1080
Балшар бага наһан хэды һайхан саг гээшэб даа! Үльгэр онтохоной эди шэдитэ үйлэ ажабайдалдамнай хэзээ нэгэтэ тохёолдохол байха гэжэ хүлеэн ябадаг хаһа. Илангаяа Шэнэ жэлэй үдэшэ Жабар Үбгэн ерэжэ, һанаһан, хүсэһэн юумыешни заабол бэелүүлхэ бшуу.
Улаан-Үдэ хотын Буряадай 29-дэхи гимнази һургуулиингаа байшанда ёлкын наада эмхидхэхэ томо талмайгүй һэн тула Буряад драмын театр соо хоёр үдэрэй туршада үхибүүдэй наада үнгэргөө.
Түрүүшын үдэшэ 5-дахиһаа 8-дахи хүрэтэр ангинуудай һурагшад эндэ ерэжэ, Буряад драмын артистнуудай наадаһан зүжэг харабад. Зүжэгэй үедэ артистнууд үхибүүдые элдэб мүрысөөнүүдтэ хабаадуулаа. Удаань харагшад булта харалгын танхим сооһоо гаража, гоё һайхан ёлкын дэргэдэ хатар наада эмхидхээ. Анги бүхэн элдэб хатарнуудые табижа, харалгада хабаадалсаа. Басагад бальна һайхан платинуудые үмдэнхэй, томоотойхонууд хүбүүд, сагаан самса, хүзүүндээ галстук, бабочкануудые зүүнхэй байба.
Автор: Анна Огородник
Описание: Үхибүүд хүхюутэй мүрысөөнүүдтэ дуратайгаар хабаадаа
Сүлөөгүй сэнгэжэ байһан үхибүүдтэ дүтэлэн, шанга хүгжэмһөө хажуу тээшэнь дуудажа, нэгэ хэды асуудалнуудые табибаб. Үнгэрһэн жэлдэ үхибүүд ямар амжалта туйлаа гээшэб? Мүнөө ерэжэ байһан жэлһээ юу хүлеэнэб? Ямар мэргэжэлтэй болохоёо һананаб? Шэнэ жэлдэ ямар бэлэг Жабар Үбгэнһөө хүлеэнэб? Эдэ мэтэ асуудалнуудта үхибүүд иигэжэ харюусаба.
Сэрэгма Жалсанова, 5-дахи ангиин һурагша:
- Би мүнөө жэлдэ эгээл эрхим һурагша болохые оролдооб. Энэ жэлдэ бэрхэшээлнүүд ушараал даа, гэбэшье дабажа шадааб. Зарим хэшээлнүүдтээ харюусалгатайгаар хандадаг болохо хүсэлтэйб. Өөрынгөө һайн эрдэм мэдэсээр үнэн сэхэ сэгнэлтэнүүдые абахаяа һананаб. Буряад Уласай хэмжээнэй олимпиадануудта хабаадажа, түрүүшүүлэй тоодо ородогби.
Аюр Намсараев:
- Би Бүхэроссиин болон Уласхоорондын хэмжээнэй олимпиадануудта хабаадааб, амжалтануудые яһала туйлааб. Би өөрөө врач болохо хүсэлтэйб. Эмшэн болохын тула тэсэмгэй, шанга зоригтой болохые оролдоноб.
Арсений Чимитцыренов:
- Би абадаал адли инженер болохоб. Тэрэнэй түлөө һайн эрдэмтэй, дээдэ мэргэжэлтэй хүн болохоб. Мүнөө энэ үнгэржэ байһан Бишэн жэл минии жэл байгаа, тиимэһээ ехэ амжалта туйлаагүйб. Гэртэхинтэеэ Аршаан ошооб, амараабди.
