734
2017 он - Экологиин ба байгаалиин онсо харууһатай газарнуудай жэл гараба гээд Ородой Холбооной Уласай байгаали хамгаалгын, байгаалиин нөөсын сайд Сергей Донской Кабанск аймагай сэргэдэ бууһанай удаа соносхобо. Ушар юуб гэхэдэ, эгээл энэ нютагта Байгалай дархан газар (заповедник) оршодог. Харин мүнөөдэр холо ойроһоо буужа ерэһэн айлшадай «Байгал» түб баярай оршондо нээгдэбэ.
Сергей Донскойн соносхол байгаалидаа үнэн зүрхэнһөө дуратай зоной эльгэ зүрхэндэ ульһа оруулба.
Байгалай дархан газарта (заповедник) хүдэлдэг мэргэжэлтэ Байгалай ехэ зүргэ байгуулаа. Тэрэ үүсхэлэйнь ашаар жэлэй туршада хэдэн мянган аяншалагша сог залитайгаар зубшаад ябаха зуураа, Байгал далайн, тэрэнэй эрьеын гоё һайханиие хоёр нюдөөрөө хаража, сэдьхэлээ баясуулдаг болонхой. Хүреэлэндэ хүдэлдэг мэргэжэлтэ һайн дуратантай хамта экологическа субботнигуудые саг үргэлжэ эмхидхэдэг. Үшөө тиихэдэ түмэр замай хүдэлмэрилэгшэдтэй нэгэдэжэ, Байгал далайн түүхэ бэшэхэ түсэб зохёонхой. Хуушан портын һуури дээрэ тэдэнэр хоёр вагон оложо табяад, хүн зоной оршон тойронхиие хараха талмай байгуулаа. Мүн орожо ерэһэн айлшадые угтаха түб барибад. Тус түбэй нээлгэ мүнөөдэр баярай оршондо боложо үнгэрөө. Баян түүхэ харуулhан урданай зурагуудай үзэсхэлэн тухай хоёр үгэ хэлэмээр. Жэшээнь, арбан юһэдэхи зуун жэлэй хуушаар Павел Песецкиин зураһан зурагуудай буулгабаринууд олоной анхаралда дурадхагдаа. Иимэ хэрэг гүрэнэй Эрмитажай халуун дэмжэлгээр бэелүүлэгдэбэ гээшэ. Уран зурааша Транссибириин харгы замаар аяншалха зуураа уһан шэрээр эдэ бүтээлнүүдээ зураһан байна. Гүрэнэй Засагай газарай сайд Сергей Донскойн Буряад орондо морилхо үедэ Кабанск аймагай Танхой нютагта нүүдэл музей ажалаа ябуулха. Гал тэргын юһэн вагон бүхэндэ элдэб үзэсхэлэнүүд һонирхожо ерэһэн харагшадай урманда дэлгээгдэбэ. ЮНЕСКО гэжэ байгуулгын шиидхэбэреэр Байгал далаймнай бүхэдэлхэйн эрдэни зэндэмэни гэжэ соносхогдоһон ааб даа. Хэды тиимэ байбашье, далайн эрьедэ ажалаа эрхилдэг эмхинүүдэй, байгаалида халиргайгаар хандадаг зоной зэмээр ариг уһан бузарлагдана. Тэрэниие тогтоохын тула зохихо ямар хэмжээнүүдые абабалнай дээрэб гэжэ тусхай мэргэжэлтэдшье, Байгал далайдаа үнэн зүрхэнһөө һанаагаа зобоһон зоншье элидхэлнүүдые уншаба. Үндэр тушаалта ноёной һонорто һая нааша шиидхэгдэхэ зэргэтэй бэрхэшээлнүүдые зүбшэн хэлсэгдэбэ.
Автор: Баяр ЖИГМИТОВ
