​Бишэн жэлээ үдэшэжэ байхадаа...

Хүн бүхэн жэлэй туршада хэһэн үйлэ хэрэгүүдээ, туйлаһан амжалтануудаа, ажабайдалда болоһон баяр баясхалантай, уйдхар гашуудалтай ушарнуудые хараадаа абан, дүнгүүдээ согсолдог гээшэ ааб даа. Манай угсаата арад жэлээ оруулаад байхада, хүндэшэг байдаг гэжэ тоолодог. Жэл дээрээ хуби заяанда хабаатай эрид шиидхэбэринүүдые абаха ёһогүй гэжэ хэлсэдэг. Харин зарим зон жэлэйнгээ гарахада, ажал хэрэгүүднай урагшатай һайн гэжэ тоолодог. Эдэ һанамжануудай зүб бурууень элирүүлхын аргагүй. Хүн бүхэнэй һанаа бодол ондоо. Тиимэһээ жэлээ үдэшэжэ байhан бишэн жэлтэнэй ажал хэрэгүүдээр һонирхобобди.

Жанна Чимитовна Дымчикова, «Буряад-FM» радиогой захирал:

- Буряад радио нээхэ гэжэ удаан саг соо һанажа ябаһан хүсэлөө бэелүүлбэбди. Олон зоной, олон жэлэй һанал бодол, хүсэл бүтэбэ. Хорин дүрбэн часай туршада буряад хэлэн дээрэ дамжуулдаг түрүүшын радиогой бии болоһондонь ехэ баяртайб. 2016 ондо иимэ радио нээхэ түсэбөөрөө хэрэгээ бүтээгээбди. Үшөө бэелүүлһэн хэрэгүүдһээ гэхэдэ, Намжил Нимбуевай хоёр ботиһоо бүридэһэн ном гаргаабди. Энэ ном соо залуу поэдэй һургуулиин үедэ бэшэһэн, хаанашье хэблэгдээгүй шүлэгүүд, буряад хэлэн дээрэ бэшэгдэһэн пьесэнүүд, Намжил Нимбуев тухай үетэн нүхэдэйнь дурсалганууд ороо. Бүгэдэ буряадуудай «Алтаргана» нааданай үедэ «Алтан модоной баяр» гэһэн шүлэгүүдэй согсолбори гаргаабди. Энэ ном дотор Үбэр Монголой, Монголой, Буряад Уласай поэдүүдэй буряад хэлэн дээрэ бэшэhэн бүтээлнүүд ороһон байна. «Мүнгэн хонхонууд» студидаа хүүгэдэй дуунуудай диск гаргаабди. Тэрээндэ ороһон хорин юһэн дуунуудта клипүүд буулгагдаа, тэдэниие Шэнэ жэлэй һайндэрнүүдэй үедэ харуулхабди. Гаража байһан шэнэ жэлээр бултаниие амаршалаад, аза жаргал, элүүр энхые, хамаг һайниие хүсэнэб.

Соёлма Цыреновна Сангажапова, Буряад Уласай Болбосоролой болон эрдэм ухаанай яаманай мэргэжэлтэ:

- Үнгэржэ байгаа бишэн жэлдэ намда, минии гэр бүлэдэ үрэжэлтэй, ехэ һайн жэл байба гэжэ хэлэхээр. Юуб гэхэдэ, манай бүлэ үни удаан хүлеэгдэһэн басагатай боложо, ехэ баясабабди. Илангаяа би хоёр хүбүүдэй һүүлээр басаган үриие түрэжэ, эхын жаргал гээшые дүүрэнээр мэдэржэ, жаргалтай байнаб. Хоёр хүбүүднай эрдэм номдоо һайнаар һуража, мүн лэ бидэнээ баясуулдаг. Хүүгэдэй сэсэрлигтэ ябадаг хүбүүмнай һаяхан үбэл тухай шүлэг уран гоёор түрэл буряад хэлэн дээрээ сээжээр уншажа, түрүүшын һуури эзэлхэдэнь, гэр бүлэдэмнай үшөө нэгэ баяр болобо. Тиимэһээ үнгэржэ байгаа гал улаан бишэн жэл намда, гэр бүлэдэмнай hайн жэл байба гэжэ дүн гаргахаар. Буряад орондо ажаһуугшадые бултыень Шэнэ жэлээр амаршалаад, гэр бүлын жаргалые, дэлхэйн хамаг һайханиие хүсэнэб.

Оюна Эдуардовна Доржогутапова, Хэжэнгэ аймагай Новокижингинск һууринай малай эмшэн:

- Буряадай гүрэнэй хүдөө ажахын дээдэ һургуулиин ветеринарна таһаг дүүргэһэнэй удаа ажаллажа эхилээб. Жэлээ оруулаад байхада, тиимэшье ондоо гэжэ һанаагүйб. Энэ жэлдэ хүдэлмэриингээ хажуугаар, малгай, оймһонуудые нэхэжэ һурааб. Сүлөө сагтаа хүнүүдэй дүрэнүүдые зураха бэлиг шадабарияа улам хурсадханаб. Гарахаяа байһан тахяа жэлээ угтажа, бүгэдэ зол жаргалтай, эбтэй эетэй һуухамнай болтогой.

Намсалма Жамбыловна Бамбагаева, Эрхүү хотодо ажаһуугша:

- Үнгэржэ байһан жэл намда ехэ үрэжэлтэй байгаа. «Аядон» гэһэн этностудиин бүридэлдэ ябадаг байгааб. 2016 оной февраль һарада Санкт-Петербург хотодо үнгэрһэн «Голоса России» конкурсдо хабаадажа, лауреадай нэрэ зэргэтэй болообди. Энэл жэлдэ Буряадай гүрэнэй дээдэ һургуули дүүргэжэ, Монгол Уласай ехэ һургуулида һуралсалаа үргэлжэлүүлхэмни. Гаража байһан шэнэ жэлээр амаршалаад, элүүр энхэ, һанаһан хэрэгүүдээ бэелүүлжэ ябахыень бултанда хүсэнэб.

Булат Бэликович Будацыренов, «Алтаргана» гэһэн хизаарлагдамал харюусалгатай бүлгэмэй менеджер:

- 2016 он намда hонин үйлэ хэрэгүүдээр ехэ баян байгаа. Тиигэбэшье хамаг юумэн булта һайн байгаа гэжэ хэлэжэ шадахагүйб. Баһал дутуу дунданууд байгаа юм аабза. Олон һонин хүнүүдтэй танилсааб, өөрынгөө хэдэн түсэл бэелүүлээб. Намда илангаяа «Алтарганын» наадан ехэ һайшаагдаа, хадуугдаа. Буряад соёл урлагта хабаатай хэмжээ ябуулгануудай Улаан-Үдэ хотодомнай үнгэргэгдэхэдэнь ехэ һайшаалтай. Ажал хэрэгтнай урагшатай, бүтэсэтэй байг лэ гэжэ хүсөөд, Шэнэ жэлэй баярай мэндые бултанда хүргэнэб.