Алтана Базарова, 5а ангиин һурагша:
- Би номоо үзэхэ ехэ дуратайб. “Жэлэй эрхим һурагша” болохые ехэ оролдооб, түрүүшын һуури эзэлээб. Үшөө ехэ амжалтануудые туйлаха хүсэлтэйб. Шэнэ жэлэй эди шэдидэ мүнөө болотороо этигэдэгби. Жабар Үбгэнэй дүрэ зохёогдоһон гэжэ ойлгоошье һаа, бэлэг жэл бүри хүлеэдэгби. 7-той байхадаа, түрэлхидэйнгөө хасуури доро бэлэг табижа байхыень харажархёоб. Жабар Үбгэн үгы гэжэ мэдэхэдээ, нэгэ бага досоомни муудаа һэн. Тиигэһээр Жабар Үбгэндэ бэшэг бэшэхэеэ болёо һэм.
Арюна, 6-дахи ангиин һурагша:
- Би Шэнэ жэлэй эди шэдидэ мүнөө болотороо этигэдэгби. Би өөрөө Жабар Үбгэн, Сагаан Үбгэниие хараа һэм. Тэдэнэр, үнэхөөрөө, Шэнэ жэлэй һүни ерээд, бэлэг үгэдэг ха юм.
Лена, 6-дахи ангиин һурагша:
- Би шкаф соо бэлэг хараа һэм, һүүлдэнь тэрэмни ёлко доро байжа байхадань, Жабар Үбгэн ерэдэггүй гэжэ ойлгоо һэм.
Оюна, 6-дахи ангиин һурагша:
- Бидэ эгэшэтэеэ эжынгээ таһалга соо Жабар Үбгэндэ бэшэһэн бэшэгээ оложорхёод, ехэ досоогоо голхороо һэмди. Тиигэжэ Шэнэ жэлэй шэдидэ этигэхэеэ болёод, Жабар Үбгэндэ бэшэг бэшэхэеэ болёо һэмди.
Автор: Цырегма Сампилова
Описание: Оюна Лена хоёр хатаржа байнад
Юндэн Динганорбоев, 8-дахи ангиин һурагша:
- Мүнөө жэлдэ манай һургуулиин һурагшад Этигэлэй Хамбын наадануудта хабаадажа, дүрбэдэхи һуури эзэлээбди. Жабар Үбгэн үгы гэжэ үшөө 1-дэхи ангиин байхадаа, нэгэ кино хараад, ойлгоод, голхороо һэм.
Мэргэн Ринчинов, 8-дахи ангиин һурагша:
- Би Шэнэ жэлдэ тамирай мастер болохо хүсэлтэйб. Мүнөө жэлдэ мастерта кандидат болооб. Һур харбалгаар хоёр жэлэй туршада бэеэ һориноб. Эмшэн болохо хүсэлтэйб. Урдаа табиһан зорилгодоо үнэн сэхэ, эрид шударгы байхые оролдохоб.
29-дэхи гимназиин эхин шатын һурагшад хоёрдохи үдэрынь Буряад драмын театрай байшан соо Шэнэ жэлэйнгээ һайндэрые угтабад. “Принцесса на горошине” гэһэн зүжэгэй урда тээ багашуул яла сала хасууриин хажууда шүлэгүүдые хэлэжэ, дуунуудые дуулаа, хасуурияа тойроод хатараа. Эндэ сүлөөгүй хабаадажа байһан үхибүүдһээ Шэнэ жэл тухай хэдыхэн асуудалнуудые һуража, иимэ харюунуудые абабаб.
Павел, 4“а” ангиин һурагша:
- Хоёр жэлэй саана тухайлжа эхилээ һэм. Юундэб даа, телескоп эрижэ бэшээд, дурамбай бэлэг абахадаа, ехэ гайхаа һэм. Тиигээд эжымни сонхо руу хараад,«Тэрэ Жабар Үбгэн томо мэшээг үргэлөөд ябана, харыт, харыт», - гэхэдэнь, гүйжэ ошоод харахадамнай, юуншье байдаггүй һэн. Булта доошоо, нэгэдэхи дабхарта байһан ёлко руугаа ошоходомнай, доронь бэлэг байдаг һэн. Тиигээд юундэб даа, тэрэ үедэ абамни заабол хайшааб даа үгы болоод, дахин бии болодог һэн. Эжын бидэниие һамааруулхадань, абамни дары түргэн бэлэг нюудаг хаш гэжэ һэжэглээ һэм. Зүгөөр бага дүү басагандаа хэлэдэггүйб, тэрэмни мүнөө болотороо Жабар Үбгэндэ этигэдэг.
