарһан дээрэ нэрэтэй, өөрын уласай түүхэ зохёожо захалаа. Буряадаймнай дарга Матвей Амагаев түрүүшын редактор болоходоо, газетын үүргые үндэр дээрэ сэгнэһэн юм.

Мүнөө “Буряад үнэн” мүн лэ түүхэтэ дабаан дээрээ ерэнхэй. Түрэлхи хэлэеэ хүгжөөхэ, ерээдүйн үенүүдтэ баялигыень дамжуулалсаха үүргэ бидэшье, мүнөө үеын сэтгүүлшэд, ойлгонобди.

Хорбоо юртэмсын хамаг һайн һайханиие, элүүр мэндые, аза жаргал, амгалан байдал үреэгээд, “Үнэнэйнгөө” үнэн нүхэд зандаа үлэжэ, түрэл арадайнгаа түүхэ сугтаа зохёон бэшэе гэжэ уряалнаб!