Автор: Цырегма Сампилова
Описание: Булханова Ирина
Ирина Булханова, 4«а» ангиин һурагша:
- Шэнэ жэл манай бүлын эгээл дуратай һайндэр. Үнгэржэ байһан жэл манай бүлэдэ онсо удхатай, энэ жэлдэ би дүү хүбүүтэй болооб. Тиимэһээ би ганса бэлэгүүдые абажа байха бэшэ, мүн Лёша дүүдээ баһал бэлэг бэлдэнэб. Тэрэмни Жабар Үбгэндэ өөрөө бэшэг бэшэжэ шадахагүй ха юм, тиимэһээ би орондонь бэшэг бэшээб. Шэнэ жэлэй энэ һайндэртэ бүхы зон бэлэг абаха ёһотой. Шэнэ жэл ехэ һонирхолтой байха ёһотой. Һайндэрэй шэдитэ һүни бүхы хүсэлнүүдни заабол бүтэхэ бшуу. Бүхы зониие Шэнэ жэлээр амаршалнаб!
Автор: Цырегма Сампилова
Описание: Айлана Дашиева
Долоотойхон Айлана Дашиева Жабар Үбгэндэ бэшэг бэшээ. Гэбэшье һэмээхэн намда энэ үдэр ямар бэлэг хүлеэжэ байһанаа шэбэнэбэ:
- Би “Лего-frends” гэһэн наадхуур гү, али глобус бэлэг абахаа һананаб. Тэрээн тухай бэшэг соогоо бэшээб, ехэ хүлеэжэ байнаб.
Амина Шегимова, 7 наһатай:
- Би нёдондо “Патрулевоз” захяа һэм, теэд намда обоо «щенячий патрульнууд” бэлэг үгтөө. Жабар Үбгэндэ олон үхибүүд хандадаг ха юм, олон бэшэгүүд соогоо һамаржашье болоо. Тиимэһээ сүлөөнь болоогүй хаш. Мүнөө жэлдэ дахинаа эрижэ бэшээб. Арбан нэгэтэй ахаймни “Жабар үбгэндэ бэшэг бү бэшэ, хүшэр байдалда ороод байһан ондоо үхибүүдтэ туһалаг, шамда бүхы юумэн бии”, - гэжэ хэлээ. Жабар Үбгэндэ хүшэр һаань, би ехээр бэлэг хүлеэнэгүйб, ондоо үхибүүдтэ туһалаг лэ даа.
Иимэнүүд болон үшөө олон харюунуудые багашуул намда үгөө. Эдэ харюунуудые буулгажа абаад, дахин шагнажа байхадаа, манай багашуулай Шэнэ жэлэй шэдитэ хүсэндэ үнэн зүрхэнһөө этигэжэ байһандань сэдьхэлдэ дулаахан байна. Гэхэ зуура, эжы абагүй үншэн хэнзэ, юумээр дуталдадаг, ажаһуудалай хүшэр байдалда ороһон үхибүүдтэ өөрынгөө бэлэг дамжуулха хүсэлтэй байһан 1 –дэхи ангиин хөөрхэн үхибүүдые харахадаа, 29-дэхи буряад гимназида үхибүүдые нигүүлэсхы, нимгэн сэдьхэлтэйгээр хүмүүжүүлдэг байна гэжэ баясамаар.
Автор: Цырегма Сампилова
Описание: Ямар хөөрхэнүүд гээшэб!
Автор: Цырегма САМПИЛОВА
